1 JUAN 5 - Quichua Imbabura Bible

Crishcahuanllami ima nalitapash mishanchi

1Jesusta, Quishpichij Cristo cajta tucui crijcunaca, Taita Diospajlla huacharishca huahuacunami tucushca. Maijan cashpapash taitata juyajushpaca, chai taitapaj huahuacunatapashmi juyan.

2Taita Diosta juyanajushcataca, pai mandashca shimicunata pactachinajushpa, paipaj huahua purapipash juyarinajushpami ricuchinajunchi.

3Taita Dios mandashca shimicunata pactachishpa causanajushpallami, paita juyanajushcataca yachanchi. Pai mandashca shimicunaca, pactachi ushanallami.

4Shinamandami, Taita Diospajlla huacharishca huahuacuna tucushpaca, cai pachapi ima nali tiajtapash, tucuita mishanchi. Jesusta crijpimi, cai pachapi ima nali tiajtapash mishachunga, ñucanchiman ushaita caramujun.

5Cai pachapi imapash nali tiajtaca, ¿pita mishai ushan? Maijambash: “Jesusca, Taita Diospaj Churimi” nishpa crijllami mishai ushan.

Diospaj Espiritumi, Cristomanda villashca

6Jesucristo shamushpaca, yacupimi bautizarirca. Shinallata yahuarta jichashpami huañurca. Pai shamushcataca, na yaculla ricuchircachu. Ashtahuangarin yacupash, yahuarpashmi ricuchirca. Chaitaca, Diospaj Espiritupash villajunmi. Diospaj Espirituca, na llullanllu.

7Chaita ricushpa villajcunaca, quimsandimi jahua pachapi tian: Taitapash, Shimi shutipash, Diospaj jucha illaj Espiritupashmi tian. Paicunaca quimsa cashpapash, shujllami.

8Cai pachapipash, shinallata quimsa villajcunami tian: Diospaj Espiritupash, yacupash, yahuarpash. Chai quimsandimi, chaimandallata villanajun.

9Runacuna ricushpa villashcatapash crinchimi. Shina cashpami, Taita Dios villashcataca ashtahuan crina canchi. Taita Diosca, paipaj Churimandami cashna nishpa villarca:

10Taita Diospaj Churita pipash crishpaca, paipaj shungupimi shuj villajta charin. Ashtahuangarin Taita Diosta na crishpaca, paipaj Churimanda Taita Dios villashcatapash, na crinllu. Shina cashpami Taita Diostaca, llullapi churan.

11Taita Diosca, cashna nishpami villajun: Causaita causanataca, Taita Diosmi ñucanchiman caramushca. Chai causaitaca, paipaj Churimandallami caramushca.

12Diospaj Churihuan shujlla tucushpa causanajujllami, chai causaitaca charin. Taita Diospaj Churihuan na shujlla tucushpaca, pipash chai causaitaca na charinllu.

Causaita causanata charishcata yachachunmi escribishca

13Taita Diospaj Churita crishcamanda, causaita causanata charishcata aliguta yachachunmi, caicunataca escribini. Shinallata Taita Diospaj Churipaj shutita crishpa catichunmi escribini.

14Pai munashcashna ñucanchi imaguta mañajujtapash, Diosca uyanllami. Chaita yachashpami, paita crishpa cushijunchi.

15Ñucanchi imaguta mañajpipash, Dios uyajuj cashcataca yachanchimi. Chaimandami imaguta ñucanchi mañashpapash, Dios caramujujtaca ña yachanchi.

16Maijan crij cashpapash, na huañuiman apajuj juchata rurajujta ricushpaca, paimanda Diosta mañachun ninimi. Shina mañajpimi Taita Diosca, paiman causaita caranga. Huañuiman na apajuj juchata rurajcunamandami, shina mañachun nini. Huañuiman apajuj juchapash tianmi. Chai juchata rurajcunamandaca, na mañanachu canguichi ninimi.

17Imatapash cashcatapacha na ruranaca, juchami. Shina cajpipash, na huañuiman apajuj juchapash tianmi.

18Maijambash Taita Diospajlla huacharishca huahuacuna tucushpaca, juchata na ashtahuan rurashpa causajtami yachanchi. Paitaca, Taita Diospaj Churi cuidajujpimi, diabloca napacha tacari ushan.

19Ñucanchica, Taita Diospajllami causanajunchi. Ashtahuangarin cai pachapajtalla rurashpa causajcunataca, diablomi tucuicunata mandajun. Chashna cajtaca yachanchimi.

20Shinallata Taita Diospaj Churi shamushcatapash yachanchimi. Paimi, na llullaj Diosta ñucanchi rijsichun yachachirca. Shinamandami na llullaj Dioshuambash, paipaj Churi Jesucristohuambash, shujlla tucushpa causanajunchi. Paica, na llullaj Dios cashpami, causaita causagrinataca ñucanchiman caramujun.

21Juyashca huahuacuna, yanga dioscunamandapash anchurinami canguichi nipanimi. Shina cachun.