DEUTERONOMIO 8 - Quichua Imbabura Bible

Israelcuna japina llactaca juyaillagumi

1Mandashca tucui shimicunata pactachinajuchun cunan ñuca mandashcataca, ninanda mirashpa causangapajmi aliguta yariashpami pactachina cannguichi. Cangunapaj ñaupa taitacunaman, Mandaj Dios carashami nishpa juramentushca llactaman yaicushpa japingapajmi, chashna pactachina cannguichi.

2Canda Mandaj Taita Dios cai chuscu chunga huatacunata, jichushca pambata pushamushca tucui ñangunataca yarinami cangui. Paica, can imashna cajta, cambaj shungupi imashna yarijujta, pai mandashcacunata pactachijta, na pactachijta ricungapaj llaquichishpami, shina pushajurca.

3Paica, chai pambapica yarjaihuan llaquichishca jipapash, micushpa shinlli tucuchunmi, maná shuti micunata cararca. Cangunapash, cangunapaj ñaupa taitacunapash na rijsishca micunatami cararca. Chaitaca, runaca na micunahuanlla causana cajta, ashtahuangarin Mandaj Dios rimashca shimicunahuan causana cajta yachachingapajmi, shina cararca.

4Chai chuscu chunga huatapica, canguna churajushcacunapash ima horapash na tucurircachu. Chaquipash na punguircachu.

5Shinallata cambaj shungupipash, aliguta yariyari. Imashnami shuj taitaca, paipaj churita llaquichin, shinallatami canda Mandaj Taita Diospash llaquichin.

6Shina cashcamanda, canda Mandaj Taita Dios mandashcacunata cazushpa, paipaj ñangunapi purishpa, paita manllayari.

7Canda Mandaj Taita Diosca, candaca ali juyailla llactamanmi pushanga. Chai llactaca, jatun larca yacunapash, ashtaca yacucunapash, pugyucunapash, llujshijuj yacucunapash tiaj llactami. Chai yacucunaca pambacunapi, urcucunapimi jicharijun.

8Chai llactaca trigopash, cebadapash, uvaspash, jigospash, granadillaspash, olivospashmi tiaj llactami. Shinallata aceitepash, balun mishquipash tiaj llactami.

9Chai llactapica, ima micunatapash na ashatalla micunguichu. Chaipica, imapash na illangachu. Chai llactapi tiaj rumicunaca, jirrucunashnami. Urcucunamandaca, cobretami llujchingui.

10Canga, na munangacaman micushpami, juyailla llactata carashcamandaca, canda Mandaj Taita Diostapash aligumari cangui ningui.

Taita Diosta ama cungachunmi, shinllita tacurishca

11Canda Mandaj Taita Diosta ama cungangapaca, cuidarinami canguichi. Pai mandashcacunata, pactachinajuchun cushca shimicunata, imata rurachun mandashcacunata, pactachinajuchun cunan ñuca mandashcata pactachingapajmi, chashna cuidarina cangui.

12Canga, na munangacaman micushpa, huasicunatapash alicunata shayachishpami, chaipi causangui.

13Shinallata cambaj huagracunapash, llamacunapash ashtacami miranga. Culquitapash, orotapash, tucui imacunatapash, ashtacatami mirachingui.

14Shina charishpara, cambaj shungupi jariyashpa, Egipto llactapi gañan causajujmanda llujchimuj canda Mandaj Taita Diosta cunganguiman.

15Candaca, millai millai culebracunapash, alacrangunapash junda, manllanayi, jichushca jatun pambapi purichunmi saquirca. Yacupash, na tiaj pushtutami pushamurca. Yacunayachijpipash, paillatami ninan shinlli jatun rumimanda yacuta llujchirca.

16Chai jichushca pambapimi, cambaj ñaupa taitacuna na rijsishca maná shuti micunata micushpa, shinlli tucuchun cararca. Chai jipaca, canmanllata alita rurangapajmi, can imashna cajta ricungapaj llaquichishpa, cashna pushamurca.

17Cambaj shungupira, cashna ninguiman: ‘Ñuca ushaihuan, ñuca maqui ushaihuanmi, cai tucuicacunataca charini’ ninguiman.

18Ashtahuangarin canda Mandaj Taita Diosta yaringui. Paimi, cambaj ñaupa taitacunahuan ari nishpa juramentushcata pactachingapaj, imatapash ashtacata charichun ushaita canman caran. Chaitaca, cunan punllami ricujungui.

19Ashtahuangarin canda Mandaj Taita Diosta cungashpa, shuj dioscunata catishpa, chaicunata cungurishpa servishpaca, tucuchi tucunguipachami nishpami, cunanga cangunata fiñashpa villani.

20Mandaj Diosca, chai llactacunapi causajcunataca, cambaj ñaupajpimi tucuchinga. Shinallatami cambash, canda Mandaj Taita Dios rimashca shimicunata na cazushcamandaca tucuchi tucungui.