JOB 12 - Quichua Imbabura Bible

Job runaguca, Taita Diospaj ushaitapash, yachaitapashmi parlashca

1Shina nijpimi Job runaguca, cashna nishpa tigrachirca:

2“Cangunami, alipacha gentecuna canguichi. Canguna huañujpica, ali yachaipash tucuringami.

3Ñucapash, cangunashnallata ali yuyaitami charini. Cangunata yali yangallapash na canichu. Canguna nishcatashnaca, ¿pita na ni ushangayari?

4Ñucapash, ñuca cumbahuanllata nalicachi tucushca purami cani. Taita Diosta mañajpica, paica tigrachimunllami. Imatapash cashcatapacha ruraj runatapash, imatapash cashcatapacha na ruraj runatapash, asishpami ricunajun.

5Ñuca chaquica llushpigrijunmi. Alipi tiajushpata, nalicachi tucushca lamparashnami cani.

6Shuhuacunapaj carpacunapirami, imapash ali llujshin. Taita Diosta fiñachijcunarami, imatapash na manllashpa causanajun. Paicuna imatalla charishcataca, Diosllatami paicunapaj maquipi churashca.

7Shina cajpica cunanga, animalcunata tapuyari. Paicunaca villangallami. Jahuata rij alasyu animalcunata tapuyari. Paicunaca ricuchingallami.

8Na cashpaca alpahuan parlayari. Paipash villangallami. Mama cuchapi tiaj pijicunapash villangallami.

9Cai tucuicunamandaca, ¿imashi, Mandaj Diospaj maquihuan rurashcataca, na yachan?

10Causaita tucui charijcunapaj almaca, paipaj maquipimi. Tucui gentecunapaj samaipash, paipaj maquipimi.

11Rinri uyajpimi, ali shimi cajta, nali shimi cajtapash yacharin. Shimiman micuna chayajpimi, imashna cajtapash yacharin.

12Rucucunami, ali yachaita charin. Unai huatacunata causajcunami, ali yuyaicunata charin.

13Ali yachaipash, ushaipash Taita Dioshuanmi. Ali yuyaita cunapash, ali yuyaipash paipajmi.

14Pai urmachishcataca, pipash na cutin shayachi ushanllu. Runata vichashpa churashcataca, pipash na pascashpa llujchi ushanllu.

15Yacucunata pai charijpica, tucuilla chaquinllami. Yacuta yapata cachamujpica, alpata tucuchinllami.

16Ushaipash, ali yachaipash paihuanmi. Pandaj runapash, pandachij runapash paipajmi.

17Ali yuyaita cuj runacunataca, paimi ali yuyai illajcuna purichun saquin. Paimi, juezcunatapash muspayachin.

18Paimi, llaquichishpa charij mandajcuna huatashca cadenacunata fitishpa, cabiacunahuanlla huashapi huatan.

19Paimi, mandajcunatapash tucuita quichushpa pushan. Ushaita charijcunatapash tucuchinllami.

20Na llullashpa rimajcunatapash upallayachinllami. Mandaj rucucuna ali yuyaita cunatapash quichunllami.

21Paimi, jatun mandajcunata yangapi churanatapash talinshna cachamun. Ninan shinllicuna huatarishca chumbitapash pascanllami.

22Paica, yana yana tuta ucu ucuman cajtapash tarinllami. Huañuchij llandutapash, punchapambaman llujchinllami.

23Paica, llactacunata mirachishpapash, paillata chingachinllami. Llactacunamanda caita chaita cachashpapash, cutin tandachimunllami.

24Paimi, cai pachapi causajcunata mandajcunapaj yuyaita quichun. Paicunataca, ñan illaj jichushca pambata chingashcashna purinajuchunmi saquin.

25Paicunaca, micha illaj yana yana tutapishnami, tacarishpalla purinajun. Machashca runacunatashnami pandachin.