1Israelcunata Michij Dioslla, uyahuayari.
Canmi Josepaj miraicunataca,
llamacunatashna michijupangui.
Querubín nishcacunapaj chaupipi
causajuj Dioslla, punchayachimupairi.
2Cambaj ninan ushaitaca Efraín aillupaj,
Benjamín aillupaj, Manasés aillupaj ñaupajpi
ricuchishpa, ñucanchita quishpichingapaj shamupairi.
3Taita Dioslla, ñucanchitaca punda ali
causashcashnallata cutin tigrachihuayari.
Cambaj ñavihuan punchapamba ricuhuayari.
Shina ricujpica, quishpirishcami cashun.
4Tucuita Mandaj Taita Dioslla, ¿ima punllacamanda
can agllashcacuna mañanajujta na uyangapaj munashpa,
can fiñarishcata ricuchigringui?
5Viquita jichanatami, micunatashna cararcangui.
Viquita jichanatallatami yacutashna,
ashtacatapacha ufiachircangui.
6Ñucanchitaca, ñucanchi ladolla llactacunapi
causajcuna na cazushpa asinajuchunmi saquircangui.
Ñucanchita fiñajcunaca, paicuna
purami ñucanchita ricushpa asinajun.
7Tucuita mandaj Taita Dioslla, ñucanchitaca
punda ali causashcashnallata cutin tigrachihuayari.
Cambaj ñavihuan punchapamba ricuhuayari.
Shina ricujpica, quishpirishcami cashun.
8Cai llacta runacunata llujchishpa
cachashpami, Egiptomanda can llujchimushca
uvas yuracunata tarpunshna churarcangui.
9Chai alpataca, paicunapaj ñaupajpi mapa
illajta saquijpimi, sapicunapash shinllita
sapiyashpa alpapi viñashpa jundarca.
10Urcucunaca, chai yuracunapaj
llandunahuan quilpashcami carca.
Taita Diospaj cedro quirucunataca,
paicunapaj malquicunahuanmi quilpajurca.
11Paicunapaj malquicunaca,
mama cuchacamanmi viñarca.
Paicunapaj retoñacunapash, jatun yacucamanmi viñarca.
12¿Imamandata chai uvas chagra
muyundi jarcashcacunataca faquircangui?
Ñanda tucui yalijcunami,
uvasta pallashpa yalinajun.
13Urcu cuchicunami tucuchijun,
sacha animalcunami micujun.
14Tucuita mandaj Taita Dioslla,
cunanda tigramupairi.
Cai uvas chagrataca, imashna cajta jahua
pachamanda aliguta ricushpa llaquipairi.
15Cambaj ali lado maquihuan
tarpushca yurataca llaquipairi.
Cambaj cachun shinllita viñachishca
retoñotapash llaquipairi.
16Cunanga, rupashpami llaquinayaita tucurishca.
Shina rurajcunaca, can fiñarishpa
shinllita rimajpi tucurichun.
17Cambaj maquitaca, cambaj ali ladoman
tiajuj runapaj jahuapi churapairi.
Cambajlla cachun can shinllitapacha churashca,
huañuna aichayu runapaj jahuapi churapairi.
18Shina rurajpimi, canmandaca napacha anchuripashun.
Ñucanchimanmi causaita carangui.
Shina carajpimi, cambaj shutipi mañapashun.
19¡Tucuita Mandaj Taita Dioslla, ñucanchitaca
punda ali causashcashnallata cutin tigrachihuayari!
Cambaj ñavihuan punchapamba ricuhuayari.
Shina ricujpica, quishpirishcami cashun.
Who We AreWhat We EelieveWhat We Do
2025 by iamachristian.org,Inc All rights reserved.
