ISAÍAS 11 - Quichua Imbabura Bible

Mesías shuti jatun mandajca, imatapash cashcatapachami mandanga

1Taita Isaimandaca, shuj troncomanda jamzi caspi llujshinshnami, shuj huahuagu llujshinga. Chai tronco sapicunamandaca, mushuj yurami viñanga.

2Paipimi, Mandaj Diospaj Espirituca causanga. Chai Espiritumi, ali yachaitapash, alipacha yachajushca causanatapash, ali yuyaita cunatapash, ninan ushaitapash paiman cunga. Chai Espiritumi, Mandaj Diosta rijsishpa, manllashpa causana yuyaitapash cunga.

3Mandaj Diosta manllashpa causanatapash, aligutapachami yachachijunga. Paica, na ñavita ricushpalla llaquichijungachu. Imata rurana cajpipash, na shujcuna nishcata uyashpalla rurajungachu.

4Ashtahuangarin imagutapash na charijcunataca, imatapash cashcatapacha rurashpami mandajunga. Llactapi causanajuj na jariyajcunataca, aliguta ricushpami mandajunga. Cai pachapi causajcunataca, paipaj shimihuanmi caspihuanshna llaquichijunga. Paipaj shimimanda samaihuanmi, paita na manllajtaca huañuchinga.

5Imatapash cashcatapacha ruranahuanmi, chumbilishcashna canga. Tucui imatapash pactachij cangapajpash, chumbilishcashnami canga.

6Shinamandami atujpash, huahua llamahuanllata causanga. Leopardopash, huahua chivohuanllatami sirijunga. Shicuhuan, leonhuan, huasipi charina animalhuanga tandanajushpami purinajunga. Paicunataca, uchilla huambragumi michijunga.

7Huarmi huagrapash, huarmi osohuanmi purinajunga. Paicunapaj huahuacunapashmi sirinajunga. Leonbash, huagrashnami ujshata micushpa causanga.

8Chuchujuj huahuapash, huañuchij culebra causaj utuju ladopi pugllajungallami. Chairalla chuchumanda anchuchishca huahuapash, millai culebra causaj utujupi maquita satingallami.

9Ñucapajlla shicanyachishca tucui urcupica, ima nalitapash, ima llaquitapash na ruranajungachu. Imashnami mama cuchaca yacu jundashca tiajun, chashnallatami tucui cai pachaca, Mandaj Diosta rijsina yuyaihuan junda canga.

10Chai huatacunapica, cashnami tucunga: Taita Isaipaj sapimanda viñashcataca, tucui gentecuna ricuchunmi, shuj banderata shayachinga. Gentecunaca paitami mascanajunga. Pai causajuj huasica, punchapambagumi canga.

11Chai huatacunapica, cashnapashmi tucunga: Mandaj Diosca, paipaj maquita alsashpami, prezu apai tucushcamanda huaquin puchushcacunataca, cutin tigrachimunga. Paicunataca, Asiria, Egipto, Patros, Etiopía, Elam, Sinar shuti llactacunamanda, Hamat shuti pueblomanda, mama cucha manñacunapi tiaj llactacunamandami tigrachimunga.

12Tucui shuj llactacunapi causajcuna ricuchun, shuj banderata shayachishpami, llactamanda llujchishpa cachai tucushca israelcunataca cutin tandachimunga. Judá ailluta, caiman chaiman llujchishpa cachashcatapash, cai pacha chuscundi ladomandami, cutin tandachimunga.

13Chaipica, ñucapajlla cashcanman yashpa ricunapash, Efraín aillumandaca chingangami. Judá ailluta fiñajcunaca, tucuchi tucushcami canga. Efraín ailluca, Judá aillu imata charishcatapash, na ashtahuan ñucapaj cashcanman yashpa ricungachu. Judá aillupash, Efraín aillutaca na ashtahuan llaquichingachu.

14Ashtahuangarin ishcai tucushpami, indi huashajuj ladopi causanajuj filisteocunataca urmachinga. Indi llujshimuj ladopi causajcuna, imatalla charishcatapashmi quichunajunga. Edom shuti, Moab shuti llactacunapi causajcunaca, paicunatami servinajunga. Amonitacunapash, paicuna mandashcatami cazushpa causanajunga.

15Mandaj Diosca, Egiptopi tiaj mama cuchamanda asha llujshirishca cuchatapashmi chaquichinga. Paipaj Espiritupaj ushaihuanmi, Eufrates shuti jatun yacu jahuapi paipaj maquita chutashpa, chai jatun yacumanda llujshijuj canchis yacucunataca chaquichinga. Shina rurashpami israelcunataca, chaquipi churajunacunata churajushcacunandi yalichimunga.

16Dios agllashca puracunamanda huaquinlla puchushcacunataca, Egipto llactamanda ñanda pascashpa, vichai pushamushcashnami Asiria llactamandaca pushamunga. Israelcunapaca, chai punllashnallatami ñan tianga.