1Ñucaca, Sarón shuti pambapi tiaj rosas sisashnami cani. Pugru pambacunapi tiaj lirio sisashnami cani.
2Imashnami casha yura chaupicunapi lirio sisagu ricurin, shinallatami ñuca cumba huarmigupash, jarihuan nara tacarishca cuitsacunapaj chaupipica ricurin.
3Imashnami sacha yura chaupicunapi manzana yuragu ricurin, shinallatami ñuca juyashcaguca, chairalla viñai puracunapica ricurin. Ñuca munashcagupaj llandupimi tiarircani. Paipi fucushcaguca, ñuca shimipica mishquillagumi carca.
4Paica, jatun micuita ruranajuj huasimanmi pushahuarca. Paipaj juyaica, ñucapaca banderashnami carca.
5Chaquichishca, uvasta carashpa charihuaichiyari. Manzanata carashpa shinllichihuaichiyari, paita juyaimandaca huañujunimari.
6Paipaj lluqui lado rigrataca saunachishpa, paipaj ali lado rigrahuanga, ugllashpami ali cahuanman.
7Jerusalenbi causaj, jarihuan nara tacarishca cuitsacunalla, corzo nishca animalcunamandapash, sacha tarugacunamandapashmi cangunataca, cashna nishpa ari nichini: Juyaitaca, pai munashcacaman puñujuchun, na rijchachinachu canguichi.
8¡Ñuca juyashcagu rimashcami uyarin! Ricuichi, paimi shamujun. Paica urcucunata, lomacunata jahuata jahuata fahuashpami shamujun.
9Ñuca juyashcaguca, corzo nishca animalshna, na cashpaca maltun tarugashnami capan. Ricuichi, paica ñami ñucanchi pata huashapi. Ventanacunamandami ricujun, ventanapi churashca caspi huashacunamandami chapajun.
10Ñuca juyashcaguca, cashnami nihuarca: “Ñuca cumba huarmigulla, ñuca juyashcagulla, jatarishpa shamuyari.
11Ricui, ñamari tamia punllacunaca tucurishca. Tamia punllacuna yalijpica, juyailla punllacunami tucushca.
12Pambapica, sisacunami ricurin. Candana punllacunami chayamushca. Ñucanchi llactapica, urpicuna huacanajuimi uyarijushca.
13Jigospash, yurapica ñami fucujun. Uvas sisacunapash, juyaillagumi ashnanajun. Ñuca cumba huarmigulla, ñuca juyashcagulla, jatarishpa shamuyari.
14Jaca rumi utujucunapi, jahua urcu pacalla pushtucunapi causaj ñuca palomagulla, cambaj ñaviguta ricuchihuayari. Can rimashcaguta uyachihuayari. Can rimashca shimicunaca, mishquillagumi uyarin. Cambaj ñavipash, juyaillagumi ricurin” nihuarcami.
15Añascunata japigripaichi. Uvas chagracunata tucuchinajuj uchilla añascunata japigripaichi. Ñucanchi uvas chagracunaca, chaira sisajunllami.
16Ñuca juyashcaguca ñucapajmi, ñucaca paipajmi cani. Paica, lirio sisa chaupicunapimi michin.
17Ñuca juyashcagulla, nara pacarijpillata, nara punllayajpillata, ucha tigramuyari. Beter shuti urcu jahuacunataca, corzo nishca animalshna, na cashpaca maltun tarugashna calpamuyari.
Who We AreWhat We EelieveWhat We Do
2025 by iamachristian.org,Inc All rights reserved.
