JEREMÍAS 8 - Quichua Imbabura Bible

1Mandaj Diosca, cashnatapashmi nin: “Chai punllacunapica, Judá llactata jatun mandajcunapaj tullucunata, caishuj mandajcunapaj tullucunata, curacunapaj tullucunata, villajcunapaj tullucunata, Jerusalenbi causajcuna huañushcapaj tullucunatapashmi, pambashca utujucunamanda llujchinajunga.

2Chai tullucunataca indiman, lunaman, jahua pachapi tiaj tucui luzerocunamanmi, tsirapashpa shitanajunga. Paicuna causashpaca, chaicunatami juyashpa, servishpa catinajurca. Chaicunatami, cungurishpa imatapash tapunajurca. Tullucunataca, pipash na tandachishpa pambanajungachu. Ashtahuangarin mapa huanushnami, alpa jahuapi siringa.

3Chai nalita ruraj miraicunamanda puchushcacunataca, caita chaitami cachasha. Paicunaca, maipi cashpapash causanata munangapaj randica, huañungapajmi munanajunga” ninmi tucuita Mandaj Diosca.

4“Cashnatapash ningui: Mandaj Diosca, cashnami nin: ‘Maijambash urmashpaca, ¿nachu cutin jatarin? Ñanda chingachijpash, ¿nachu ñanda mascashpa cutin tigran?

5¿Imashpata Jerusalenbi causanajuj cai gentecunaca ñucataca, paicunapaj tucui causaipi napacha cazunajun? Umachishpalla causanata ugllanshna juyashpami, ñucapajman tigrangapaca na munan.

6Ñucaca, tucuitami ali uyajuni. Aliguta rimajca, pipash na tianllu. Nalita rurashcamanda llaquirijpash, shujllapash na tianllu. ¿Imatata rurajuniyari? nishpa tapurijllapash, na tianllu. Tucuicunami, paicunapaj ñandaca, caballopaj shimi huatashcata cacharijpi, macanajuiman calpashpa yaicunshna purinajun.

7Cig:ueña nishca animalpash, jahua pachata ricushpaca, ima quillapi shuj ladoman rinata yachanmi. Urpipash, grulla nishca animalpash, golondrinapash ima quillapi quiquin llactaman tigranataca yachanmi. Ashtahuangarin ñuca agllashca gentecunaca, Mandaj Dios ñuca aliguta ricushpa mandashcataca, na rijsishpami causanajun.

8Shina cashpapash, ¿imashpata cangunaca: Ñucanchica, alipacha yachajushcami canchi. Mandaj Dios mandashca shimitaca, ñucanchimi charinchi ninajunguichi? Chai mandashcacunataca, llullashpa escribijcunami llullaman tigrachishpa escribinajurca.

9Ricuichi, alipacha yachajushcacunapash ninanda pingai tucushpa manllarishpami, imatapash na yachajushcashna tucunajun. Mandaj Diospaj Shimita na ricunayachij gentecunacarin, ¿imatata ashtahuan ali yachajushca cangayari?

10Chaimandami paicunapaj huarmicunatapash, chagracunatapash cai llactata quichungapaj shamujcunaman cugrini. Paicunaca, ashtahuan uchillamanda callarishpa, ashtahuan jatungamanmi, imashnamambash charijyanatalla tucuicuna yarinajun. Villaj runamanda callarishpa curacunacamanmi tucuicuna umachinajun.

11Ñuca agllashcacuna chugrishcataca, yangalla parlocunahuanmi: ‘Casilla ali causaimi tian, casilla ali causaimi tian’ nishpa, nanaita jambinajun. Ashtahuangarin, casilla ali causaica na tianllu.

12Millanayaita ruranajushcamandaca, ¿pingai tucunajunllu? Paicunaca, ashallatapash na pinganayachinllu. Paicunaca, imashna pingai tucunatapash na yacharcachu. Shinamandami ñuca llaquichijpica, caishuj urmaj puracunandi paicunapash urmanajunga’ ninmi ningui” nijurcami Mandaj Diosca.

13Mandaj Diosca, cashnatapashmi nin: “Ñucaca tucuillatami tucuchigrini. Uvas chagrapica, shuj uvasllapash na puchungachu. Jigos yurapipash, shuj granollapash na puchungachu, yuramanda fangacunapashmi chaquishpa urmanga. Imatalla ñuca carashcacunaca, shujcunapajmi tucunga” ninmi.

14Ñucanchica, ¿imapajta caipi tianajunchilla? Cunanga tandanajushpa, muyundi jatun pircacunahuan rurashca pueblocunaman yaicushpa huañushunchilla. Ñucanchita Mandaj Taita Diosca, ñucanchitaca huañuchi tucuchunllatami saquishca. Mandaj Diosta fiñashpa juchata rurashcamandami paica, jayajhuan chapushca yacuta ufiachishca.

15Casilla ali causaitami shuyanajujpipash, ima alipash na tiarcachu. Nanaimanda jambirina punllatami shuyanajurcanchi. Ricuichi, ashtahuangarin musparinallami tian.

16Fiñajcunapaj caballocuna fucushcapash, Dan pueblomandapachami uyarimurca. Chai caballocunaca, tucuilla llacta chujchujtami huacashpa calpamunajurca. Paicuna chayamushpaca, alpapi imalla ashtacapacha tiajtami tucuchirca. Pueblotapash, chaipi causajcunatapashmi tucuchirca.

17Mandaj Diosca, cashnami nin: “Ricuichi, cangunata llaquichijuchunga, ñucami huañuchij culebracunata cachamuni. Chaicunataca, imahuan muspayachitapash na usharinllu. Chaicunami, cangunataca canishpa tucuchinga” ninmi.

Judá llactamanda, Jerusalenmandami huacashca

18Cai ninan shinlli nanaimandami, ñuca shungupipash huañugrijunshna tucujuni.

19Ricuichi, ñuca llactapi causajcuna aij nishpa, ninanda caparishcapash, caru llactamandapachami uyarimujun. “Mandaj Diosca, ¿nachu Sion shuti pueblopi imatayari? Sion pueblota jatun Mandajca, ¿nachu chaipi imatayari?” ninajunmi. Diosca: “¿Imashpata labrashpa rurashca, imamambash rijchaj dioscunahuan, yanga shuj dioscunahuan fiñachihuarca?” ninmi.

20Granocunata cozechana rupai punllacunaca, ñami yalirca. Ashtahuangarin ñucanchitaca, nara quishpichishca.

21Ñuca llactapi causajcuna ninanda llaquichi tucunajujpimi, ñucapash jatun llaquihuan cani. Jatun llaqui, jatun manllai japijpimi, yana yana tutapi apai tucunajunshna cani.

22Galaad shuti llactapica, ¿nachu bálsamo nishca aceite tian? ¿Nachu maijan jambijllapash tian? ¿Imamandata ñuca llactapi causajcunata jambingapaca, ima jambillapash na tian?