JUECES 10 - Quichua Imbabura Bible

Tola shuti, Jair shuti runacunami, israelcunata mandanajushca

1Abimelec shuti runapaj jipaca, Isacar aillupura Fúa shuti runapaj churi Tola shuti runami, israelcunata llaquimanda cacharichingapaj jatarirca. Fúa shuti runapaj taitaca, Dodo shutimi carca. Tola shuti runaca, Efraín urcupi tiaj Samir shuti pueblopimi causajurca.

2Paica israelcunataca, ishcai chunga quimsa huatatami mandajurca. Pai huañujpica, Samir shuti pueblopillatami pambarca.

3Paipaj catica, Galaad llactapi causaj Jair shuti runami, mandangapaj jatarirca. Paica, ishcai chunga ishcai huatatami, israelcunataca mandajurca.

4Paica, quimsa chunga churicunatami charirca. Paicunaca, quimsa chunga burrocunatami charirca. Chai burrocunapimi tiarishpa purin carca. Galaad llactapipash, quimsa chunga pueblocunatami charirca. Chai pueblocunaca, cunangamanmi Jair shuti runapaj shutihuanllata.

5Jair shuti runa huañujpica, Camón shuti pueblopimi pambarca.

Jefté shuti runami, israelcunataca amonitacunapaj maquimanda cacharichishca

6Ashtahuangarin israelcunaca, cutinmi Mandaj Diospaj ñaupajpi nalita ruranajurca. Paicunaca, Baal shuti, Astarot shuti dioscunatami servinajurca. Shinallata Siria llacta dioscunata, Sidón shuti llacta dioscunata, Moab shuti llacta dioscunata, amonitacunapaj dioscunata, Filistea llacta dioscunatami servinajurca. Paicunaca, Mandaj Diosta saquishpami, paitaca na ashtahuan servinajurca.

7Chaimandami Mandaj Diosca, nina japirinshna fiñarishpa filisteocunapaj, amonitacunapaj maquipi churarca.

8Paicunaca, chai huatacunapimi israelcunataca, pusaj huatacaman ninanda llaquichishpa causanajurca. Jordán yacu chimba ladoman tiaj Galaad llactapi causanajuj tucui israelcunatapashmi llaquichishpa charirca.

9Amonitacunapashmi, Judapaj, Benjaminbaj, Efrainbaj aillucunahuan macanajungapaj, Jordán yacuta chimbamunajurca. Shinami israelcunaca, ninandapacha llaquichi tucunajurca.

10Chaimandami israelcunaca, Mandaj Diosta cashna nishpa caparishpa mañanajurca: “Ñucanchica canda na cazushpami, juchata rurapashcanchi. Ñucanchi Taita Diosta saquishpami, Baal shuti dioscunatara servishpa causapashcanchi” ninajurcami.

11Mandaj Diosca, israelcunataca cashna nishpami tigrachirca: “¿Nachu Egipto llacta runacuna, amorreocuna, amonitacuna, filisteocuna,

12Sidón pueblopi causajcuna, amalecitacuna, Maón shuti pueblopi causajcuna llaquichinajujpi ñucata mañajpi, paicunapaj maquimanda quishpichircani?

13Ashtahuangarin cangunaca ñucata saquishpami, shuj dioscunatara servinajurcanguichi. Chashnamandami, ñucapash na ashtahuan cacharichisha.

14Cunanga, cai llaquimanda cacharichijuchunga, canguna agllashca dioscunapajman rishpa caparishpa mañagrichilla” nircami.

15Israelcunaca, Mandaj Diosman cashna nishpami tigrachinajurca: “Juchatami rurashcanchi. Ñucanchitaca, cambaj ima ali cajpipash, chaita rurapailla. Ashtahuangarin cunan punllagullami, cai llaquimanda cacharichihuai nipanchi” ninajurcami.

16Israelcunaca, paicuna purapi tiaj shuj dioscunata anchuchishpami, Mandaj Diosta servinajurca. Shinamandami paica, israelcuna llaquita apanajujta ricushpa, ninanda llaquirirca.

17Shinami amonitacuna tandanajushpa, Galaad llactapi carpacunata shayachishpa tianajurca. Shinallata israelcunapash tandanajushpami, Mizpa shuti pueblopi carpacunata shayachishpa tianajurca.

18Chaipimi mandajcunapash, Galaad llactapi causanajuj gentecunapash, caishuj chaishuj cashna ninajurca: “Amonitacunahuan macanajuitaca, ¿pita callarigrin? Maijambash callarishpaca, Galaad llactapi causanajuj tucui israelcunapaj juezmi tucunga” ninajurcami.