ISAÍAS 24 - Quichua Imbabura Bible

Tucui cai pachataca, Mandaj Diosmi llaquichinga

1Ricuichi, Mandaj Diosca tucui cai pachataca, imapash illaj chushajtami saquigrin. Cai pachataca, shujmanmi tigrachinga. Cai pachapi causajcunatapash, caita chaitami cachanga.

2Chai llaquica llactapi causajcunapaj, curapaj, amopaj, paita servijpajpash, amopaj huarmipaj, paita servij huarmipajpash, randijpajpash, jatujpajpash, culquita mañachijpajpash, divi tucujpajpash, imata mañachijpajpash, imata mañajpajpash chashnallatami canga.

3Cai pachaca, tucuillapachami chushaj quedanga. Tucui imapash illajtami saquinga. Mandaj Diosmi, cai shimicunataca villashca.

4Cai pachaca, urmashpami tucurirca. Cai pachaca, ña huañujunshnami urmarca. Ashtahuan ali gentecunapashmi, huañugrinshna tucunajurca.

5Cai pachaca, chaipi causajcunapaj juchahuanmi mapayarca. Paicunaca, Dios mandashcacunatami na cazunajurca. Pai mandashcacunataca, shujmanmi tigrachinajurca. Causaita causaicaman Dioshuan ari ninajushcatapashmi faquinshna na cazunajurca.

6Chaimandami cai pachaca, ninanda nalicachishpa llaquichijpi tucurirca. Cai pachapi causajcunapashmi, jichui tucunajurca. Shinamandami cai pachapi causajcunaca, tucuchi tucushpa, huaquinlla gentecuna puchurca.

7Uvas chagracunapipash ung:ui yaicujpimi, vinopash chingarca. Shungupi ninanda cushijushpa tucui causajcunaca, llaquirishpami huacanajurca.

8Panderota huactashpa cushijunapash tucurircami. Ninanda cushijushpa caparinajuipash tucurircami. Arpata tocashpa cushijunapash tucurircami.

9Vinotapash, na ufiashpa candanajungachu. Ufiajcunapaca, sidrapash jayajmi tucunga.

10Yangacunatalla rurashpa causashcamandami, pueblocunapash llaquichi tucushca. Pipash ama yaicuchunmi, huasi pungucunatapash tucuilla vichashca.

11Vino illashcamandami, ñangunapica huacashpa purinajun. Tucui cushijunami tucurishca. Cushijunaca, cai pachamandaca shujmanmi rishca.

12Pueblocunaca, llaquinayaitami tucuchi tucushca. Pungucunapash, tucuilla faquirishpami, urmashca sirinajun.

13Cai pachapi causaj gentecunapaj chaupipica, olivos yurata cuyuchishpa, granocunata pallajpi huaquinlla pallajuna puchushcashnami quedanajunga.

14Paicunami, Mandaj Dios jatun cajta ricushpaca, ninanda cushijushpa candanajunga. Yacu chaupipi tiaj llactacunapi causajcunapashmi alicachinajunga.

15Shina cashcamandaca, pugru pambacunapipash, Mandaj Diosta alicachipaichiyari. Mama cucha manñacunapipash, israelcunata Mandaj Diostaca, jatunyachishca cachun.

16Cai pacha manña llactacunapi causajcunapash: “Imatapash cashcatapacha rurajta alicachipaichi” nishpa candanajujtami uyarcanchi. Chaita uyashpami, ñucaca cashna nircani: ¡Aij ñucalla llaquipimari cani, llaquipimari cani! Yachashca jahua na cazujcunami, ashtahuan na cazunajun. Napacha cazujcunashnami, yachashca jahua na cazunajun.

17Cai pachapi causajcunalla, cangunapaj jahuapica manllanayai llaquimi shamugrin. Utujupi urmashpa, linllipi tsagnarishpami japi tucunguichi.

18Chaipica, cashnami tucunga: Manllanayai llaquimanda pacajushpa calpaj runaca, utujupimi urmanga. Utujumanda llujshishpa calpaj runaca, linllipimi japi tucunga. Jahua pachamandami ventanacunata pascashpa, chai llaquitaca cachamunga. Cai pacha callari ucucunacamanmi cuyuringa.

19Cai pachaca tucuillami chaupiringa. Cai pachaca, tucuillami ñutui tucunga. Tucui cai pachami, ninandapacha chujchunga.

20Cai pachaca, machashca runashnami chujchujunga. Chuglla huasishnami, ninanda cuyurijunga. Cai pacha jahuapica, jucha ninandapacha mirajpimi, tucuilla urmashpa cutinga napacha jataringa.

21Chai punllapica, cashnami tucunga: Jahua pachapi tucui tiashcacunatami, Mandaj Diosca llaquichinga. Cai pacha jahuapica, cai pachapi tiaj jatun mandajcunatapashmi llaquichinga.

22Alpata utujushcapi prezucunata mundunanshnami, tandachishpa charinga. Paicunaca prezullatami causanga. Ña unaita prezu charishca jipami, paicunataca ninanda llaquichinga.

23Lunapash pingai tucungami, indipash musparingami. Tucuita Mandaj Dios, Sion shuti urcupi tiaj Jerusalenbi mandajujpimi, chashna canga. Pai agllashca mandaj rucucunapaj ñaupajpimi, paica punchapamba tiajunga.