JEREMÍAS 3 - Quichua Imbabura Bible

1Cashnami ninajun: ‘Maijambash paipaj huarmita jichujpica, chai huarmica paipaj ladomanda rishpami, shuj jarihuan tandanajun. Shina rurajpica, ¿punda cusaca chai huarmihuan cutin tandanajui ushanllu? Cutin tandanajujpica, ¿nachu tucui llactaca mapayanman’ ninajunmi? Cangunacarin, ashtaca jaricunahuanmi huainayashpa causanajunguichi. Chashna cajpipash cangunataca, Mandaj Dios ñucaca, ñucapajman tigrarimui nijunimi.

2Ñavita vichai alsashpa ricuyari. ¿Maijan pushtupita na huainayarcangui? Cambaj juyashcacunahuan tuparingapajmi, jichushca pambapi árabe nishca runa chapanshna, ñangunapi chapashpa tiajurcangui. Chashna huainayashpa, jatun nalita rurashpami, tucui llactata mapayachircangui.

3Chashna rurashcamandami, punda tamia punllacunapash, jipa tamia punllacunapash na tamiarca. Canga, culquimanda huainayaj huarmishnami, napacha pingai tucungapaj munarcangui.

4¿Nachu cunanmandallapash ñucataca: ‘Ñuca Taitalla, chairalla huambra cajpica, canmi ñucata pushashpa purircangui’ nihuanguiman?

5Ashtahuangarin: ‘Diosca, ¿causaita causaicaman fiña cangallachu? Ricui, ali tucungallami’ nishpami, ima nalitapash usharishcata rurashpa causajungui” ninmi.

Mandaj Diosca israelcunata, Judá llactapi causajcunatapash paipajman tigrarichunmi aliguta yarichishca

6Mandaj Diosca, jatun mandaj Josías mandajui punllacunapimi, cashna nihuarca: “¿Chai na cazuj Israel imatalla rurajta ricunguichu? Paica, tucui loma jahuacunapi, fanga junda tucui quiru ucucunapimi huainayan.

7Chashna cashpami ñucaca: ‘Chai tucuita rurashca jipaca, ñucapajman cutin tigramungami’ nircani. Ashtahuangarin napacha ñucapajman tigramurcachu. Chaitaca, na cazuj paipaj ñaña Judapash ricurcami.

8Chai na cazuj Israel, jaricunahuanlla causashcamanda, jichushpa saquingapaj cartata escribishpa cushcatapash, paica ricurcami. Chaita ricushpapash, na cazuj, paipaj ñaña Judaca na manllarcachu. Ashtahuangarin paipashmi, jaricunahuanlla causangapaj rirca.

9Chaimandami cashna tucurca: Paica, shuj dioscunahuan chashna nalita rurashpapash, imapash na canllu yajurcami. Rumi dioscunahuan, caspi dioscunahuan huainayashpami, tucui llactata mapayachirca.

10Tucui chashna nalita rurashpapash, Israelpaj ñaña na cazuj Judaca, na tucui shunguhuan ñucapajman tigrarircachu. Ashtahuangarin jahua shungullami tigrarij tucurca” nihuarcami Mandaj Diosca.

11Mandaj Diosca, cashnatapashmi nihuarca: “Chai na cazuj Judá llactahuan chimbapurashpa ricujpica, na cazuj chai Israel llactaca, ima nalitapash na rurashcami ricurirca.

12Shina cashcamanda, jahua lado llactaman ricushpa, cai shimicunata caparishpa villagri: Mandaj Diosca, cashnami nin: ‘Na cazuj israelcuna, ñucapajman tigrarimuichi. Ñucaca, na ashtahuan fiñarishpa llaquichishachu. Ñucaca, llaquijmari cani, na causaita causaicaman fiñashachu’ ninmi Mandaj Diosca.

13Mandaj Diosca, cashnatapashmi nin: ‘Canda Mandaj Taita Dios ñucatami, yachashpata na cazuhuarcangui. Chai nalita rurashcata yarishpa llaquiriyari. Fanga junda tucui yura ucucunapimi, na rijsishcacunahuan huainayarcangui. Ñuca cayajujpica, napacha uyahuarcanguichu’ ninmi” nihuarcami.

14Mandaj Diosca, cashnatapashmi nin: “Na cazuj huahuacuna, ñucapajman tigrarimuichiyari. Ñucami, cangunapaj cusa cani. Ñucaca, cangunataca tucui pueblomanda shujguta, tucui familiamanda ishcaita japishpami, Sion shuti pueblopi causanajuchun churasha.

15Chaipi cangunata michinajuchunga, ñuca shungu munashcashna michijcunatami churasha. Paicunami ali yuyaihuan, ali yachaihuan michinajunga” ninmi.

16Mandaj Diosca, cashnatapashmi nin: “Canguna mirashpa, cai llactapi ashtaca jundanajui punllacunapica, cashnami tucunga: Chaipica: ‘Mandaj Dioshuan ari ninajushpa alichishca arcami’ nishpa parlanajunapash na tiangachu. Chai arca tiashcanman ningapajllapash, na yarinajungachu. Chai arcataca, yaritallapash na yaringachu, llaquitallapash na llaquingachu. Chai arcashnalla, shujtapashna rurangachu.

17Ashtahuangarin chai huatacunapica, Jerusalendami: ‘Mandaj Dios mandangapaj tiarina pueblomi’ ninajunga. Tucui llactacunamanda Jerusalenman shamushpami, Mandaj Dios ñuca shutipi mañanajunga. Paicunaca, na ashtahuan paicunapaj shinlli shungu munashcata ruranajungachu.

18Chai huatacunapica, Judá aillupash, Israel aillucunahuanmi tandanajunga. Shina tandanajushpami, jahua lado llactamandaca, cangunapaj ñaupa taitacunaman ñuca carashca llactaman tandanajushpa shamunajunga.

19Ñucaca cashnami yapujurcani: ‘¿Imashnata cangunataca, ñuca huahuacuna cachun rurashpa, tucui llactacunata yali juyailla, munanayai llactata carashayari?’ yajurcanimi. Chashna rurajpica: ‘Ñucataca: Ñucanchi Taitalla nishpa ñucamandaca, na anchuringachu’ yajurcanimi.

20Ashtahuangarin cusata na juyashpa jichuj huarmishnami, can israelcunaca ñucataca yachashpata na cazushpa jichuhuarcanguichi. Mandaj Dios ñucami, chashna nini.

21Lomacunapica, caparinajujmi uyarirca. Israelcunami, ali ñanmanda llujshishpa, paicunata Mandaj Taita Dios ñucata cunganajushca. Shinamandami huacashpa, llaquihuayari nishpa ninanda mañanajun.

22Na cazuj huahuacuna, ñucapajman tigrarimuichiyari. Canguna tigrarimujpica, canguna na cazushpa, nalita rurashcataca alichishallami” ninmi.

Shina nijpimi, cashna ninajurca: “Ricui, canga ñucanchita Mandaj Taita Diosmi cangui. Chaimandami cunanga, cambajman tigramupanchi.

23Na llullashpami nipani: Lomacunapi, urcucunapi ninanda caparishpa mañagrinaca yangapachami cashca. Ashtahuangarin ñucanchi israelcunataca, ñucanchita Mandaj Taita Diosllami quishpichi ushan.

24Ñucanchi taitacuna imata rurashpa charishcatapash, chairalla viñaicuna cashcamandapacha pandashpa causashpami, tucuillata tucuchishcanchi. Paicunapaj llamacuna, huagracuna, shinallata churicuna, ushicunapashmi tucurishca.

25Ñucanchi pandashpami, urmashca sirinajunchi. Ñucanchi rimashpa pingaichishca shimicunallatami, quilpashcashna charijun. Ashtahuangarin Mandaj Taita Diostaca, na cazushpami juchata rurashcanchi. Ñucanchipash, ñucanchi taitacunapash, ñucanchi chairalla viñaimandapachami, cai punllacaman fiñachishcanchi. Shinallata ñucanchita Mandaj Taita Dios rimashcatapash, na uyashpami causashcanchi” ninajurcami.