MATEO 4 - Quichua Imbabura Bible

Jesusmanmi, diabloca nali yuyaita cujushca(Mar. 1:12-13; Luc. 4:1-13)

1Chai jipami Jesustaca, nali yuyaita diablo cuchun, jichushca pambaman Diospaj Espíritu aparca.

2Jesusca, chuscu chunga punlla, chuscu chunga tutata na micushca cashpami, ninanda yarjachirca.

3Nali yuyaita cuj diablo, Jesuspajman shamushpaca cashnami nirca:

—Taita Diospaj Churipacha cashpaca, cai rumicunata tandaman tigrachi— nircami.

4Shina nijpimi Jesusca, cashna nishpa tigrachirca:

—Escribishcapica cashnami nijun: ‘Gentecunaca, na tandahuanlla causangachu. Ashtahuangarin Taita Dios rimashca tucuilla shimicunahuanmi causanga’ nijunmi— nircami.

5Shina nijpimi diabloca, Jesustaca Diospajlla puebloman pusharca. Chaipica, Diospaj huasi jahuamanmi vitsiachirca.

6Chaipimi, Jesustaca cashnami nirca:

—Taita Diospaj Churipacha cashpaca, caimanda ucuman urmai. Escribishcapica cashnami nijun:

‘Canda cuidachunga Taita Diosca, paipaj angelcunatami cachamunga.

Paicunami, rumipi can ama nitijachunga,

paicunapaj maquipi charinajunga’ nijunmi— nircami.

7Shina nijpimi Jesusca, cashna nirca:

—Cashnatapashmi escribishcapica nijun:

‘Canda Mandaj Taita Diostaca, ama can munashcata

rurachun mandanguichu’ nijunmi— nircami.

8Jesustaca, cutinmi shuj jatun urcu jahuaman, diabloca pusharca. Chai urcumandaca, cai pachapi muyundi tucui llactacunatapash, chai llactacuna juyailla cajtapashmi ricuchirca.

9Paitaca cashnami nirca:

—Ñucata cungurishpa ninanda alicachijpica, caicunataca tucuillatami canman cusha— nircami.

10Shina nijpimi Jesusca, cashna nirca:

—Satanás, caimanda anchuri. Escribishcapica, cashnami nijun: ‘Canda Mandaj Taita Diostalla ninanda alicachingui. Paitalla servishpa causangui’ nijunmi— nircami.

11Shina nijpimi diabloca, Jesuspaj ladomanda anchurishpa rirca. Chai jipallami angelcuna shamushpa, Jesusta servinajurca.

Jesusca, Diospajtami rurai callarishca(Mar. 1:14-20; Luc. 4:14-15; 5:1-11; 6:17-19)

12Bautizaj Juandaca, prezuna huasipi churashcata uyashpami Jesusca, Galilea llactaman tigrarca.

13Paica, Nazaret pueblotaca saquishpami, Capernaum shuti pueblopi causangapaj shamurca. Chai puebloca, Galilea cucha manñapimi tiajun. Chai cuchaca, Zabulón shuti, Neftalí shuti llactacunapimi tiajun.

14Jesusca, Profeta Isaías villashca pactachunmi, chai pueblopi causangapaj shamurca. Isaiasca, cashna nishpami villajurca:

15“Zabulón shuti, Neftalí shuti llactacuna.

Cangunaca, mama cuchaman rina ñambimi,

Jordán yacu chimba ladoman tianajunguichi.

Na israelcunami, Galilea llactapica causanajun.

16Yana yana tutapishna causajcunaca,

ninanda punchayachijuj michagutami ricurca.

Huañui japinalla llandupishna chai llactapi causanajujtaca,

michagumi punchayachirca” nijurcami.

17Chai punllacunamandapachami, Jesusca cashna nishpa villai callarirca: “Juchayu cashcamanda ninanda llaquirichi. Jahua pachamanda shamuj mandanaca, ñami pactamushca” nijurcami.

18Jesusca, Galilea cucha manñapi purijushpami, pijita japishpa causanajuj ishcai huauqui puracunata ricurca. Shujca, Pedro ni tucushca Simonmi carca, shujca Andresmi carca. Paicunaca, linllihuanmi pijita japinajurca.

19Paicunatami, Jesusca cashna nirca: “Ñucata catihuaichi. Cangunataca, pijita japishpa tandachinshna, gentecunata tandachijcuna cachunmi rurasha” nircami.

20Shina nijpimi, pijita japinajushca linllicunata chai pushtupi saquishpa, Jesusta catinajurca.

21Jesusca, chaimanda ashaguta rishpallami Jacobohuan, Juanhuan ishcandi huauqui puracuna tianajujta ricurca. Paicunaca, paicunapaj taita Zebedeohuanmi, canoapi tiarishpa linllicunata huatanajurca. Paicunatapashmi Jesusca cayarca.

22Shina cayajpimi cangunatapash, paicunapaj taitatapash chai pushtupi saquishpa, Jesusta catinajurca.

23Galilea llactapica, israelcuna tandanajuna huasicunaman yaicushpami, tucui pueblocunapi Jesusca yachachijurca. Jahua pachamanda mandajuj ali villaitapashmi villajurca. Shinallata tucui ung:uicunata, tucui nanaicunata charij gentecunatami alichijurca.

24Chaitaca, tucuilla Siria llactamanmi uyanajurca. Shina uyarijpimi, nanaicunata tucui charijcunata, shuj shuj ung:uicunahuan llaquinayaita causajcunata, aya jundashcacunata, ñapash shitarishpa tucurijllacunata, suchucunata apamunajurca. Shina apamujpimi, Jesusca alichijurca.

25Shinamandami Galilea llactamanda, Decápolis shuti llactamanda, Jerusalenmanda, Judea llactamanda, Jordán yacu chimba ladomandapash, ashtaca ashtaca gentecuna Jesusta catinajurca.