DEUTERONOMIO 10 - Quichua Imbabura Bible

Dioshuan ari nishcatami, cutin mushujyachishca(Éx. 34:1-10)

1Chai punllacunapimi, Mandaj Diosca cashna nihuarca: ‘Punda rumitashnalla, ishcai tabla rumicunata labrangui. Shinallata caspi arcatapash rurangui. Chai jipaca, urcuman ñucapajman vichai shamungui.

2Punda can faquishca, ishcai tabla rumicunapi escribishca shimicunatallatami, chai rumicunapipash escribisha. Chai rumicunataca, caspi arca ucupi churangui’ nihuarcami.

3Shina nijpimi, acacia nishca caspi arcata rurarcani. Shinallata ishcai tabla rumicunatapash, punda rumicunatashnalla labrashpa rurashpami, chai rumicunataca apashpa, urcuman vichai rircani.

4Chai rumicunapimi Mandaj Diosca, canguna tandanajushca punllapi, nina rupajuj urcu chaupimanda, chunga mandashca shimicunata punda escribishcashnallata cutin escribirca. Chaicunataca, Mandaj Diosmi ñucaman cuhuarca.

5Urcumanda urai tigramushpami, chai escribishca tabla rumicunataca, ñuca rurashca arcapi churarcani. Chai rumicunaca, cunangamanmi Mandaj Dios mandashcashnallata, chaipi tianajun.

6(Chai jipami israelcunaca, Beerot-bene-jaacán shuti pugyu ladomanda llujshishpa, Mosera shuti puebloman rinajurca. Chai pueblopimi, Aaronga huañurca. Paitaca chaipillatami pambarca. Paipaj randica, Eleazar shuti paipaj churimi cura tucurca.

7Chai pueblomandaca, Gudgoda shuti pueblomanmi rinajurca. Gudgoda shuti pueblomandaca, Jotbata shuti llactamanmi rinajurca. Chaipica, larca yacucunapash tiaj llactami carca.

8Chai huatacunapimi Mandaj Diosca, Leví shuti ailluta shicanyachirca. Paicunataca, Mandaj Dioshuan ari ninajushpa escribishcata alichina arcata apanajuchun, Mandaj Diospaj ñaupajpi servinajuchun, Diospaj shutipi cunangaman bendicianajuchunmi shicanyachirca.

9Shinamandami levitacunaca, paicunapaj huauqui purapica, imata japinatapash na charirca. Canda Mandaj Taita Dios imashna nishcashnallata, paicuna japinaca Mandaj Diosmi).

10Ñucaca, punda punllacunashnallatami chuscu chunga punllata, chuscu chunga tutata, urcupi carcani. Mandaj Diosca, ñuca mañashcata cutin uyashpami, pai Mandaj Diosca, cangunataca na tucuchingapaj munarca.

11Mandaj Diosca, cashnami nihuarca: ‘Gentecunata ñaupashpa ringapaj jatari. Cangunapaj ñaupa taitacunaman carasha nishca llactaman yaicushpa japingapaj ñaupashpa ringui’ nihuarcami.

Taita Diosca, paitalla cazuchunmi munan

12Cunanga israelcuna, cangunata Mandaj Taita Diosca, ¿imatata cangunataca mañan? Ashtahuangarin cangunata Mandaj Taita Diosta manllachun, tucui pai mandashcacunata cazushpa causachunmi mañan. Shinallata cangunata Mandaj Taita Diosta tucui shunguhuan, tucui almahuan juyashpa, servishpa causachunmi mañan.

13Shinallata Mandaj Dios mandashcacunata, pactachinajuchun cushca shimicunata pactachishpa causachunmi mañan. Chaicunataca, canguna tucuipi ali llujshichunmi cunan yachachijuni.

14Ricuichi, jahua pachapash, ashtahuan jahuaman jahua pachapash, chaipi tucui imalla tiajcunapash, cai pachapash, cai pachapi imalla tiajcunapash, cangunata Mandaj Taita Diospajmi.

15Mandaj Diosca, cangunapaj ñaupa taitacunatalla alicachishpami juyarca. Shinamandami paicunapaj cati miraicunata agllarca. Tucui gente puramandaca, cangunata agllashcatami cunan punllacaman ricunchi.

16Circuncisión nishcata rurashpa, cangunapaj shungumanda asha carata anchuchinshnami causana canguichi. Na ashtahuan shinllicunapacha tucushpa causanachu canguichi.

17Cangunata Mandaj Taita Diosca, tucui dioscunapaj Taita Diosmi, mandajcunata Mandajmi. Paica, tucuicuna manllana, ninan ushaita charij jatun Taita Diosmi. Paica, na ñavita ricushpalla llaquichij, imatapash pacalla cujpi na japij Diosmi.

18Paica, taita mama illaj huahuagumambash, sapalla mamagumambash, imatapash cashcatapacha ruraj Diosmi. Shinallata shuj llactamanda shamushca runagumambash, juyashpa micunata, churajunata caraj Diosmi.

19Cangunapash Egipto llactapica, shuj llactamanda rishpami causarcanguichi. Chaimandami, shuj llactamanda shamushca runagutaca juyana canguichi.

20Cangunata Mandaj Taita Diostami manllana canguichi. Paitallami servishpa causana canguichi. Paitallami catina canguichi. Paipaj shutipillami juramentuna canguichi.

21Paica, canguna alicachina Diosmi. Paimi, pipash na rurai ushanallacunata, jatun manllarinacunata cangunaman ruraj Taita Dios. Chaicunataca, cangunapaj ñavihuambachami ricurcanguichi.

22Cangunapaj ñaupa taitacunaca, canchis chunga purallami Egiptoman urai rirca. Ashtahuangarin cunanga, cangunataca Mandaj Diosmi, jahua pachapi tiaj luzerocunatashna ashtacata mirachishca.