1 REYES 14 - Quichua Imbabura Bible

Jeroboam runata llaquichinatami, Ahías runa villashca

1Chai huatacunapimi, Jeroboam runapaj churi Abías runaca ungushpa, huañunalla carca.

2Chaimandami Jeroboam runaca, paipaj huarmitaca cashna nirca:

—Ñuca huarmi cajta ama rijsichunga, shuj churajunata churajushpa, jatarishpa Silo shuti puebloman ri. Dios ima nishcata villaj Ahías runaca, chaipimi causan. Cai llactapi jatun mandaj tucunataca, paimi villahuarca.

3Paiman carangapaca, chunga tandata, mishqui tandata, balun mishquitapash, mangapi apashpa paipajman ri. Paimi, cai huahua ima tucunataca villanga— nircami.

4Jeroboam runapaj huarmica, tucuita chashna rurashpami jatarishpa, Silo shuti puebloman shamushpa, Ahías runapaj huasiman shamurca. Ahías runaca, ña rucu rucugu cashpami, paipaj ñavi amsayajpi, na ali ricui ushajurca.

5Ashtahuangarin Mandaj Diosmi, Ahías runataca cashna nishca carca: “Uyai, Jeroboam runapaj huarmimi, paipaj huañujuj huahua ima tucunata tapuj shamunga. Pai shamujpica, cashna chashna nishpa tigrachingui. Paita ama rijsichunga, shuj churajunata churajushpami shamunga” nishcami carca.

6Huasi punguta chai huarmi yaicumujujta Ahías runa uyashpami, cashna nirca:

—Jeroboam runapaj huarmi, yaicumuilla. ¿Imashpata shuj huarmishnalla tucushpa shamungui? Ricui, ñucami ninan llaqui tucunata canman villachun cachamushca runa cani.

7Jeroboam runapajman rishpa, cashna villagri: Israelcunata Mandaj Taita Diosca cashnami nin: ‘Ñucami candaca, israelcunapaj chaupimanda agllashpa, ñuca agllashca israelcunata mandaj cachun churarcani.

8Davidpaj huasi ucu puracuna mandanata quichushpami, canman curcani. Canga, na ñucata servij Davidshna canguichu. Davidca, ñuca mandashcacunata pactachishpami, tucui shungu cazushpa ñuca ñaupajpi alitalla rurashpa causajurca.

9Ashtahuangarin canga, cambaj punda taitacunatapash, tucuita yalimi nalita rurashcangui. Canga, shuj dioscunata rurangapaj rishpami, orota yacuyachishpa imamambash rijchajcunata rurashpa, ñucata fiñachihuangui. Chashna rurashpami ñucataca, huashaman saquihuangui.

10Chaimandami Jeroboam runapaj huasi ucu purapica, jatun llaquita cachamugrini. Jeroboam runapaj miraicunataca servij cachun, na servishpa causaj cachumbash tucui jaricunatami, Israel puramandaca tucuchisha. Jeroboam runapaj huasi ucu puramanda miraicunataca, shujllatapash na saquishpami, huanuta fichashpa shitanshna tucuillata tucuchisha.

11Jeroboam runapaj mirai puramanda pueblopi huañujpica, alcucunami micunga. Maijambash pambapi huañujpica, jahuata rij alasyu animalcunami micunga. Mandaj Diosmi chashna nishca’ ninmi nishpa villangui.

12Canga jatarishpa, cambaj huasiman rilla. Puebloman can chayajhuanmi, huahuaca huañunga.

13Paitaca, tucui israelcunami, yarishpa yarishpa huacashpa pambanajunga. Jeroboam runapaj mirai puramandaca, paillami israelcunata Mandaj Taita Diospaj ñaupajpica, ashallatapash ali ricurishca. Shina cashcamanda Jeroboam runapaj huasi ucu puramandaca, paillami pambai tucunga.

14Israelcunata paipaj randi mandachunga, shuj jatun mandajtami Mandaj Diosca churanga. Paimi, Jeroboam runapaj huasi ucu purataca, cai punllallata tucuchinga. Chaitaca, cunanllatami ruranga.

15Mandaj Diosca, yacu manñapi cuyurinajuj totoratashnami, israelcunataca caiman chaiman cuyuchijunga. Paimi israelcunataca, paicunapaj ñaupa taitacunaman cushca ali llactamanda llujchishpa, Eufrates yacu chimba ladocunaman, caiman chaiman cachanga. Asera shuti huarmi diosman rijchajcunata rurashpa, Mandaj Diosta fiñachishcamandami, chashna ruranga.

16Jeroboam runaca, juchata rurashpami, israelcunatapash juchata rurachishca. Chaimandami Diosca, Jeroboam juchata rurashcamandaca, israelcunataca shujcunapaj maquipi churanga— nircami.

17Shina nijpimi, Jeroboam runapaj huarmica jatarishpa rirca. Shina rishpami, Tirsa shuti puebloman shamurca. Huasi punguta chai huarmi ña yaicujujpimi, huahuaca huañurca.

18Chai huahuataca, tucui israelcunami yarishpa yarishpa huacashpa pambanajurca. Mandaj Dios villashcashnallatami tucurca. Chaitaca, paimanda villaj, paita servij Ahías runahuanmi villachishca carca.

19Jeroboam runa ashtahuan imatalla rurashcapash, jatun macanajuicunata rurashcapash, pai imashna mandajushcapash Israel llactata jatun mandajcuna imatalla rurashcata escribishca libropimi tucuilla tiajun.

20Jeroboam runa mandajushca huatacunaca, ishcai chunga huatami carca. Pai huañushpa, paipaj ñaupa taitacunahuan tandanajujpica, Nadab shuti paipaj churimi, paipaj randi mandajurca.

Roboam shuti runa mandajushcatami villajun(2 Crón. 12:1-16)

21Judá llactataca, Salomonbaj churi Roboam shuti runami mandajurca. Roboam runaca, chuscu chunga shuj huatata charishpami, mandai callarirca. Paica, chunga canchis huatatami, Jerusalenbi mandajurca. Chai pueblotaca Mandaj Diosmi, tucui Israel aillu puramandaca, paipaj shutita chaipi churangapaj agllarca. Roboam runapaj mamaca, amonitapura Naama shutimi carca.

22Judá llactapi causajcunaca, mandaj Diospaj ñaupajpimi nalita ruranajurca. Paicunaca, paicunapaj ñaupa taitacuna tucui juchata rurashcatapash, ashtahuan yali nalita rurashpami, ninanda fiñachirca.

23Paicunapashmi, tucui loma jahuacunapi, fanga junda tucui quiru ucucunapi, Asera shuti huarmi diosman rijchaj rurashcalla dioscunata shayachinajurca.

24Chai llactapica, jari purallata siririj sodomita nishca runacunapashmi tiarca. Israelcunapaj ñaupajmanda, Mandaj Dios llujchishpa cachashca gentecuna tucui millanayaicunata ruraj cashcashnallatami, paicunapash ruranajurca.

25Roboam runaca, ña picha huatata mandajujpimi, Egipto llactata jatun mandaj Sisac shuti runaca, Jerusalenbi causajcunahuan macanajungapaj, vichai shamurca.

26Shina shamushpami, Mandaj Diospaj huasimandapash, jatun mandajpaj huasimandapash, imalla ninan valishcacunata alichishcata llujchishpa, tucuillata aparca. Shinallata Salomón rurachishca, oro escudocunatapashmi tucuillata aparca.

27Chai escudocunapaj randica, jatun mandaj Roboam runaca, bronce escudocunatami rurachirca. Chai escudocunataca, jatun mandaj mandana huasiman yaicuna pungupi cuidaj soldadocunata mandajcunamanmi curca.

28Mandaj Diospaj huasiman jatun mandaj yaicujpica, cuidaj soldacuna shamushpami, chai escudocunata apashpa paihuan rinajun carca. Chai jipaca, cuidaj soldadocunapaj ucupimi, tigrashpa saquigrin carca.

29Roboam runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna, imashna causashcata villajuj libropi escribishca tiajun?

30Roboam runaca, Jeroboam runahuanga tucui causaipimi macanajushpalla causanajurca.

31Roboam huañushpa, paipaj ñaupa taitacunahuan tandanajujpica, paipaj ñaupa taitacunata pambashca ladopillatami Davidpaj pueblopi pambarca. Paipaj mamaca, amonitapura Naama shutimi carca. Paipaj randica, Abiam shuti paipaj churimi mandajurca.