1 CRÓNICAS 22 - Quichua Imbabura Bible

1Shinamandami Davidca, cashna nirca: “Mandaj Taita Diospaj huasitaca, caipimi shayachina. Israelcuna Diosman animalcunata cushpa tucuillata rupachina altartapash, caipimi churana” nircami.

Diospaj huasita shayachingapajmi alichinajushca

2Chai jipami Davidca, caru llactamanda shamushpa Israel llactapi causanajuj runacunataca, tandanajuchun mandarca. Paicuna puramanda huaquindaca, Taita Diospaj huasita shayachingapaj, rumicunata labrachunmi churarca.

3Shinallata chai huasi pungucunata clavashpa shayachingapaca, ashtaca jirru clavocunatami, Davidca rurachirca. Broncetapash, na pezai ushanalla ashtacatami alichirca. Cedro caspitapash, na cuentai ushanalla ashtacatami alichirca.

4Sidón shuti, Tiro shuti llactacunapi causajcunami, chai cedro caspicunataca, ashtacatapacha Davidman apamushca carca. Chaimandami chashna charirca.

5Davidca cashnami nirca: “Ñuca churi Salomonga, chairalla huambragurami. Mandaj Diospaj huasitaca, aligutapacha juyaillagutami shayachina. Tucui llactacunapi rijsishca, alicachishca cachunmi, chashna rurana. Shina cashcamanda cunanga, ñucallatami tucui ima minishtirishcataca alichigrini” nircami.

Davidca nara huañushpallatami, tucuita ninandapacha alichijurca.

6Chai jipami Davidca, paipaj churi Salomonda cayashpa, israelcunata Mandaj Taita Diospaj huasita shayachijuchun mandarca.

7Davidca, Salomondaca cashnami nijurca: “Ñuca huahualla, ñucata Mandaj Taita Diospaj shutipi mañana huasiguta shayachina munaitami, ñuca shungupica charircani.

8Ashtahuangarin Mandaj Diosca, cai shimicunatami cashna nihuarca: ‘Canga, jatun macanajuicunata rurashpami, ashtacacunata huañuchishpa yahuarta jicharcangui. Chaimandami, ñuca shutipi mañana huasitaca, canga na shayachi ushangui. Canga, ñuca ñaupajpica, ashtaca yahuartami alpapi jicharcangui.

9Ricui, canga shuj churitami charigringui. Paica, casilla aliguta causaj runami canga. Ñucallatami, muyundi llactacunapi causaj tucui paita fiñajcunahuan, casilla ali causanata cusha. Paipaj shutica, Salomonmi canga. Pai causajui punllacunapica, casilla ali causaita israelcunaman cushpami samachisha.

10Paimi, ñuca shutipi mañana huasitaca shayachinga. Paica, ñuca churishnami canga, ñucapash paipaj taitashnami casha. Ñucami, israelcunata mandashpa pai tiajunataca, causaita causaicaman shinllitapacha rurasha’ nihuarcami.

11Cunanga, ñuca huahualla. Mandaj Diosca canhuan cachun. Imata ruranapipash, tucuimi ali llujshinga. Shinallata canda Mandaj Taita Diospaj huasigutaca, Dios canmanda imashna mandashcashnallata shayachingui.

12Israelcunata ña mandajujpipash, canda Mandaj Taita Dios mandashcata can pactachijuchunga, Mandaj Diosllata ali yuyaitapash, aligutapacha yarishpa causanatapash canman carachun.

13Pactachinajuchun cushca shimicunata, imata rurachun mandashcacunata, israelcunaman cuchun Mandaj Dios Moisesman cushca shimicunata pactachishpaca, imata ruranapipash alimi llujshingui. Shinlli shayarishpa, yuyaita japingui. Na manllanachu cangui, ushai illanshnapash na quedanachu cangui.

14Ricui, ñucaca shinlli shayarishpami, Mandaj Diospaj huasiguta shayachingapaca, sucta chunga pusaj huaranga quintal orota, sucta millón pusaj patsaj huaranga quintalta pezaj culquita alichircani. Broncehuan, jirruhuangarin ashtaca cajpimi, na pezashca tiajun. Shinallata caspicunata, rumicunatapashmi alichircani. Chaitaca, cambash ashtahuan tandachishpa mirachingui.

15Canga, imatalla ruranata yachajcunataca, ashtaca runacunatami charingui. Rumita labrajcunata, huasichijcunata, carpinterocunata, tucui ruranacunata alipacha yachajushca runacunatami charingui.

16Oropash, culquipash, broncepash, jirrupash, na cuentashcami tiajun. Cunanga jatarishpa, ucha rurai callarilla. Mandaj Diospash canhuan cachun” nijurcami.

17Davidca, paipaj churi Salomonda ayudanajuchun mandashpami, israelcunata tucuilla mandajcunataca, cashna nijurca:

18“Maipi cajpipash, casilla ali causaita cuj, cangunata Mandaj Taita Diosca, ¿nachu cangunahuan? Paimi, cai llactapi causajcunataca, ñuca maquipi churashca. Shinamandami llactapi causajcunaca, Mandaj Diospaj maquipi, pai agllashcacunapaj ñaupajpi cazuchi tucushpa causanajun.

19Chashna cashcamanda cunanga, cangunata Mandaj Taita Diosta tucui shunguhuan, tucui yuyaihuan mascaichi. Mandaj Taita Diospaj huasitaca, shayachi callarichilla. Mandaj Dioshuan ari ninajushpa escribishcata alichishca arcatapash, Diospajlla shicanyachishca ima charishcacunatapash, Mandaj Diospaj shutipi mañana huasiman apamungapajmi shayachina canguichi” nijurcami.