DEUTERONOMIO 6 - Quichua Imbabura Bible

Tucui mandashcacunamanda ashtahuan yali mandashcami

1Mandashcacunata, pactachinajuchun cushca shimicunata, imata rurachun mandashcacunata, cangunaman ñuca yachachijuchun, cangunata Mandaj Taita Dios mandashcacunaca, caicunami. Canguna japigrinajuj llactaman chayashpa, tucuita pactachishpa causanajuchunmi, cangunaman yachachijuchun mandahuarca.

2Pactachinajuchun pai cushca tucui shimicunata, pai mandashcacunata canman ñuca yachachishcata pactachishpa, canda Mandaj Taita Diosta manllashpa causachunmi, chashna mandahuarca. Cambash, cambaj huahuacunapash, cambaj huahuacunapaj huahuacunapash tucui causaipi pactachinajuchunmi, chashna yachachijuchun mandahuarca. Chashna pactachishpami, ashtaca huatacunata causangui.

3Israelcuna, uyaichiyari. Lechepash, balun mishquipash ashtacapacha tiaj chai llactapi, tucui imatalla canguna rurashcapash ali llujshichunga, ali yariashpami aliguta pactachina canguichi. Cangunapaj ñaupa taitacunata Mandaj Taita Dios nishcashnallata ninanda mirashpa causangapajmi, chashna pactachina canguichi.

4Israelcuna, aliguta uyahuaichi: Ñucanchita Mandaj Taita Diosca, shujlla Mandaj Diosmi.

5Canda Mandaj Taita Diostaca, cambaj tucui shunguhuan, tucui almahuan, tucui ushaihuan juyangui.

6Cunan ñuca mandashca shimicunataca, cambaj shungupi alichiriangui.

7Cai shimicunataca, ñanda purijushpapash, huasipi cashpapash, puñungapaj sirijushpapash, jatarijushpapash, cambaj huahuacunaman cutin cutin yachachingui.

8Cai mandashcacunataca, ricuchina cachun maquipi, frentepi huataringui.

9Shinallata cambaj huasi pilarcunapipash, huasi pungucunapipash escribingui.

Diosta cazuchun aliguta yarichishca shimicunami

10Cangunapaj ñaupa taita Abrahamman, Isaacman, Jacoboman carashami nishpa juramentushca llactaman cangunata Mandaj Taita Dios pushajpica, canguna na rurashca, juyailla jatun pueblocunapimi causanguichi.

11Huasicunapash, canguna na jundachishca juyailla charishcacunahuan jundami. Yacuta tandachina jatun utujucunapash, na canguna allashcachu. Olivos quirucunapash, uvas yuracunapash, na canguna tarpushcachu. Ashtahuangarin chaicunataca, na munangacamanmi micunajunguichi.

12Ña chaiman yaicushpaca, Egipto llactapi gañan causanajushcamanda llujchimuj cangunata Mandaj Diosta ama cungangapaj cuidaringuichi.

13Ashtahuangarin cangunata Mandaj Taita Diostalla manllanguichi. Paitalla servinguichi. Paipaj shutipilla juramentunguichi.

14Shuj dioscunataca, na catinachu canguichi. Cangunapaj llacta muyundipi tiaj pueblocunapi causajcunapaj dioscunataca, na catinachu canguichi.

15Taita Diosca, paipajlla cachun munaj Diosmi. Cangunata Mandaj Taita Diosca, cangunapaj chaupipimi causajun. Cangunata Mandaj Taita Dios ninanda fiñarishpa, cai pachamanda cangunata ama tucuilla tucuchijuchunmi, chaicunataca na catina canguichi.

16Masah shuti llactapi imatapash rurachun mañashpa, cangunata Mandaj Taita Diosta fiñachishcashnaca, na fiñachinachu canguichi.

17Cangunata Mandaj Taita Dios mandashcacunata, imashna causachun yachachishcacunata, pactachinajuchun cushca shimicunataca, aliguta yariashpa pactachinguichi.

18Tucui imata can rurashcapash ali llujshichunga, Mandaj Diospaj ñaupajpica, imatapash cashcatapacha, imapash aligutalla rurangui. Cangunapaj ñaupa taitacunaman carashami nishpa, Mandaj Dios juramentushca juyailla llactaman yaicushpa, chai llactata japingapajmi, chashna causana cangui.

19Mandaj Dios imashna nishcashnallata canda fiñajcunataca, cambaj ñaupajmanda llujchishpa cachachunmi, chashna causana cangui.

20Jipa punllacunami cambaj huahuaca, cashna nishpa tapunga: ‘Imashna causanata yachachishcacunata, pactachinajuchun cushca shimicunata, imata rurachun mandashcacunata pactachinajuchun, ñucanchita Mandaj Taita Dios mandashcacunaca, ¿ima nishpata shina nijun?’ ningami.

21Cambaj huahua shina tapujpica, cashnami nina cangui: ‘Ñucanchica Egiptopimi, Faraonda servishpa causarcanchi. Chai Egipto llactamandami, Mandaj Diosca ninan ushaita charij maquihuan llujchimurca.

22Mandaj Diosca, ñucanchi ñaupajpimi Faraonmambash, paipaj huasipi causajcunamambash, imatapash rurashpa ricuchinacunata, pipash na rurai ushanalla jatun manllarinacunata rurarca.

23Ñucanchi ñaupa taitacunaman carashami nishpa juramentushca llactata ñucanchiman carangapajmi, chaimanda llujchishpa pushamurca.

24Mandaj Diosca, pactachinajuchun cushca tucui shimicunata pactachinajuchunmi mandarca. Shinallata ñucanchita Mandaj Taita Diosta manllashpa causanajuchunmi mandarca. Shina causashpaca, ñucanchi causanajuj tucui punllacuna ali richun, shinallata cunangaman causashcashnallata causashpa catichunmi, chashna mandarca.

25Shina cai tucui mandashcacunata, ñucanchita Mandaj Taita Diospaj ñaupajpi, pai ñucanchita mandashcashnallata, aligutapacha cazushpami, imatapash cashcatapacha rurashpa causashun’ ninami canguichi.