1 SAMUEL 18 - Quichua Imbabura Bible

1Saulhuan, David parlai tucuchijhuanmi cashna tucurca: Jonatanbaj shunguca, Davidpaj shunguhuan huatarishcashnami quedarca. Shinamandami Jonatanga, quiquin juyarinshnallata ninandapacha Davidta juyarca.

2Saulca, chai punllamandapachami Davidtaca, paita servishpa causachun churashpa, paipaj taitapaj huasiman tigrachunga, na ashtahuan saquirca.

3Chaipimi Jonatanga, ali cumbacuna cangapaj nishpa, Davidhuan randimanda ari ninajurca. Jonatanga, quiquin juyarinshnallata Davidta juyaimandami, chashna rurarca.

4Chai jipami Jonatanga, jahualla pai churajushcata llujchishpa, Davidman cararca. Ashtahuan shuj churajunacunatapash, paipaj espadatapash, pai macanajuna arcotapash, pai chumbilirina caratapashmi cararca.

5Davidca, Saúl maiman cachajpipash rinllami carca. Pai imata ruranapipash, aligutapacha yarishpami pactachin carca. Chaimandami Saulca, soldadocunata mandaj cachun churarca. Shinamandami Davidca, tucui gentecunapaj ricuipipash, Saulta servijcunapaj ricuipipash, ali ricurirca. Davidta, tucuicuna juyajpimi Saulca fiñarishca

6Chai filisteo runata David huañuchishca jipa paicuna tigramujpimi, cashna tucurca: Israel llactapi tiaj tucui pueblocunapi causaj huarmicunami candashpa danzashpa, jatun mandaj Saulta chasquingapaj llujshinajurca. Paicunaca panderocunahuan, cushijushpa candanahuan, shuj tocanacunahuambashmi llujshinajurca.

7Candashpa danzanajuj chai huarmicunaca, cashnami ninajurca: “Saulca, huaranga runacunatami chugrichishpa huañuchishca. Davidca, chunga huaranga runacunatami huañuchishca” ninajurcami.

8Chashna ninajujta Saúl uyashpaca, paipi nali uyarijpimi ninandapacha fiñarishpa cashna nijurca: “Davidtaca, chunga huaranga runacunata huañuchishcatami ninajun. Ashtahuangarin ñucataca, shuj huaranga runacunatalla huañuchishcatami ninajuhuan. Chashna ninajushpaca, ñallami llactata mandachun churanga” nijurcami.

9Chai punllamandapachami Saulca, Davidtaca fiñashpa ricui callarirca.

10Cayandi punllami cashna tucurca: Taita Diosmanda shuj nali ayami, Saulta japirca. Chaimandami Saulca, pai mandashpa tiajuj huasi ucupica, muspashca maitapash nirijurca. Chaimandami Davidca, caishuj punllacunashnallata paipaj maquihuan arpata tocajurca. Ashtahuangarin Saulca, paipaj maquipi lanzata chaririajmi tiajurca.

11Shina charijushpami, Saulca: “Davidpi lanzata shitashpa, pircaman yalijta cusha” yashpa, Davidpajman lanzata shitarca. Ashtahuangarin Davidca, ishcaicamanmi ladushpa yalichirca.

12Ashtahuangarin Saulca, Mandaj Dios paimanda anchurishpa, Davidhuan cajta ricushpami, paitaca manllarca.

13Chaimandami Saulca, Davidtaca paipaj ñaupajmanda caruyachun nishpa, huaranga soldadocunata mandaj cachun churarca. Shina churajpimi Davidca, gentecunapaj ñaupajpi rishpa, cutin tigramushpa purin carca.

14Davidca, tucui pai imatalla ruranacunatapash, alipacha yarishpami pactachin carca. Shinallata Mandaj Diospash, paihuanmi carca.

15Imata ruranapipash alipacha yarishpa rurajujta Saúl ricushpami, Davidtaca ashtahuan manllajurca.

16Ashtahuangarin tucui israelcunapash, Judá llactapi causajcunapashmi, Davidtaca juyan carca. Paica, paicunapaj ñaupajpi rishpa cutin tigramushpami purin carca.

17Chaimandami Saulca, Davidtaca cashna nirca: —Ricui, Merab shuti ñuca paya ushitaca, cambaj huarmi cachunmi cugrini. Can paihuan cazarangapaj munashpaca, Mandaj Diosmandaca shinllipacha macanajungui— nircami. Saulca cashnami yajurca: “Davidtaca, ñuca maquihuanga na huañuchishachu, ashtahuangarin filisteocunapaj maquipimi huañunga” yashpami, chashna nijurca.

18Shina nijpimi Davidca, Saultaca cashna nirca: —Jatun mandajpaj masha tucungapaca, ¿ñucaca pita cani? ¿Na cashpaca, ñuca causaipash, ñuca taitapaj familiapash, Israel purapica imata capan?— nircami.

19Ashtahuangarin Saulpaj ushi Merab shuti cuitsata, Davidhuan cazarachina punlla pactajpica, Davidhuanga na cazarachircachu. Ashtahuangarin Mehola shuti pueblopi causajuj Adriel shuti runahuanmi cazarachirca.

20Shina cajpipash Saulpaj jipa ushi Micalmi, Davidtaca ninanda juyan carca. Chaita Saulman parlajpimi, shina cashpaca alimi yajurca.

21Chaimandami Saulca, cashna yajurca: “Cunangarimbash lazupi urmachingapaca, cazarachishallami. Paitaca, filisteocunami paicunapaj maquihuan huañuchinajunga” yajurcami. Chaimandami cutinllata Saulca, Davidtaca: —Cunan punllami, ñuca masha tucugringui— nirca.

22Saulca, paita servijcunatami, cashna nigrichun yachachirca: —Davidhuan cashna nishpa pacalla parlagrichi: ‘Ricui, jatun mandajpash candaca juyanmi, tucuilla paita servijcunapashmi candaca ninanda juyan. Jatun mandajpaj masha tucuillayari’ nigrichi— nircami.

23Saulta servijcunaca, cai shimicunatami Davidman parlagrirca. Chaita parlajpimi Davidca, cashna nirca: —¿Jatun mandajpaj masha tucunaca, imapash na canllu yashpachu shamunguichi? Ñucaca, imagutapash na charij, pipash na alicachijpi causajuj runagumari cani— nircami.

24Shina nijpimi, Saulta servijcunaca: “Davidca, cai shimicunatami nirca” nishpa, Saulman villanajurca.

25Shina villajpimi Saulca, cashna nijurca: —Davidtaca cashna nichi: ‘Jatun mandajca, shuj huarmimanda imatalla cuna cajtaca, na mañajunllu. Ashtahuangarin jatun mandajta fiñajcuna llaquichishcamanda, chashnallata llaquichingapaca, patsaj filisteocunata huañuchishpa, paicuna charishca asha aicha carata fitishpa apamuchunmi mañan’ nigrichi— nijurcami. Ashtahuangarin Saulca, Davidtaca filisteocuna huañuchinajuchun yashpami, chashna nijurca.

26Saulta servijcuna Davidman villashca shimicunaca, Davidpica alimi uyarirca. Chaimandami, jatun mandajpaj masha tucusha yajurca. Saúl mandashca punlla nara pactajpillatami,

27Davidca, paipaj soldadocunata pushashpa rirca. Shina rishpami Davidca, ishcai patsaj filisteocunata huañuchishpa, paicuna charishca asha aicha carata fitishpa apamurca. Chaicunataca, tucuillatami jatun mandajman curca. Davidca, jatun mandajpaj masha tucungapajmi, tucuita pactachirca. Chaimandami Saulca, paipaj ushi Micalhuan cazarachirca.

28Ashtahuangarin Saulca, Mandaj Diosca Davidhuan cajtapash, paipaj ushi Micalpash ninanda juyajtami ricurca.

29Shinamandami Davidtaca, ashtahuan manllarca. Saulca, tucui paipaj causaipimi Davidtaca fiñarca.

30Filisteocunata mandajcunami, macanajungapaj llujshimurca. Ima horas chashna llujshimujpipash, Saulta tucui servijcunamanda ashtahuan yalica, Davidmi ashtahuan mishan carca. Chaimandami paitaca, tucuicuna ashtahuan alicachinajurca. Saulca, Davidta huañuchingapajmi yarijushca