1 CRÓNICAS 14 - Quichua Imbabura Bible

Hiram shuti runaca, paipaj randi parlajcunatami, Davidpajman cachashca(2 Sam. 5:11-12)

1Tiro shuti pueblota jatun mandaj Hiram shuti runaca, paipaj randi parlajcunatami, Davidpajman cachamurca. Shinallata Davidpaj huasita shayachinajuchumbash, cedro caspicunatami cachamurca. Pircanata yachaj runacunatapash, carpinterocunatapashmi cachamurca.

2Chaita ricushpami, israelcunata jatun mandaj cachunga, Mandaj Diosllata shinllitapacha churashcata Davidca yacharca. Shinallata Dios agllashca israelcunata mandajushcata jatunyachishcatapashmi yacharca.

Jerusalenbi David charishca churicunatami villajun(2 Sam. 5:13-16; 1 Crón. 3:5-9)

3Davidca, Jerusalenbipashmi shuj huarmicunahuan cazararcara. Chai huarmicunahuanmi, Davidca ashtahuan churicunata, ushicunatapash charircarami.

4Jerusalenbi pai charishca churicunapaj shuticunaca, caicunami: Samúa, Sobab, Natán, Salomón,

5Ibhar, Elisúa, Elpelet,

6Noga, Nefeg, Jafía,

7Elisama, Eliada, Elifelet shuticunami carca.

Filisteocunatami, Davidca mishashca(2 Sam. 5:17-25)

8Davidtaca, tucui israelcunata jatun mandaj cachun, aceiteta talishpa javishcata filisteocuna yachashpami, tucuilla filisteocuna Davidta mascangapaj vichai shamunajurca. Chashna shamunajujta yachashpami, Davidca paicunahuan macanajungapaj llujshirca.

9Filisteocuna chayamushpaca, Refaim shuti pugru pamba jundami shuyanajurca.

10Chaimandami Davidca, cashna nishpa Taita Diosta tapurca:

—¿Filisteocunahuan macanajungapaj, vichai rinallachu cani? ¿Paicunataca, ñuca maquipi churapanguichu imashi?— nircami.

Shina nishpa tapujpimi Mandaj Diosca, cashna nirca:

—Paicunahuan macanajungapaj vichai rilla. Paicunataca, cambaj maquipi churagrinimi— nircami.

11Shina nijpimi Davidca, Baal-perazim shuti pambaman vichai rishpa, filisteocunahuan chaipi macanajushpa misharca. Chai jipami Davidca, cashna nirca: “Taita Diosca jatun yacuta cacharishpa, tucuilla t'uninshnami ñucata fiñajcunataca mishachihuan” nircami. Chaimandami chai pambataca, Baal-perazim shutita shutichirca.

12Chashna mishajpimi filisteocunaca, paicunapaj dioscunatapash saquishpa rishca carca. Chai dioscunata rupachinajuchunmi, Davidca mandarca.

13Shina cajpipash filisteocunaca, cutin tigramushpami, chai pugru pambaman jundamunajurca.

14Chaimandami Davidca, Taita Diosta cutin tapujpi, Taita Diosca cashna nirca:

—Paicunapaj huashataca, ama vichai catinguichu. Ashtahuangarin muyundi shayarishpa, bálsamo quiru chaupicunata yaicushpa japingui.

15Chai bálsamo quiru fanga pundacuna tsal nij uyarijpica, macanajungapaj llujshinguilla. Chai filisteo soldadocunataca, Taita Dios ñuca ñaupashpa rishpami, chugrichishpa huañuchisha— nircami.

16Shina nijpimi Davidca, Taita Dios mandashcashnallata rurarca. Chaimandami filisteo soldadocunataca, Gabaón shuti pueblomandaca, Gezer shuti pueblocaman catishpa misharca.

17David chashna mishashcataca, tucui llactacunapi causajcunami yachanajurca. Mandaj Diosca, tucui shuj llactacunapi causajcunamambashmi, Davidta manllana yuyaita churarca.