2 REYES 17 - Quichua Imbabura Bible

Samaria pueblopi causajcunata mishashpami, israelcunata prezu apashca

1Judá llactata jatun mandaj Acaz shuti runaca, chunga ishcai huatata ña mandajujpimi, Ela shuti runapaj churi Oseas runaca, Israel llactata mandai callarirca. Paica, iscun huatatami Samaria pueblopi mandajurca.

2Paica, Mandaj Diospaj ñaupajpica, nalitami rurashpa causajurca. Chashna rurashpapash, Israel llactata paipaj punda jatun mandajcuna rurashcashnaca, na rurajurcachu.

3Asiria llactata jatun mandaj Salmanasar shuti runaca, macanajungapaj vichai rishpami, Oseas runataca paita servij cachun japirca. Shinamandami Oseas runaca, impuestota cushpa causajurca.

4Ashtahuangarin Asiria llactata jatun mandajca, shujcunahuan pacalla Oseas runa parlarijujtami yacharca. Oseas runaca, Egipto llactata jatun mandaj So shuti runapajmanmi, paipaj randi parlajcunata cachashca carca. Shinallata Asiria llactata jatun mandajman, huatapi huatapi impuestota cujushcatapash, na ashtahuan cujurcachu. Chaimandami jatun mandajca, paitaca prezurca.

5Asiria llactata jatun mandajca, tucui llactaman yaicushpami, Samaria pueblota chaupipi churashpa, quimsa huatacaman chaipi causajurca.

6Iscun huatata Oseas runa ña mandajujpimi, Asiria llactata jatun mandajca, Samaria pueblota quichushpa israelcunatapash, Asiria llactaman prezu aparca. Chashna apashpami, Gozán shuti yacu ladollapi tiaj Halah shuti, Habor shuti pueblocunapi, Media shuti llactapi tiaj pueblocunapi causanajuchun churarca.

7Israelcunaca juchata rurashpami, Egipto llactamanda llujchimuj paicunata Mandaj Taita Diostaca fiñachirca. Egipto llactata jatun mandaj Faraonbaj maquimanda llujchimuj Diosta cungashpami, shuj dioscunatara manllanajurca.

8Israelcunapaj ñaupajmanda, Mandaj Dios llujchishpa cachashca gentecuna pactachinajuchun cushca shimicunatami rurashpa catinajurca. Israel llactata paicunapaj punda jatun mandajcuna pactachinajuchun cushca shimicunapi nishcatami catinajurca.

9Israelcunaca, ima nalicunatapash pacalla rurashpami, paicunata Mandaj Taita Diosta fiñachinajurca. Paicunapaj tucui pueblocunapi tiaj lomacunapimi, altarcunata ruranajurca. Chapashpa shayana torrecunamandaca, pircahuan muyundi jarcashca pueblocunacamanmi altarcunata ruranajurca.

10Shinallata tucui loma jahuacunapi fanga junda tucui quiru ucucunapimi, rurashcalla dioscunatapash, Asera shuti huarmi diosman rijchajcunatapash shayachinajurca.

11Tucuilla chai altarcunapimi, inciensota cushnichinajurca. Paicunapaj ñaupajmanda Mandaj Dios llujchishpa cachashca gentecunashnallatami ruranajurca. Chashna ninan nalicunatapacha rurashpami, Mandaj Diostaca ninanda fiñachinajurca.

12Mandaj Diosca israelcunataca: “Cangunaca, na chashna ruranachu canguichi” nishpami mandashca carca. Paicunaca, yanga dioscunatami servinajurca.

13Chaimandami, Mandaj Diosca israelcunatapash, Judá llactapi causajcunatapash, paimanda tucui villajcunahuan imatalla pai ricuchishcata tucui villajcunahuan, cashna nishpa shinllita tacurirca: “Canguna nalita rurashpa causanajushcata saquishpa, ñuca mandashcacunata, ñuca yachachishcacunata cazushpa causaichi. Chaicunataca, cangunapaj ñaupa taitacunaman ñuca imashna mandashcashnallata, tucuita cazushpa causaichi. Chaicunataca, ñucata servij ñucamanda villajcunahuanmi villachun cachamurcani” nircami.

14Ashtahuangarin paicunaca, paicunapaj ñaupa taitacuna ninan shinlli shungu tucushcashnallatami, paicunapash ninan shinllicuna tucushpa na cazunajurca. Chai taitacunaca, paicunata Mandaj Taita Diostaca na crircachu.

15Chaimandami pactachinajuchun pai cushca shimicunatapash, paicunapaj ñaupa taitacunahuan ari nishcatapash, imashna causanata yachachishcacunatapash cazuchun pai mandashcataca, yangapi churanajurca. Paicunaca, imapash yangacunatara catishpami, paicunapash yangacuna tucunajurca. Paicunapaj llacta muyundipi causajcuna rurashcatami catinajurca. Mandaj Diosca: “Chai gentecuna rurashcashnaca, na ruranachu canguichi” nishpami mandashca carca.

16Paicunata Mandaj Taita Dios mandashcacunataca tucuita saquishpami, orota yacuyachishpa, ishcai shicu dioscunata rurarca. Shinallata Asera shuti huarmi diosman rijchajta rurashpami, jahua pachapi tiaj tucui luzerocunatapash, Baal shuti rurashcalla diostapash servinajurca.

17Chai dioscunaman carashpami, paicunapaj churicunatapash, ushicunatapash ninapi rupachinajurca. Shinallata yachajcunapash, brujocunapashmi tucunajurca. Mandaj Diospaj ñaupajpica, nalitalla rurashpa causanajushpami, Diostaca ninandapacha fiñachinajurca.

18Chaimandami Mandaj Diosca, israelcunahuanga ninandapacha fiñarishpa paicunataca, paipaj ñaupajmanda llujchishpa cacharca. Chashna cachajpimi, Judá aillu runacunalla quedarca.

19Ashtahuangarin Judá aillupash, paicunata Mandaj Taita Dios mandashcacunataca, na cazurcachu. Ashtahuangarin pactachinajuchun israelcuna cushca shimicunapi nishcatallami rurashpa catinajurca.

20Chaimandami Mandaj Diosca, israelcunapaj tucui miraicunata jichushpa saquirca. Shinallata imatapash quichujcunapaj maquipi churashpami, paipaj ñaupajmanda llujchishpa cachangacaman llaquichijurca.

21Israelcunataca, Davidpaj huasi ucu puramanda shicanyachishpami anchuchirca. Chaimandami paicunaca, Nabat shuti runapaj churi Jeroboam runata, jatun mandaj cachun churarca. Jeroboam runami israelcunataca, Mandaj Diosta catinamanda shicanyachishpa ninandapacha juchata rurachirca.

22Chaimandami israelcunaca Jeroboam, tucui juchacunata rurashcata na saquishpa, chaitallata rurashpa catinajurca.

23Chashna nalita rurashcamandami Mandaj Diosca, israelcunataca paipaj ñaupajmanda llujchishpa cacharca. Pai ima nishcata villashpa paita servijcunahuan villachishcashnallatami, chashna rurarca. Israelcunaca, paicunapaj llactamanda Asiria llactaman prezu apajpimi, cunangaman chaipi causanajun.

Samaria pueblopica, Asiria llactamanda gentecunami causanajushca

24Asiria llactata jatun mandajca, Babilonia, Cuta, Ava, Amad, Sefarvaim shuti pueblocunamanda gentecunata apamushpami, Samaria llacta pueblocunapi israelcunapaj randi causanajuchun churarca. Samaria llactata japishpami, chaipi tiaj pueblocunapi causanajurca.

25Paicuna chaipi causai callarijpimi, cashna tucurca: Paicunaca, Mandaj Diosta na manllarcachu. Chaimandami Mandaj Diosca, paicunata huañuchinajuchun leongunata cachamurca.

26Chaitami, Asiria llactata jatun mandajman cashna villanajurca: “Samaria llacta pueblocunapi causachun caimanda cachashpa can churashca gentecunaca, chai llactapaj Taita Dios mandashcataca na yachanllu. Chaimandami paica, paicunapaj chaupipica leongunata cachamushca. Ricui, chai leongunami, paicunataca huañuchinajun. Chai llactapaj Taita Dios mandashcacunata na yachashcamandami, chashna rurajun” nishpami villanajurca.

27Chashna villajpimi, Asiria llactata jatun mandajca, cashna nishpa mandarca: “Chai llactapaj Dios mandashcata yachachinajuchunga, chai llactamandallata apamushca huaquin curacunata, chaipi causachun churaichi” nircami.

28Chaimandami, Samaria llactamanda prezu apai tucushca shuj cura shamushpa, Bet-el shuti pueblopi causajurca. Paimi, Mandaj Diosta imashna manllashpa causanata yachachijurca.

29Chashna yachachijujpipash, tucui llactacunamanda shamuj gentecunami, paicunapaj quiquin dioscunata ruranajurca. Chai dioscunatami, Samaria pueblopi causajcuna, lomacunapi rurashca huasicunapi churanajurca. Tucui llactacunamanda maijanlla pueblocunapi causanajushpapash, chai pueblocunapillatami churanajurca.

30Babilonia pueblopi causajcunaca, Sucot-benot shuti diosta, Cuta shuti pueblopi causajcunaca, Nergal shuti diosta, Hamat shuti pueblopi causajcunaca, Asima shuti diostami ruranajurca.

31Aveocunaca, Nibhaz shuti, Tartac shuti dioscunatami ruranajurca. Sefarvaim shuti pueblopi causajcunaca, Adramelec shuti, Anamelec shuti dioscunata ninanda alicachingapajmi, paicunapaj churicunata carashpa, ninapi rupachinajurca. Chai dioscunaca, Sefarvaim shuti gentecunapaj dioscunami carca.

32Paicunaca, Mandaj Diosta manllashpapash, pai puramandallata agllashpami, lomacunapi tianajuj altarcunapi curacuna cachun churanajurca. Chai curacunami, lomacunapi tiaj huasi altarcunapi animalcunata carashpa huañuchinajurca.

33Chai gentecunaca, Mandaj Diosta manllashpapash, paicunapaj dioscunatami alicachishpa causanajurca. Paicunata apamushca llactapi imashna rurashpa causashcashnallatami ruranajurca.

34Paicunaca cunangamanmi, pundashnallata rurashpa causanajun. Mandaj Diostapash na manllashpami, pactachinajuchun pai cushcacunatapash, mandashcacunatapash na cazunajun. Jacobopaj miraicunaman Mandaj Dios mandashpa cushcataca, mandashca shimicunapi, mandashcacunapi nijunshnallataca na pactachinajurcachu. Chai Jacobotami, Israel shutita shutichirca.

35Mandaj Diosca, chai miraicunahuan ari ninajushpami, cashna mandashca carca: “Shuj dioscunataca, na manllanachu canguichi. Paicunataca, na alicachinachu canguichi, na servinachu canguichi. Animalcunatapash, na cushpa huañuchinachu canguichi.

36Ashtahuangarin ninan ushaihuan ñuca rigrata chutashpa, Egipto llactamanda llujchimuj, Mandaj Dios ñucatami manllana canguichi. Ñucatami alicachina canguichi. Ñucamanmi, animalcunata cushpa huañuchina canguichi.

37Pactachinajuchun ñuca cushca shimicunata, ali causachun yachachishcacunata, mandashca shimicunata, escribichishpa mandashcacunataca aliguta yariashpami pactachina canguichi. Shuj dioscunataca, na manllanachu canguichi.

38Cangunahuan ñuca ari nishcataca, na cunganachu canguichi. Shuj dioscunataca, na manllanachu canguichi.

39Ashtahuangarin cangunata Mandaj Taita Dios ñucatami, manllana canguichi. Ñucami, cangunata tucui fiñajcunapaj maquimandaca quishpichisha” nishcami carca.

40Shina cajpipash, paicunaca na uyanayachircachu. Ashtahuangarin punda paicuna imata rurashpa causashcashnallatami ruranajurca.

41Chashnami chai gentecunaca, Mandaj Diosta manllashpapash, paicunapaj yanga dioscunatapash servishpa causanajurca. Paicunapaj churicunapash, nietocunapash paicunapaj taitacuna rurashpa causashcashnallatami, cunangaman chashnallata ruranajun.