1Ezequiel, canga jatarishpa, Israel llactata mandajcunamanda yarishpa yarishpa huacayari.
2Cashna nishpa huacangui: ‘¡Cambaj mama leonga, leongunapaj chaupipica imashnata sirirircayari! Paipaj huahua leongunatapash, maltun leongunahuanmi viñachirca.
3Paipaj huahua leongunamanda shujta vichai apamushpaca, jatunyangacamanmi viñachirca. Paica, shuj animalcunata japinatapash, runacunata huañuchishpa micunatapashmi yachajurca.
4Shuj llactacunapi causajcunaca, pai imashna cajtami uyarca. Shina uyashpami, paicunapaj tugllapi japishpa, grillocunata churachishpa, Egipto llactaman apanajurca.
5Paipaj mamaca, unai huatacunata shuyajushpallata, na cutinga tigramungachu yashpami, paipaj shuj huahua leonda japishpa, millai maltun leonshna cachun chaipi churarca.
6Paica, jatun leongunapaj chaupipi purijushpallatami, millai león tucurca. Shuj animalcunatapash japinata yachajushpami, runacunatapash huañuchishpa micurca.
7Muyundi shinlli torrecunatapash urmachishpami, pueblocunatapash llaquinayaita tucuchirca. Chaimandami chai llactaca, jichushca, llaquinayaita tucuchi tucurca. Chaipi imalla tiajcunatapashmi tucuchirca. Pai huacashcapash, culun nishcashnami uyarirca.
8Muyundi llactacunapi causajcuna llaquichingapaj jatarishpami, paitaca linllita shitashpa, utujupi japinajurca.
9Cadenacunahuan huatashpami, jaulapi churashpa, Babilonia llactata jatun mandajpajman apanajurca. Israel llactapi tiaj urcucunapi pai huacashca ama ashtahuan uyarichunmi, shinlli torrecunahuan rurashca huasicunapi vichashpa saquinajurca.
10Cambaj mamaca, uvas chagra chaupipica yacu manñapi tarpushca ashtahuan ali uvas yurashnami ricurirca. Paica, ashtaca yacu manñapi tarpushca cashpami, ali granota fucushpa, ali yura malquicunatapash charirca.
11Paica, jatun mandajcuna mandana shinlli varatami charirca. Chai yurapaj ñavica, malquicunatapash yali jatundami viñarca. Paica, jatun cashcamandami, ashtaca yura malquicunata charishcapash, ricunalla carca.
12Ashtahuangarin ninanda fiñarishpami, fitishpa alpapi shitarca. Rupajlla huaira shamushpami, paipi fucushca granocunatapash chaquichirca. Paipaj shinlli yura malquicunapash, faquirishpami chaquirca. Ninami, tucuillata rupachirca.
13Cunanga, yacupash illaj, chaquishca alpapimi tarpushca.
14Shinallata chai yurapaj malqui varamandallatami, nina llujshishpa, paipi fucushca granocunatapash rupachirca. Chai yurapica, jatun mandaj mandana, shinlli varapash na quedarcachu’ nishpa huacangui” nihuarcami.
Cai shimicunaca, yarishpa yarishpa huacashca shimicunami. Shinallata yarishpa yarishpa huacangapajmi canga.
Who We AreWhat We EelieveWhat We Do
2025 by iamachristian.org,Inc All rights reserved.
