1Taita Dioslla, imashnami tarugaca
ninanda rijuj yacu manñapi huacashpa purijun,
chashnallatami ñuca almapash candaca caparijun.
2Ñuca almaca, ninanda yacunayachinshnami,
Taita Diostaca mascan, causajuj Taita Diostami mascan.
¿Ima horata Taita Diospaj ñaupajpi
ricuringapaj shamushayari?
3Punllapash, tutapash viquitallami micunshna causajurcani.
Tucui punllacunami: “¿Cambaj Taita Diosca,
maipitayari?” ninajuhuan.
4Ñucaca, caicunatami yarishpa, tucui
almahuan ninanda llaquirini.
Ashtaca gentecunata pushashpami,
Diospaj huasiman chayajun carcani.
Ninan cushijuihuan alicachishpa caparinajujcunapaj
chaupipimi, fiestata ruraj gentecunahuan rijun carcani.
5Ñuca almalla, ¿imashpata shaijushpa
ñuca shungupash musparijunguiyari?
Taita Diostalla shuyai.
Paitaca alicachisharami, ñucata
quishpichij, ñuca Taita Diosmi.
6Ñuca Taita Dioslla, ñuca almaca
ninanda shaijushcamari.
Chaimandami candaca, Jordán yacu lado
llactamanda, hermonita nishcacuna causanajuj
llactamanda, Mizar urcumanda yarijusha.
7Cambaj fajcha yacucuna huacanajujpimi,
manllanayai ucu ucu yacucunaca,
caishuj yacucunata cayajun.
Cambaj tucui yacucuna jahuata jatarijujca,
ñuca jahuatami yalinajun.
8Ashtahuangarin punllapica, pai llaquij
cajtami Mandaj Diosca ricuchinga.
Tutaca, canman candanami ñucahuan canga.
Ñucaman causaita cuj Taita Diosta
mañanapashmi, ñucahuan canga.
9Taita Diostaca, cashnami nisha:
“Jatun Rumishna ñuca Dioslla,
¿imashpata ñucata cungahuangui?
¿Imashpata ñucata fiñaj runa
llaquichishcamandaca, ninanda
llaquirishpa purijusha?” nishami.
10Ñuca tullucunata maijambash chugrichinshnami,
ñucata na ricunayachij runacunaca:
“¿Cambaj Taita Diosca maipitayari?”
nishpa, punllandi rimashpa pingaichinajuhuan.
11Ñuca almalla, ¿imashpata shaijushpa,
ñuca shungupipash musparijunguiyari?
Taita Diostalla shuyayari.
Paitaca alicachisharami, ñucata
quishpichij, ñuca Taita Diosmi.
Who We AreWhat We EelieveWhat We Do
2025 by iamachristian.org,Inc All rights reserved.
