EZEQUIEL 28 - Quichua Imbabura Bible

1Mandaj Diosca cai shimicunatami, cashna nishpa villahuarca:

2“Huañuna aichayu runa. Tiro shuti pueblota mandajtaca, cashna ni: Mandaj Jatun Diosca, cashnami nin: ‘Canga, cambaj shungupi jariyashpami: Ñucaca diosmi cani. Chaimandami, Taita Dios tiarinapi tiarishpa, mama cucha chaupipi tiajuni nirijurcangui. (Canga runallami cangui, napacha Taita Dios canguichu). Canga, cambaj shungupica, Taita Diosmi cani yajurcanguimi.

3Ricui canga, Danieltapash yali alipacha yachajushcami cangui. Cambaca, imapash na yachai ushanalla, ima pacallapash na tianllu.

4Can alipacha yachajushcahuan, aligutapacha yarishpa purishcahuanmi, ninan charij tucurcangui. Shinallata orotapash, culquitapash ashtacatami mirachircangui.

5Jatungapaj, randingapaj ari nijunatapash alipacha yachashpami, ima charinacunatapash ashtacata mirachircangui. Canga, chashna ninan charij tucushpami, cambaj shungupica jariyarcangui’ ni” nishpami villahuarca.

6Shinamandami Mandaj Jatun Diosca, candaca cashnatapash nin: “Canga, cambaj shungupica, Taita Diosmi cani yajurcanguimi.

7Ricui, shinamandami shuj llactacunamanda ninan shinlli runacunata cambajman cachamusha. Paicunami, espadata alichinamanda espadata llujchishpa, can juyailla alipacha yachajushcataca tucuchinga. Shinami, can punchapamba cajtaca mapayachinga.

8Candaca, huañushcata pambana utujumanmi urai cachanajunga. Cambash, mama cucha chaupipi huañujcunashnallatami huañungui.

9Canga, canda huañuchijujpaj ñaupajpica: ‘¿Ñucaca, Taita Diosmari cani’ ninguimanllu? Canda huañuchijpaj maquipica, huañuna aichayu runallami cangui. Canga, na Taita Dios canguichu.

10Circuncisión nishcata na rurashcacunashnami, shuj llacta runacunapaj maquipi huañungui. Cai shimicunataca, ñucami cashna nini” ninmi Mandaj Jatun Diosca.

11Mandaj Diosca, cai shimicunatami cashna nishpa villahuarca:

12“Huañuna aichayu runa. Tiro shuti pueblota jatun mandajmandaca, cashna nishpa yarishpa yarishpa huacangui: Mandaj Jatun Diosca, cashnami nin: ‘Canga, ima pandatapash na rurajta ricuchij selloshnami carcangui. Alipacha yachajushcapash, juyaillaguta rurashpa tucuchishcapashmi carcangui.

13Canga, Taita Diospaj Edén shuti huertapishnami causarcangui. Cambaj churajunapash, juyailla tucui rumicunahuan rurashcami carca: Cornerina, topacio, jaspe, crisólito, berilo, ónice, zafiro, carbunclo, esmeralda nishca rumicunahuan, orohuambashmi rurashca carca. Canda rurai punllapica, tamborcunata, gaitacunata tocanata ali yachajcunatapash, ñami alichishcalla carca.

14Canga, imatapash jarcaj jatun querubín nishcami carcangui. Chaimandami candaca, Taita Dios ñucapajlla urcupi churarcani. Canga, chaipimi carcangui. Nina rupajuj rumi chaupicunapimi purijurcangui.

15Canda rurashca punllamandapacha, jatun nalita rurashcata cambi ñuca taringacamanga, ima pandatapash na rurashpami causarcangui.

16Jatushpa randingapaj caipi chaipi ninandapacha ari nijushpami, jatun nalita rurarcangui. Chashna rurashpami, juchata rurarcangui. Cuidaj querubinlla, shinamandami candaca, Taita Dios ñucapajlla urcumandapash, nina rupajuj rumi chaupicunamandapash shitarcani.

17Canga, juyaillagupacha cashpami cambaj shungu ucupica, jatun tucurcangui. Punchapambagu cashpami, ali yachaitapash naliman tigrachircangui. Chaimandami candaca, alpaman shitasha. Can imashna tucushcata ricunajuchunmi, jatun mandajcunapaj ñaupajpi churasha.

18Jatun nalicunata ninanda rurashpa, jatushpa randingapaj ari ninajushpa nalita rurashpami, cambaj diospaj huasitaca yangapi churarcangui. Chaimandami, cambaj chaupipica ninata japichircani. Chai ninami, candaca tucuchirca. Cai pachapica, tucuicuna ricujtami candaca uchufatalla saquircani.

19Chaimandami, canda tucui rijsij gentecunaca, canmanda manllarinajunga. Canga, jatun manllarinami tucungui. Causaita causaicamanmi illangui’ nishpa huacangui” nihuarcami.

Sidón shuti pueblota llaquichinatami villashca

20Mandaj Diosca cai shimicunatami, cashna nishpa villahuarca:

21“Huañuna aichayu runa. Sidón shuti pueblo ladoman ricushpa, chai pueblota llaquichinata villai.

22Paitaca cashna ningui: Mandaj Jatun Diosca, cashnami nin: ‘Ricui, Sidón shuti pueblolla. Ñucami, canhuanga fiñarishca cani. Ñucaca, cambaj chaupipimi jatunyachi tucusha. Ñuca chaipi llaquichishpa, jucha illaj cajta ricuchijpimi ñucataca, Mandaj Dios cajta yachanajunga.

23Jatun ung:uicunatami, paipajman cachasha. Ñangunapipash, yahuartami jichasha. Chai pueblo chaupipillatami, huañushcacunapash urmanajunga. Paitaca, tucui ladomandami espadahuan llaquichingapaj shamunajunga. Shina rurajta ricushpami ñucataca, Mandaj Dios cajta yachanajunga.

24Israelcunapaca, paicunapaj muyundipi causanajuj paicunata fiñajcunaca, na ashtahuan casha aspinshna, auja tujsishpa nanachinshna cangachu. Chaimandami ñucataca, Mandaj Dios cajta yachanajunga’ ninmi ningui” nihuarcami.

25Mandaj Jatun Diosca, cashnatapashmi nirca: “Shuj gentecunapaj chaupicunapi, caipi chaipi causanajuj israelcunata tandachimushpmi, chai llactacunapi causajcunapaj ñavipica, jucha illaj ricurisha. Israelcunaca, paicunapaj llactapimi causanajunga. Chai llactataca, ñucata servij Jacobomanmi cararcani.

26Chai llactapimi imatapash na manllashpa causanajunga. Chaipica, huasicunata shayachishpa, uvas yuracunata tarpushpami, aliguta cungashca causanajunga. Paicunapaj muyundipi causanajuj, paicuna imatalla charishcacunata quichushpa apaj runacunata ñuca llaquichijpimi, chashna causanajunga. Chaita ricushpami ñucataca, paicunata Mandaj Taita Dios cajta yachanajunga” nircami.