2 CRÓNICAS 5 - Quichua Imbabura Bible

1Salomonga, Mandaj Diospaj huasipi tucui imatalla ruranata tucuchishca jipami, paipaj taita David tucui imatalla Diosman shicanyachishcata Diospaj huasi ucupi churarca. Shinallata culquita, orota imatalla charishcacunataca, Taita Diospaj huasipi ninan valishcacunata alichina ucupimi churarca.

Salomonmi, Diospaj arcataca, Diospaj huasiman apashca(1 Rey. 8:1-11)

2Shinamandami Salomonga, israelcunata mandaj rucucunata, Israel aillucunata tucui mandajcunata, Israel familiacunata mandajcunataca, Jerusalenman tandachirca. Paicunataca, Mandaj Dioshuan ari ninajushpa escribishcata alichishca arcata, Davidpaj Sion shuti pueblomanda apamuchunmi, chashna tandachirca.

3Jatun mandaj Salomonhuanga, huatapaj canchis quillapimi, jatun fiestata rurangapaj tucuilla Israel runacuna tandanajurca.

4Israelcunata mandaj rucucuna tucuilla shamujpimi levitacunaca, Diospaj arcata japinajurca.

5Chai arcatapash, Dioshuan tuparina jatun carpatapash, Diospajta rurangapaj chai carpapi tucui imalla tiashcacunatapashmi, Diospaj huasimandaca apamunajurca. Chaicunataca curacuna, levitacunami apamunajurca.

6Chaipica, jatun mandaj Salomonbash, paihuan tandanajushca tucuilla israelcunapashmi, chai arca ñaupajpi tandanajurca. Paicunaca llamacunata, huagracunatami, Diosman cushpa huañuchinajurca. Chai animalcunaca, ashtacapacha cajpimi, maitapash na cuentai ushanalla carca.

7Chai jipami curacunaca, Mandaj Dioshuan ari ninajushpa escribishcata alichishca arcataca, maipi alichina pushtumanllata apamunajurca. Chai arcataca, Diospaj huasipillata, Diospajlla shicanyachishca ucuman apamushpami, querubín nishcacunapaj alas ucupi churanajurca.

8Chai querubingunaca, chai arca jahuata alascunata chutashcami carca. Chaimandami Diospaj arcatapash, arcata huanduna caspicunatapash, paicunapaj alascunahuan jahualla quilpashca carca.

9Chai huanduna caspicuna jatun cashcamandami, chai caspi umacunataca, Diospajlla shicanyachishca ucu ñaupajmandaca ricunalla carca. Shina cashpapash canllamandaca, na ricunallachu carca. Chaica, cunangamanmi chashnallata tianajun.

10Chai arcapica, Horeb shuti urcupi cashpa, Moisés churashca ishcai tabla rumicunallami tianajurca. Egiptomanda llujshishpa shamunajujpi, Mandaj Dios israelcunahuan ari ninajushcatami, chai rumicunapica escribishca carca.

11Curacunaca, Diospajlla huasimandaca ñami llujshinajurca. (Chai tucuilla curacunami, Diospajlla cangapaj alichirishcacuna carca. Ashtahuangarin chaipi servingapaj huashan huashan shamuna cashcashnaca, nara ruranajurcachu.

12Shinallata Asaf, Hemán, Jedutún shuti runacuna mandajpi candanajuj tucui levitacunapash, paicunapaj churicunapash, huauquicunapash caishuj levitacunandimi, altar ñaupajpi ashtahuan ali lino churajunacunata churajushca shayanajurca. Paicunaca platillota, salteriota, arpata tocashpami candanajun carca. Patsaj ishcai chunga curacunapashmi, paicunahuan trompetata huacachinajurca).

13Trompetata huacachij uyarijpica, tucuicunami Mandaj Diosta pashi nishpa alicachishpa, shujllashnalla candanajurca. Trompetata, platillota, shuj tocanacunatapash, ashtahuan shinllita huacachishpami, cashna nishpa Mandaj Diostaca shinllita candashpa alicachinajurca: “Paica aligumari. Pai llaquinaca, causaita causaicamanmi” ninajurcami. Shina candanajujpimi, Mandaj Diospaj huasipica fuyu jundarca.

14Fuyu chaipi jundajpimi curacunaca, Diospajta rurangapaj chai ucupi quedaitaca na ushanajurca. Taita Diospaj huasipica, Mandaj Diospaj punchapambagumi jundashca carca.