2 CRÓNICAS 19 - Quichua Imbabura Bible

Dios ima nishcata villaj Jehú shuti runaca, Josafat shuti runatami shinllita tacurishca

1Judá llactata jatun mandaj Josafat shuti runaca, imapash na tucushpa aligutami, Jerusalenbi tiaj paipaj huasiman tigrarca.

2Paitaca, Dios ricuchishcata villaj Jehú shuti runagumi tuparingapaj llujshirca. Jehú shuti runaca, Hanani shuti runapaj churimi carca. Paimi, jatun mandaj Josafat runataca, cashna nijurca: “Canga, ¿Diosta na manllaj runatachu ayudangui? ¿Mandaj Diosta millanayachij runacunatachu juyangui? Shinamandami, Mandaj Dios ninandapacha fiñarishcapash, paipaj ñaupajmanda cambajman shamushca.

3Shina cajpipash cai llactapi tiaj Asera shuti huarmi diosman rijchajcunata anchuchishpa, cambaj tucui shunguhuan, Taita Diosta mascashcatami, can alita rurashcataca tarishca” nijurcami.

Josafat shuti runaca, juezcunatami churashca

4Josafat shuti runaca, Jerusalenbimi causajurca. Shina cashpapash Beerseba shuti pueblomandapacha, Efraín urcucamanmi ricushpa purin carca. Shina purijushpami, paicunapaj ñaupa taitacunata Mandaj Taita Diospajman tigrarichun yachachijurca.

5Shinallata Judá llactapi tiaj pueblocunapica, muyundi jatun pircacunata charij tucui pueblocunapimi, juezcunata churarca.

6Chai juezcunataca, cashnami nijurca: “Canguna imata ruranajushpapash, aliguta yaringuichi. Cangunaca, na yanga runapaj randi mandashpa, ashtahuangarin Mandaj Diospaj randi mandanajushcamandami, chashna yarina canguichi. Paica, canguna imata ricushpa mandanapipash cangunahuanmi.

7Cangunaca, Mandaj Diosta manllashpami causana canguichi. Imata ruranajushpapash, aliguta yaringuichi. Ñucanchita Mandaj Taita Diospaca, imatapash cashcatapacha na ruranapash, ñavita ricushpalla chasquinapash, caranacunata pacalla japinapash na tianllu” nijurcami.

8Josafat runaca, Mandaj Dios mandashcashnallata, aliguta ricushpa mandanajuchun, imapash llaquicunata alichinajuchunmi, Jerusalenbica huaquin levitacunatapash, curacunatapash, israelcunapaj familiacunata mandaj taitacunatapash churarca. Chai jipami, Jerusalenman tigranajurca.

9Paicunataca, cashna nishpami mandarca: “Mandaj Diosta manllashpa, na llullashpa, tucui shunguhuan cazushpami, alita rurana canguichi.

10Caishuj pueblocunapi causanajuj cangunapaj huauquicuna, ima llaquita villangapaj shamujpipash, cangunaca aliguta ricushpami, alichina canguichi. Huañuchishpa yahuarta jichashcata, mandashca shimicunata, imata rurachun nishcata, pactachinajuchun cushca shimicunata, imata rurachun mandashcacunata na cazushcata villaj shamujpipash, aliguta ricushpami tacurina canguichi. Mandaj Diosta fiñashpa ama juchata ruranajuchunmi, shinllita tacurina canguichi. Shina rurajpimi Taita Diosca cangunahuambash, cangunapaj huauquicunahuambash na fiñaringa. Chashna rurashpami, juchataca na ruranguichi.

11Ricuichi, Mandaj Diospajta tucui imatalla ruranapica, Amarías shuti curami mandajunga. Jatun mandaj imatalla ruranacunapica, Judá shuti runapaj miraicunata mandaj Zebadías shuti runami ricujunga. Paica, Ismael shuti runapaj churimi. Levitacunapashmi, cangunapaj ñaupajpi Diosta servishpa ayudanajunga. Canguna imata ruranataca, shinlli tucushpa ruranguichi. Mandaj Diosca, alita rurajcunahuanmi canga” nijurcami.