1Jonasca, chai pijipaj vijsa ucumandami, paita Mandaj Taita Diosta mañashpa,
2cashna nijurca:
“Ñucaca, ninan llaquihuan cashpami, Mandaj Diostaca mañarcani, paica uyahuarcami.
Seol ucupi cashpami, caparishpa mañarcani.
Ñuca mañashcataca uyahuarcanguimi.
3Ñucataca, mama cucha ucu chaupimanmi shitahuarcangui.
Ninanda rijuj yacumi, muyundi quilpahuarca.
Cambaj tucuilla yacucunapash, caiman chaiman jatarishpami, ñuca jahuata yalinajurca.
4Shinamandami cashna nijurcani:
‘Cambaj ñaupajmandaca, shitai tucushcami cani.
Shina cashpapash, cambajlla huasitaca ricusharami’ nijurcanimi.
5Yacumi, ñucataca tucuilla langahuarca.
Manllanayai ucu ucu yacucunami, muyundi quilpahuarca.
Yacu ucupi tiaj jihua angucunami, ñuca umapi pillurirca.
6Urcu callari ucucamanmi huashajurcani.
Alpaca, causaita causaicaman chaipi tiachunmi, aldabacunahuan vichashpa charihuarca.
Shina cajpipash, ñucata Mandaj Taita Dioslla, canmi ñuca causaitaca pambashcamanda llujchihuarcangui.
7Ñuca causaica, ña tucurijujpimi, can Mandaj Diostaca yarircani.
Ñuca mañashcataca, cambajlla huasimandami uyahuarcangui.
8Imapajpash na valij yangacunata catijcunaca, can llaquijujtami cunganajun.
9Ashtahuangarin ñucaca, ñuca shimihuan canda alicachishpami, animalcunata cushpa huañuchisha.
Imaguta carasha nishcatapash carashapachami.
Quishpichinaca, Mandaj Diospajmi” nijurcami.
10Mandaj Diosllata cutin mandajpimi, Jonasta langashca chai jatun pijica, chaquishca alpaman llujshishpa lansarca.
Who We AreWhat We EelieveWhat We Do
2025 by iamachristian.org,Inc All rights reserved.
