EZEQUIEL 43 - Quichua Imbabura Bible

Mandaj Diospaj punchapambagumi, paipaj huasipi jundashca

1Chai jipami ñucataca, indi llujshimuj lado punguman pushahuarca.

2Chaipica, indi llujshimuj ladomandami, israelcunapaj Taita Diospaj punchapambaguca ñapash shamujuj ricurirca. Pai shamujujca, ashtaca yacu huacashpa shamunshnami uyarirca. Cai llactaca Dios punchayachijpimi, punchapamba carca.

3Chaitaca, muscuipishnami ricurcani: Jerusalén pueblota tucuchingapaj shamujta, muscuipi ricushcatashnami ricurcani. Quebar shuti yacu manñapi cashpa muscuipishna ricushcashnallatami, chaipipash ricurirca. Chaita ricushpaca, alpaman chayajtami urai cumurircani.

4Mandaj Diospaj punchapambaguca, indi llujshimuj ladoman tiaj pungutami, paipaj huasiman yaicurca.

5Ñucataca, Diospaj Espiritumi, jahuata jatarichishpa Diospaj huasi ucu patioman jahuata apahuarca. Chaipica, Mandaj Diospaj punchapambagumi, paipaj huasi ucupi jundarca.

Diospaj huasipaj mandashcacunami

6Shinallata Diospaj huasimanda ñucata rimajujtami uyarcani. Ñuca ladopica, shuj runami shayajurca.

7Chai rimajca, cashnami nihuarca: “Huañuna aichayu runa. Caipimi, ñuca jatun tiarinata churana pushtu. Caipica, ñuca chaquita samachinami. Caipimi, causaita causaicaman israelcunahuan causasha. Israelcunaca paicunapash, paicunata jatun mandajcunapash na ashtahuan huainayashpa, jucha illaj ñuca shutita yangapi churanajungachu. Jatun mandajcunapaj huañushca aichacunatapash, na ashtahuan lomacunapi tiaj altarcunapi churanajungachu.

8Paicunaca, paicunapaj huasi pungu umbralcunatapash, ñuca huasi pungu umbral ladopi pilarcunatapash, ñuca huasi pilar ladopimi churanajurca. Ñucahuambash, paicunahuambash shicanyachijuj chaupipica, shuj patatalla shayachishpa, paicunapash millanayaicunata rurashpami, jucha illaj ñuca shutita yangapi churarca. Chaimandami, ninanda fiñarishpa paicunataca tucuchircani.

9Cunanga, paicuna huainayanatapash, ñuca ladomandaca carumanmi shitanajunga. Paicunata jatun mandajcunapaj huañushca cuerpocunatapashmi shitanajunga. Shina rurajpimi, causaita causaicaman paicunapaj chaupipi causasha.

10Huañuna aichayu runa. Israelcunaman cai huasita ricuchiyari. Paicuna nalita rurashcata yarishpa, pingai tucushpa cai huasita imashna ruranata medichun ricuchiyari.

11Paicuna tucui nalita rurashcamanda pingai tucujpica, cai huasita imashna ruranata aliguta yachachingui. Shinallata imashnalla shayachinata maitalla llujshinacunata, maitalla yaicunacunata, chai huasi imashna cajta tucuita imashna medinata, imashna juyaillagu ricurijujta, mandashca tucui shimicunata yachachingui. Cai huasi imashna cajta yarishpa causanajuchun, mandashcacunata pactachishpa, tucui imatalla ruranajuchun, paicunapaj ñaupajpi yachachingui.

12Cai huasipi imatalla ruranacunamanda mandashcapica, cashnami nijun: ‘Jatun urcu punda alpaca, tucui muyundimi Diospajlla canga’ ninmi. Ricui, caica cai huasipi imatalla ruranacunata mandashcami.

13Altarta medishpa rurana picha chunga ishcai centimetrota charij medidacunaca, caicunami. (Chaicunaca, picha chunga ishcai centimetrota, ishcai chunga sucta centimetrota medij medidacunami canga). Altarta rurai callaringapaca, picha chunga ishcai centímetro alto patatami rurana. Chai jahuapica, picha chunga ishcai centímetro anchota saquishpa, altarta rurai callarinami. Altarta rurai callarina muyundipica, ishcai chunga ishcai chaupi centímetro alto patatami rurana. Chaimi, altarta shayachina pushtu canga.

14Altarta shayachina patamanda, ucu callaripi tiajuj patacaman medijpica, shuj metro, chuscu centímetro altomi canga. Anchoca, picha chunga ishcai centimetromi canga. Altar tiajuj patamanda, patata rurai callarishca alpacaman medijpica, chuscu metro, pusaj centimetromi canga. Anchoca, picha chunga ishcai centimetromi canga.

15Chai jahuapi tiajuj altarca, ishcai metro chunga centímetro altomi carca. Altar jahua esquinacunapica, chuscu cachucunami tiarca.

16Chai altarca largomambash, anchomambash sucta metro, ishcai chunga chuscu centimetrotami charirca. Chuscundi ladomi, chashnallata medirca.

17Chai altarta charijuj pircaca, canchis metro, ishcai chunga chuscu pusaj centímetro jatunmi carca. Anchomambash, canchis metro, ishcai chunga pusaj centimetrollatami carca. Chuscundi ladomanmi, chashnallata medirca. Chai muyundica, ishcai chunga sucta centímetro ancho llujshirishcami carca. Chai altarta rurashpa callarinapica muyundipimi, picha chunga ishcai centímetro ancho patata rurashca carca. Jahuaman vichai rina gradascunaca, indi llujshimuj ladomanmi carca” nihuarcami.

18Chai jipaca, cashnami nihuarca: “Huañuna aichayu runa. Mandaj Jatun Diosmi, cashna nin: Altarta rurashpa tucuchishca punllapica, cashna ruranajuchunmi mandashca: Chai altarca, animalta ñucaman cushpa tucuilla rupachingapajmi, yahuartapash chai jahuapi tsirapachingapajmi.

19Sadoc shuti curapaj mirai levita curacunami, ñucata servingapaca quimirinajunga. Ñucata servingapaca, huagracunamanda shuj shicutami, juchata anchuchijuchun ñucaman cuna cangui. Mandaj Jatun Dios ñucami, chashna nini.

20Chai huagra yahuarta japishpaca, altarpi tiaj chuscundi cachucunapi, altar chaqui chuscundi esquinacunapi, altar muyundi jahuacunapipashmi tsirapachina cangui. Shinami mapata anchuchishpa, ima mapapash illajta saquingui.

21Shina rurashca jipaca, juchamanda cushca maltun jari huagra aichata rupachingui. Diospaj huasipi imashna ruranata mandashcashnallatami, ñucapajlla huasi canllaman rupachina cangui.

22Cayandi punllapaca, imapash na tucushca jari chivotami juchamandaca ñucaman cuna cangui. Maltun jari huagrapaj yahuarhuanshnallatami, chai jari chivopaj yahuarhuambash altarpi tsirapachishpa, mapa illajta saquinajunga.

23Juchamanda cushca jipaca, huarmi huagracunamandaca imapash na tucushca, maltun jari huagrata, llamacunamandaca shuj jari llamata ñucaman cuhuangui.

24Chaicunataca, Mandaj Dios ñuca ñaupajpimi rupachina cangui. Chai aicha jahuapica, curacunami cachita churashpa, ñucaman cushpa tucuillata rupachinajunga.

25Jari chivota, huarmi huagracunamandaca shuj maltun jari huagrata, llamacunamandaca imapash na tucushca jari llamatami, juchamanda ñucaman cushpa canchis punllacaman, punllandi huañuchinajunga.

26Altar jahuapica, canchis punllacaman animalcunata rupachishpami altartaca, mapa illajta ruranajunga. Chashnami, ñucapajlla cachun ruranajunga.

27Chai canchis punlla cayandi pusaj punllamanda callarishpaca, curacunami canguna ñucaman cushpa tucuilla rupachinacunatapash, ñucahuan ali cangapaj cushcacunatapash rupachinajunga. Shina rurajpimi, cangunataca chasquisha” nihuarcami Mandaj Jatun Diosca.