ISAÍAS 13 - Quichua Imbabura Bible

Babilonia llactata llaquichinatami villashca

1Babilonia llactata llaquichinata Dios villashpami, Amoz shuti runapaj churi Isaiasman ricuchishpa, cashna nirca:

2“Shuj jatun urcupi banderata shayachichiyari. Mandajcuna yaicuna punguta yaicuchun, maquita alsashpa paicunata shinlli caparichiyari.

3Ñucaca, ñuca agllashca soldadocunatami ña cacharcani. Ñuca fiñarishpa llaquichingapajmi, macanajunata ali yachaj soldadocunata cayarcani. Paicunaca, ñuca punchapamba cajpimi cushijun” nircami.

4Urcucunapica, ashtaca gentecuna caparinshnami, ashtaca gentecunaca culun ninajun. Mandajuj llactacunamanda shuj llactamanda tandanajushcacunami, culun ninajun. Jatun macanajuipaca, tucuita Mandaj Diosmi, soldadocuna alichirishcata ricushpa yalijun.

5Jahua pacha manña caru llactacunamandami shamunajun. Mandaj Diosmi ninanda fiñarishpa, tucui cai pachata tucuchingapaj, paita servij soldadocunahuan shamujun.

6Ninandapacha caparishpa huacaichiyari. Mandaj Dios llaquichina punllami ña chayamujun. Chaica, Tucui Ushaita Charij Dios llaquinayaita tucuchina punllashnami shamunga.

7Chaimandami tucuicunapaj maquica, ushai illaj quedanga. Tucuicunapaj shungupimi, ña huañugrijunshna tucunajunga.

8Ninandapachami manllarinajunga. Jatun llaquicuna, nanaicunami paicunataca japinga. Huarmicuna huahuata ungugrijunshnami nanachinajunga. Tucuicunami, paicunapaj cumbatallata ricushpa, manllarishpa ñavicunapash ninashna pucayanajunga.

9Ricuichi, Mandaj Dios manllanayaita llaquichina punllami chayamujun. Pai ninanda fiñarishca cashpami, nina rupajunshna canga. Cai pachataca, chulunllatami saquinga. Chaipi causanajuj juchata rurajcunataca, tucuillatami tucuchinga.

10Shinamandami jahua pacha luzerocunapash, asha asha tandanajushca luzerocunapash na ashtahuan punchayachinga. Indipash llujshishcandimi amsayanga, lunapash na punchayachingachu.

11“Cai pachapi causajcunataca, jatun nalita rurashcamandami llaquichisha. Ñucata na manllajcunataca, paicunallata nalita rurashcamandami tucuchisha. Jariyashpa cushijushca purinajujtapash tucuchishami. Ninan shinllicuna jariyashpa jatun tucushcatapash, yangapimi churasha.

12Gentecunataca, Ofir shuti llactamanda ashtahuan ali juyailla orotashnami, huaquindalla saquisha.

13Jahua pachatapash chujchuchishami. Cai pachapash pai tiajujmandaca, shuj ladomanmi cuyuringa. Tucuita Mandaj Dios ñuca, nina rupajunshna ninanda fiñarishca punllami chashna tucunga.

14Manllarishca tarugashna, michij illaj llamacunashnami, paicunapaj pueblocunaman, paicunapaj llactacunaman pacajushpa tucuicuna tigranajunga.

15Maijandapash ricushpaca, lanzahuanmi huañuchinga. Maijanda maipi japishpapash, espadahuanmi huañuchinga.

16Paicunapaj huahuacunatapash, paicunapaj ñaupajpillatami, maipipash cachun shitashpa huañuchinga. Huasicunamandapash, tucuillatami quichushpa apanajunga. Paicunapaj huarmicunatapash japishpami, munai na munai nalita ruranajunga.

17Ricuichi, paicunata llaquichigrichunga, Media shuti llactamanda soldadocunamanmi, llaquichigrina yuyaita cugrini. Paicunaca, na culquitalla, orotalla munashpa puringachu.

18Huahuacunatapash, arcohuanmi huañuchinga, huacharishcalla llullu huahuacunatapash na llaquingachu. Huahuacunata, paicunapaj ñavihuan ricushpaca, japishpa huañuchingallami.

19Babilonia puebloca, mandajuj llactacunapaj chaupipi juyaillagu cashpapash, chaipi causaj caldeocunapaj ninanda cushijushpa jariyana cashpapash, Taita Dios ñucallata tucuchishca Sodoma shuti, Gomorra shuti pueblocunashnami, ñucallata tucuchijpi tucuringa.

20Chaipica, pipash na ashtahuan causangachu. Chaipi causangapaca, cati cati miraicunapash na tigrangachu. Chaipica, arabecunapash na carpacunata shayachingachu. Michijcunapash, animalcunapaj corralta na ashtahuan chaipi charingachu.

21Ashtahuangarin chaipica, jichushca pambapi tiaj millai animalcunami causanga, huasicunapipash chushijcunallami jundanga. Avestruz nishca animalcunami, chaipica causanga. Sacha chivocunami, chaipica fahuanajunga.

22Mandana huasicunapipash, paicuna cushijuna huasicunapipash hiena nishca, chacal nishca animalcunallami huacanajunga. Babilonia pueblo chashna tucuna huatacunaca, ñami chayamujun. Chai huatacunaca, na unayangachu” nircami.