Psalms 70 - Quichua Imbabura Bible

Llaquimanda cacharichihuai nishpami, Diosta mañashca(Sal. 40:13-17)Dios yarichun nishpa, candajcunata mandaj candachijuchun, David rurashca Salmomi.

1Taita Dioslla, ñucata cacharichingapaj shamupairi.

Taita Dioslla, ayudangapaj ucha shamupairi.

2Ñucata huañuchingapaj munajcunaca,

pingai tucushpa pandachi tucushca cachun.

Ñucata llaquichingapaj munajcunaca,

huashaman tigrashpa, pingai tucushca cachun.

3Ñuca llaquihuan cajpi:

“¡Alita shina tucurca!” nishpa,

ñucata rimashpa pingaichishcamandaca,

huashaman tigrachi tucushca cachun.

4Canda mascajcunaca, tucuicuna ninanda cushijuchun.

Can quishpichishcamanda juyajcunaca, tucui causaipi:

“Taita Diosca jatumbachami” ninajuchun.

5Ñucaca ninan llaqui, imagupash illajmi causajuni.

Taita Dioslla, ucha ñucapajman shamupairi.

Mandaj Dioslla, canga ñucata ayudaj, ñucata

cacharichijmari cangui, ama unayapaichu.