1Canda fiñashpa tucuchij runami vichai rirca. Shinlli torretapash ricurianguiyari. Ñandapash chaparianguiyari, shinllita chumbiliriyari, ushaita ashtahuan japiyari.
2Mandaj Diosca, Jacobopaj miraicuna juyailla canataca, israelcuna juyailla canashnallatami cutin alichinga. Shuhuacunami, paicuna imata charishcacunataca shuhuashpa apanajurca. Paicunataca, uvas retoñotashnami sarunajurca.
3Paicunapaj shinlli soldadocunapaj jarcarina escudocunaca, pucayashcami canga. Chai soldadocunapash, yanalla puca churajunata churajushcami canga. Macanajuna carretacunaca, michumbi ninata japichishcashnami canga. Chai alichirinajui punllapica, haya nishca quirucunapashmi chujchunga.
4Macanajuna carretacunahuanga, plazacunamanmi calpashpa yaicunajunga. Ñangunapipash culunlla huacashpami, ruedacunaca muyunajunga. Chai carretacunaca, ninata japichishca michunshnami ricuringa. Chaicunaca, punchapamba shitamunshnami calpanajunga.
5Paica, paipaj shinlli soldadocunatami yaringa. Paicunaca, shamunajushpallatami sarurinajunga. Pirca ladoman ucha rishpami, jarcashpa macanajungapaj alichirinajunga.
6Jatun yacucunapaj pungucunapash pascaringami. Chai yacucunami, mandashpa tiajuna huasitapash urmachinga.
7Jatun mandaj huarmitaca, prezumi japinga. Paita vichai apamuchun mandajpimi, paita servij huarmicunaca, pechopi huactarishpa palomacunashna huacashpa apanajunga.
8Ñaupa punllacunaca, Nínive shuti puebloca, cuchayashca yacushnami carca, ashtahuangarin paicunaca pacajungapajmi calpanajun. Paicunataca: “¡Shuyaichi, shuyaichi!” nijpipash, pipash na tigrashpa ricunllu.
9Culquitapash, orotapash japishpa apaichilla. Chai tucui juyailla, valishca munanayai charishcacunaca mashnata apanajujpipash, na tucuringachu.
10Chushaj, shaijushca, llaquinayaita tucuchi tucushcami quedashca. Shungupipash ña huañugrijunshnami tucushca. Cunguripash chujchujuj, vijsatapash nanachijuj, ñavipash, quillu quillumari tucushca.
11Leonguna causana pushtupash, leongunapaj huahuacuna mapayachishca utujucunapash, taita leonbash, mama leonbash, leongunapaj huahuacuna tandanajushpa causana utujucunaca, ¿imata tucushcayari? Paicunataca, pipash na manllachi ushanllu carca.
12Leonga, paipaj huahuacunamambash, paipaj huarmicunamambash carangapajmi, huañuchishpa ashtaca aichata apamun carca. Paicuna causana utujucunapica, aichacunata shuhuashcacunatami jundachin carca.
Nínive shuti pueblota tucuilla tucuchinatami villajun13Tucuita Mandaj Diosca, cashnami nin: “Ricui, canda llaquichingapaca caipimi cani. Macanajuna cambaj carretacunata rupachijpimi, cushni llujshijunga. Cambaj maltun leongunataca, espadami micunshna tucuchinga. Llactamandaca, can shuhuashcatapash chingachishami. Cambaj villajcuna villashcapash, ima horapash na ashtahuan uyaringachu” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
