ROMANOS 4 - Quichua Imbabura Bible

Abrahamga, alipacha crijmi cashca

1Ñucanchipaj ñaupa taita Abrahamdaca, ¿ima nishunda? ¿Imatapash rurashpachu paipaj causaipi aliguta japijushca canga?

2Abrahamdaca, pai imatapash cashcatapacha rurajushcamanda Dios chasquishca cajpica, jariyai ushanmanmi carca. Ashtahuangarin Taita Diospaj ñaupajpica, na jariyai ushanllu.

3Dios escribichishca Shimipica, ¿ima nijunda? “Abrahamga, Taita Diostami crirca. Shina crijpimi, paitaca imatapash cashcatapacha rurashcata ricushpa Diosca chasquirca” nijunmi.

4Ashtahuangarin imatapash rurashcamanda culquita cushpaca, na ninanda juyaimandalla cunllu. Ashtahuangarin cunapacha cashcamandami cun.

5Aliguta ruranata na pactachijpipash crijpillami, imatapash cashcatapacha rurachun Dios chasquishpa charin. Crijpillami paita na manllajtapash, imatapash cashcatapacha rurashcata ricushpa Diosca chasquin.

6Aliguta ruranata na pactachijpipash, imatapash cashcatapacha rurachunmi, Taita Diosca chasquijun. Davidpash, paicuna ninanda cushijunamanda villashpami,

7cashna nirca:

“Nalita rurashcata Dios cungashpa,

juchacunata quilpanshna anchuchijpica,

maijan cashpapash ninandami cushijun.

8‘Canga, na juchayuchu cangui’ nishpa,

Jatun Dios nijpimi, pipash ninanda cushijun” nircami.

9¿Cai cushijunaca, circuncisión nishcata rurashca runapajllachu, na cashpaca circuncisionda na rurashca runapajpashchu? “Abrahamdaca crijpillami, imatapash cashcatapacha rurashcatashna Diosca chasquirca” nircanchimi.

10¿Imashnata paitaca chasquirca? ¿Circuncisionda rurajhuanllu paitaca chasquirca, na cashpaca nara rurajpillatachu chasquishca carca? Circuncisionda nara rurajpillatami, paitaca ña chasquishca carca.

11Chai jipami, circuncisionda rurarca. Nara circuncisionda rurashpallata crijpi, imatapash cashcatapacha rurashcatashna Dios chasquishcata ricuchingapajmi, sellota churanshna circuncisionda rurashca. Shina cashpami, circuncisionda na rurashca tucui crijcunapajpash, Abrahamga taita tucurca. Crijpica, imatapash cashcatapacha rurashcatashna paicunatapash Diosca chasquichunmi, chashna rurashca.

12Circuncisionda rurashcacunapaj taitami. Na circuncisionda rurashca cajpilla, paicunapaj taitachu. Ashtahuangarin ñucanchi ñaupa taita Abraham nara circuncisionda rurashpallata crishcashna, paicunapash catishpa crishcamandami paicunapaj taita.

Diosca, crijpica carashapachami nishcami

13Diosca, Abrahamman, paipaj miraicunamambashmi, cai pachataca carashapacha nijurcami. Mandashca shimicunata pactachishcamandaca, na chashna nijurcachu. Ashtahuangarin crijpi Diosca, imatapash cashcatapacha rurashcatashna chasquishcamandami, chashna nirca.

14Mandashcata pactachijcunalla japina cajpica, crishcapash yangami canman. Dios carashapachami nishcapash yangallatami canman.

15Mandashca shimihuanga, Diosta fiñachinmi. Ashtahuangarin maipimi mandashca shimi na tiajpica, ima mandashcata na cazunapash na tianllu.

16Shina cashcamanda alipacha crijpillami, paipaj miraicunaman Diosca, ninanda juyashpa carashapachami nishca. Mandashcata pactachijmanlla caranataca, na nishcachu. Ashtahuangarin Abraham crishcashna crijcunamambash carashapachami nishcami. Abrahamga, tucui ñucanchipaj taitami.

17(Escribishcapica cashnami nijun: “Ashtaca gentecunapaj taita cachunmi, candaca churarcani” nijunmi). Taita Diospaj ñaupajpi alipacha crij cajpimi, Abrahamdaca Diosca shina nishca. Paimi huañushcacunatapash causachin. Ima na tiajtapash tiachun ruranllami.

18Paimi Abrahamdaca: “Cambaj miraicunaca, ashtacami canga” nijurca. Chashna nishcashnami, napash crinallata alipacha crishpa Abrahamga, ashtaca gentecunapaj taita tucurca.

19(Paica, patsaj huatatashna charishpami, ña rucuyashca carca). Abrahamga, paipaj cuerpo ña huañunashnalla cajpipash, crinataca napacha saquircachu. Sara shuti paipaj huarmi huahuata na tarijpipash, na saquircachu.

20Taita Dios carashapachami nijpica, na ishcai shungu tucurcachu. Ashtahuangarin caranata crishpa shinlli tucushpami, Taita Diostaca ninanda alicachijurca.

21Dios imata carashapacha nishcataca pactachingapaj ushaita charijtapacha crishpami Abrahamga causajurca.

22Shinamandami pai crishcatapash, imatapash cashcatapacha rurashcata ricushpa Diosca chasquirca.

23“Paitaca chasquircami” nishpa escribishca shimicunaca, na Abrahammandalla nijunllu.

24Ashtahuangarin ñucanchimandapashmi escribishca. Ñucanchipashmi, ricushpa chasqui tucuna canchi. Ñucanchi Apunchi Jesusta huañushcacunapaj chaupimanda causachishcata crijcuna cashcamandami, Diosca ñucanchitapash chasquijun.

25Paitaca, ñucanchipaj juchacunata anchuchingapaj huañuchunmi, Diosca cushpa saquirca. Shinallata imatapash cashcatapacha ruraj cachun ñucanchita chasquingapajmi, Jesustaca causachirca.