Psalms 22 - Quichua Imbabura Bible

Llaquihuan cashpa caparishcatapash, alicachishpa candashcatapashmi villajunTutamandata purij Taruga nishpa candana tonopi, candajcunata mandaj candachijuchun, David rurashca Salmomi.

1Ñuca Taita Dioslla, ñuca Taita Dioslla.

¿Imashpata ñucataca jichuhuanguiyari?

¿Imashpata ñucata quishpichinamandapash,

ñuca caparijujta uyanamandapash,

carupi capanguiyari?

2Ñuca Taita Dioslla, punlla mañajpipash,

na tigrachihuanguica.

Ñuca samanaca, tutapash na tianllu.

3Ashtahuangarin canmi, jucha illaj capangui.

Canga, israelcuna alicachinajuj

chaupipimi causajungui.

4Ñucanchi ñaupa taitacunaca, candami shuyanajurca.

Shuyanajujpimi, canga cacharichimurcangui.

5Canda caparishpa mañashpaca, cacharichi tucurcallami.

Canda yariashpa causajcunaca,

na pingaichi tucunajurcachu.

6Ashtahuangarin ñucaca, jurushnami

cani, na runashna canichu.

Runacuna nalicachishpa rimai tucushca,

gentecunapi na ricunayachi tucushcami cani.

7Ñucata tucui ricujcunami, asishpa ricunajun.

Shimita vishtushpa umata muyuchishpami,

cashna ninajun:

8“Cai runaca, Mandaj Diospaj

maquipimi mingarirca.

Paihuanmi cushijun carca.

Shina cashpaca, paillata cacharichishpa

quishpichijuchunyari” ninajunmi.

9Ashtahuangarin canmi, ñucataca

vijsa ucumanda llujchihuarcangui.

Canmi ñucataca, chuchujujpillata canda

yariaj causachun rurahuarcangui.

10Nara huacharishpallatami,

cambaj maquipi mingashca carcani.

Ñuca mamapaj vijsapi cashcamandapacha,

canmi ñuca Taita Dios cangui.

11Ñucamandaca ama caruyapaichu.

Ninan llaquicunamari chayamugrin.

Ayudangapajpash pipash na tianga.

12Ñucataca, ashtaca huagracunashnami muyushca.

Basán llactamanda ninan shinlli

huagracunashnami muyushca.

13Ninan millai león huacajunshnami,

ñucata llaquichingapaj shimita pascanajun.

14Yacu talirijunshnami tucurijuni.

Ñuca tullu mucucunapash, ladomanmi llujshishca.

Ñuca shunguca, vijsa ucupica vira

yacuyashpa tucurijunshnami.

15Ñuca ushaipash, callana chaquinshnami tucurishca.

Ñuca jallupash, chaquishpami shimi

jahuaman llutarirca.

Ñucataca, huañushpa sirijuna

ñutu alpapimi churahuashcangui.

16Nalita ruraj, alcushna runacunami,

tandanajushpa ñuca muyundipi shayanajun.

Ñuca maquitapash, chaquitapashmi

utujushpa chugrichinajuhuarca.

17Ñuca tullucunatapash, tucuillata

cuentai ushanillami.

Shina cuentajujtami, paicunaca

chapashpa ali ricurianajuhuan.

18Ñuca churajunataca, paicuna

purami chaupirinajurca.

Chai churajuna jahuapillatami,

suertetapash ruranajurca.

19Ashtahuangarin can Mandaj Diosca, ama caruyapaichu.

Ñuca shinlli torreshna Dioslla,

ñucata ayudangapaj ucha shamupairi.

20Espadahuan huañuchi tucunamanda,

ñuca almata cacharichihuayari.

Alcushna nali gentecunapaj ushaimandaca,

ñuca causaita quishpichihuayari.

21Leonbaj shimimandashna quishpichihuayari.

Búfalo nishca huagracunapaj

cachucunamandashna cacharichihuayari.

22Cambaj shutitaca, ñuca

huauquicunamambash villashami.

Tandanajushcacunapaj chaupipimi, candaca alicachisha.

23Mandaj Diosta manllajcunaca, alicachinguichi.

Jacobopaj tucui miraicunaca, paitami

punchapambagumi cangui nina canguichi.

Israelpaj miraicunaca, tucuicuna

paita manllaichi.

24Paica, llaquichi tucushpa causajpaj llaquitaca,

na yangapi churashpa millanayachircachu.

Paimandaca, ñavitapash na shujman churarcachu,

ashtahuangarin paita mañajpica uyarcallami.

25Jatun tandanajuipica, candami alicachisha.

Canman imatalla cusha nishcataca,

canda manllajcunapaj ñaupajpimi cusha.

26Na jariyashpa causajcunami,

na munangacaman micunajunga.

Mandaj Diosta mascajcunami, paita alicachinajunga.

Cangunapaj shungupica, causaita causanatami charinguichi.

27Cai pacha manñacunapi tucui causajcunami,

Mandaj Diosta yarishpa tigrarinajunga.

Tucui llactacunapi causaj familiacunami,

cambaj ñaupajpi alicachinajunga.

28Mandanaca, Mandaj Diospajmi.

Paimi, tucui llactacunata mandanga.

29Cai pachapi ushaita tucui charijcunami

micushpa, paita alicachinajunga.

Huañushpa ñutu alpaman urai rijcunaca,

tucuicunami paipaj ñaupajpi cungurinajunga.

Paipaj almata causaihuan na chari

ushajcunapashmi cungurinajunga.

30Jipa miraicunami, paitaca servinajunga.

Caitaca Mandaj Diosmandami, tucui jipa

miraicunamambash villanajunga.

31Pai imatapash cashcatapacha rurashcataca,

shamushpami villanajunga.

Pai caita rurashcataca, nara huacharishca

gentecunamambashmi villanajunga.