Psalms 45 - Quichua Imbabura Bible

Jatun mandaj cazarajujpi candashcamiLirio sisacuna nishpa candana tonopi, candajcunata mandaj candachijuchun, yachachingapaj Coré shuti runapaj miraicuna rurashca Salmomi. Juyarinamanda candanami.

1Ñuca shungumandaca, juyailla

shimicunami llujshijun.

Jatun mandajmanmi candagrijuni.

Ñuca jalluca, ñapash escribij runapaj plumashnami.

2Huañuna aichayu runa purapica,

ashtahuan yali juyaillagumi capangui.

Cambaj shimimandaca, uyanayai shimicunami llujshijurca.

Chaimandami, candaca tucui causaipaj,

Taita Diosca bendiciashca.

3Ninan shinlli runalla, cambaj espadata

cambaj changapi huatariyari.

Cambaj punchapambahuambash, mandana

ushaihuambash chumbiliyari.

4Can punchapamba cashcamandaca, tucuipi ali llujshipairi.

Na llullaj shimipi, na jariyashca canapi, imatapash

cashcatapacha ruranapi, caballopishna tiaripairi.

Cambaj ali lado maquimi, imatapash jatun

manllarinacunata rurashpa ricuchinga.

5Cambaj flechacunaca, filo filomi.

Chaicunahuanmi, shuj llacta gentecunaca

cambaj chaqui ucupi urmanajunga.

Chaicunallatami, jatun mandajta

fiñajcunapaj shungupica yaicunga.

6Taita Dioslla, can mandashpa tiarinaca,

na tucurina causaita causaipajmi.

Imatapash cashcatapacha rurana varami,

llactata mandana cambaj vara canga.

7Canga, imatapash cashcatapacha ruranata

juyashpami, nalitaca millanayachishcangui.

Chaimandami cambaj Taita Diosca, cushichina

aceiteta talishpa javishpa, cambaj

cumbacunatapash yali candaca cushichirca.

Cambaj Taita Diosmi, chashna rurarca.

8Tucuilla cambaj churajunacunami, mirra nishca,

áloe nishca, casia nishca jambicunata

javishca, mishquillagu ashnajun.

Marfilta churashpa rurashca, mandashpa tiajuna

huasimandapachami, candaca ninanda cushichinajun.

9Cambaj huasipi alicachi tucushpa tianajuj

puracunapica, jatun mandajcunapaj ushicunami tianajun.

Jatun mandaj huarmica, cambaj ali lado maquimanmi,

Ofir llactamanda orota churajushca tiajun.

10Ricui ñuca huahualla, cambaj

rinrita mañachishpa uyahuai.

Cambaj llacta puracunata, cambaj taitapaj

huasi ucu puratapash cungailla.

11Jatun mandajca, can juyaillagu cajtami munanga.

Paimanmi cumurina cangui, paimi canda mandaj.

12Tiro shuti pueblopi causajcunaca,

caranacunahuanmi shamunga.

Ninan charij gente puracunapipash, can alita

rurachunmi canda mañangapaj shamunajunga.

13Jatun mandajpaj ushiguca punchapambami,

pai causana ucupica tiajun.

Paipaj churajunaca, oro puchahuan ahuashcami.

14Bordashca churajunacunahuanmi,

jatun mandajpajman apai tucunga.

Jarihuan nara tacarishca cuitsacunami, paita catinajunga.

Paipaj cumba cuitsacunapashmi,

cambajman apamui tucunajunga.

15Ninan cushijuihuanmi apamui tucunajunga.

Shina apamujpimi, jatun mandaj mandashpa

tiajuj huasiman yaicunajunga.

16Cangunapaj taitacunapaj randica,

cangunapaj churicunami canga.

Paicunatami, tucui cai pachapi mandanajuchun churangui.

17Cambaj shutita yarinataca, tucuilla jipa

miraicunapash, tucui causaicaman yachachunmi churasha.

Chaimandami llactacunapi causajcunaca,

na tucuri causaita causaicaman alicachinajunga.