Psalms 19 - Quichua Imbabura Bible

Dios rurashcacunamandapash, paipaj Shimimandapashmi villajunCandajcunata mandaj candachijuchun, David rurashca Salmomi.

1Jahua pachaca, Taita Dios

punchapamba cajtami villajun.

Chaipi imalla tiajcunapash, paipaj

maquihuan rurashcatami villajun.

2Shuj punllapash, caishuj punllamanmi

villashpa yalichijun.

Shuj tutapash, caishuj tutamanmi

ali yachaitaca villajun.

3Shuj rimaita rimanaca na tianllu,

ima shimicunapash na tianllu.

Pai rimashcapash, na uyarinllu.

4Ashtahuangarin pai rimashcacunaca,

tucui cai pachamanmi llujshirca.

Pai rimashca shimicunaca, cai pacha

tucuri manñacamanmi llujshirca.

Chaicunapimi, indimambash carpata churarca.

5Indica, chairalla cazarashcacunapaj huasi

ucumanda cusa llujshinshnami llujshijun.

Shina llujshishpaca, ñanda calpagrijuj

manllanayai jatun runashnami ninanda cushijun.

6Pai llujshinaca, jahua pacha shuj ladomandami.

Pai rishpa muyunaca, jahua pacha

tucuri caishuj ladocamanmi.

Paipaj rupaimandaca, imapash na pacajui ushanllu.

7Mandaj Dios mandashcacunaca,

ima pandapash illaj cashpami,

almataca mushuj causaiman tigrachin.

Imashna causanata Mandaj Dios yachachishca shimicunaca,

imatapash pactachij cashpami, yanga

runataca, alipacha yachajushcata ruran.

8Mandaj Dios mandashcacunaca, imapajpash

alipacha cashpami, shungutaca cushichin.

Mandaj Dios imatalla rurai nishcacunaca,

ima mapapash illaj cashpami, ñavitaca punchayachin.

9Mandaj Diosta manllanaca, ima mapapash illajmi.

Chaica, causaita causaicaman na tucurinllu.

Mandaj Dios mandashcacunaca, na llullachu.

Tucuillami imatapash cashcatapacha mandan.

10Orotapash ashtahuan yali munanayaimi.

Ashtahuan ali ashtaca orotapash yali,

munanayai shimicunami.

Balun mishquitapash yali mishquimi.

Balun mishqui shinlliyashcamanda

talirijujtapash yali mishquimi.

11Canda servij ñucaca, chai shimicunahuanga

alipacha yachachi tucushcami cani.

Chaicunata cazushpaca, alitapacha japinami tian.

12Paillata pandarishcataca, ¿pita yachai ushanga?

Pacalla tiaj ñuca juchacunamandaca cacharichihuayari.

13Shinallata canda servij ñucataca, jariyashpa

jatun tucuna yuyaicunamandapash huacaichihuayari.

Chai yuyaicuna ñucata mandachunga, ama saquihuaichu.

Shina cajpimi, ima nalitapash na rurasha.

Shinallata na cazuj canapash, mapa illajpashmi casha.

14Mandaj Dioslla, jatun Rumishna ñuca

Dioslla, ñucata quishpichijmi cangui.

Ñuca shimihuan nishcacunapash,

ñuca shungupi yarijushcapash, cambaj

ñaupajpica chasqui ushanalla cachun.