1 REYES 17 - Quichua Imbabura Bible

Na tamiangachu nishpami, Eliasca villashca

1Eliasca, Galaad llactapi causajpura Tisbe shuti pueblomandami carca. Paimi, Acab runataca cashna nirca: “Israelcunata Mandaj Taita Diosca causajumbachami. Ñucaca, paipaj ñaupajpimi cani. Cai huatacunapica, na tamiangachu, jamzi paramullapash na urmangachu. Ashtahuangarin ñuca mandajpillami tamianga” nircami.

2Chai jipami Mandaj Diosca, cai shimicunata cashna nishpa, Eliasman villarca:

3“Caimanda anchurishpa, indi llujshimuj ladoman tigrashpa, Jordán yacu chimba purapi tiajuj Querit shuti jatun larca yacu ladopi pacajugri.

4Chai jatun larca yacutami ufiangui. Shinallata cuervo nishca alasyu animalcunatami, chaipi micunata canman carachun mandarcani” nircami.

5Shina nijpimi Eliasca, Mandaj Dios mandashcashnallata cazushpa, Jordán yacu chimba purapi tiaj Querit shuti huaicu yacu ladoman rishpa, chaipi causagrirca.

6Chai cuervo nishca animalcunaca, tutamandapash tandata aichata, chishipash tandata aichatallatami apamun carca. Yacutapash, chai jatun larcamandami ufian carca.

7Ña tauca punllacuna yalishca jipami, chai llactapica na tamiajpi, chai jatun larca yacupash chaquirca.

Eliasmandapash, Sarepta pueblopi causaj sapalla huarmimandapashmi villajun

8Chai jipami Mandaj Diosca, cai shimicunata cashna nishpa Eliasman villarca:

9“Jatari, Sidón shuti llactapi tiaj Sarepta shuti puebloman rishpa, chaipi causagri. Ricui, chaipi causajuj shuj sapalla mamagutami, canman micunata carashpa charichun mandarcani” nircami.

10Shina nijpimi, paica jatarishpa, Sarepta shuti puebloman rirca. Chai pueblo punguman chayashpaca, yamdata tandachijuj shuj sapalla mamagutami ricurca. Eliasca, chai mamaguta cayashpami:

—Ñuca ufiangapaj asha yacuguta jarrapi apamushpa carahuai— nirca.

11Chai huarmica, yacuta apamungapaj ña rijujpimi, Eliasca cutin cayashpa:

—Asha tandagutapash apamupangui— nirca.

12Shina nijpimi chai huarmica, cashna nishpa tigrachirca:

—Canda Mandaj Taita Diosca causajumbachami. Cusashca tandataca na charinichu, maqui jundashna jacugutallami mangapi charini. Aceitetapash, ashagutallami uchilla mangapi charini. Cunanga, tandata rurashpa ñucahuan, ñuca churihuan micungapajmi, cai ishcailla yamdatapash tandachijurcani. Chaita micushpaca, huañushunllami— nircami.

13Shina nijpimi Eliasca, cashna nirca:

—Ama manllaichu. Can imashna nishcashnallata rurangapaj rilla. Shina cajpipash chai jacutaca, shuj uchilla tortillata rurashpa tulpapi cusashpa, ñucamanra apamugripailla. Chai jipaca canmambash, cambaj churimambash ruranguilla.

14Israelcunata Mandaj Taita Diosmi, cashna nin: ‘Mandaj Dios ñuca tamiachina punllacamanmi, chai mangapi jacupash, uchilla mangapi aceitepash na tucuringa’ ninmi— nircami.

15Shina nijpimi chai mamaguca, Elías imashna nishcashnalla rurangapaj rirca. Chashna rurashpami Eliaspash, chai sapalla mamagupash, paipaj huasi ucu purapash, tauca punllacunata micushpa causanajurca.

16Elías runahuan Mandaj Dios villachishcashnallatami, chai mangamanda jacupash, uchilla mangamanda aceitepash na tucurirca.

17Chashna rurashca jipami, cashna tucurca: Chai huasimanda huarmipaj churimi, ung:ui japijpi huañunalla sirijurca. Chashna sirijushpami, ashtahuan anllayashpa samai tucurijpi huañurca.

18Chaimandami chai huarmica, Eliasta cashna nirca:

—Taita Diospaj runagu, candaca, ¿ima nalitata rurashcaniyari? ¿Ñuca juchacunata yarichishpa, ñuca churita huañuchingapajchu ñucapajman shamurcangui?— nircami.

19Shina nijpimi, Eliasca:

—Cambaj churita caiman apamui— nirca.

Shina nijpi chai huahuata apamujpimi Eliasca, chai huarmipaj rigramanda japishpa, pai causajuj ucuman aparca. Chai ucuman apashpami, pai puñuj camapi sirichirca.

20Chaipi sirichishpami Eliasca, Mandaj Diosta caparishpa mañashpa cashna nirca: “Ñucata Mandaj Taita Dioslla, ¿ñucata mingachishpa charijuj cai sapalla mamagutapashchu, cai huahuapaj causaita quichushpa llaquichingui?” nircami.

21Eliasca, chai huahuapaj jahuapi quimsa viajecaman siririshpami, Mandaj Diostaca: “Ñucata Mandaj Taita Dioslla, cai huahuapaj almata paipajman tigrachipai nipanimi” nishpa, caparishpa mañarca.

22Elías mañajujta Mandaj Dios uyashpami, chai huahuapaj almata tigrachijpi, chai huahuaca cutin causarirca.

23Eliasca, pai causajuj ucumanda huahuata marcashpa apamushpami:

—Ricui, cambaj churica causarircami— nishpa, chai huahuapaj mamaman curca.

24Chaimandami chai huarmica, Eliastaca cashna nirca:

—Taita Diospaj runagu cajtaca, cunanmi yachani. Mandaj Diospacha paipaj shimita villachun mandajpi, na llullashpa villajushcatapashmi yachani— nircami.