2 SAMUEL 12 - Quichua Imbabura Bible

Batán runaca, Davidtami rimashca

1Natán runaca, Davidpajman Mandaj Dios cachamujpi paipajman shamushpami, cashna nijurca:

—Shuj pueblopimi, ishcai runacuna tiarca. Paicunaca, shujca ninan charij, caishujca imagutapash na charijmi carca.

2Chai charij runaca, ashtaca llamacunata, ashtaca huagracunatami charirca.

3Ashtahuangarin imagutapash na charij runaguca, pai randishpa viñachishca huahualla shuj huarmi llamagutallami charirca. Chai llamagutaca paihuan, paipaj huahuacunahuan chai micunatallata micuchishpa, yacutapash chai vasomandallata ufiachishpa, puñuitapash, paipaj rigrapi puñuchishpami viñachishca carca. Shinallata paipaj ushigutashnami charirca.

4Charij runapajmanmi, ñanda yalij shuj runa chayamurca. Chai charij runaca, pai charishca llamacunamanda, huagracunamanda huañuchishpa yanushpa carangapaca na munarcachu. Ashtahuangarin chai chayamuj runaman carangapaca, imagutapash na charij runagupaj llamaguta quichushpami, huañuchishpa yanushpa cararca— nijurcami.

5Shina nijpimi Davidca, chai charij runahuanga, nina japirinshna, ninandapacha fiñarishpa Natán runataca, cashna nirca:

—Mandaj Diosca causajumbachami. Maijan chashna rurashca cashpapash, huañuchi tucunapachami.

6Chai huarmi llamagumandaca, chuscuta mirachishpami tigrachinata charin. Paica, llaquitapash na llaquishpami chashna rurashca— nircami.

7Shina nijpimi Natán runaca, Davidtaca cashna nijurca:

—Chai runaca, canllatamari cangui. Israelcunata Mandaj Taita Diosca, cashnami nin: ‘Ñucami candaca, israelcunata jatun mandaj cachun, aceiteta talishpa javircani. Saulpaj maquimandapashmi cacharichircani.

8Shinallata, cambaj amo Saúl mandashpa tiajuna huasitapash, cambaj amopajllata huarmicunatapashmi, cambaj maquipi curcani. Israel llactata, Judá llactata mandachumbashmi curcani. Chaicuna ashalla ricurishca cajpipash, ashtahuan mirachishpa cuimanmi carcani.

9¿Imashpata ñuca rimashca shimicunata yangapi churashpa, ñuca ñaupajpi nalita rurarcangui? Heteopura Urías runata espadahuan chugrichishpa huañuchishpami, paipaj huarmitaca, cambaj huarmi cachun japircangui. Paitaca, amonitacunapaj espadapi huañuchunmi cacharcangui.

10Canga, ñucata yangapi churashpami, heteopura Urías runapaj huarmitaca, cambaj huarmi cachun japircangui. Shina cashcamanda cambaj familia purapica, espadahuan huañuchi tucunajuica, ima horapash na illangachu’ ninmi.

11Mandaj Diosca, cashnatapashmi nin: ‘Ricui ñucami, cambaj familia puramandallata canda llaquichijta churagrini. Cambaj huarmicunatapash, cambaj ñaupajmanda japishpami, cambaj cumbamanllata cusha. Paimi, cambaj huarmicunahuanga, punlla indijui horascunapi sirijunga.

12Canga, pacalla chashna rurashca cajpipash, ñucaca tucui israelcunapaj ñaupajpimi, punlla indijui horascunapi, chashna rurasha’ ninmi— nijurcami.

13Shina nijpimi Davidca, Natán runataca:

—Juchata rurashpami, Mandaj Diosta fiñachishcani— nirca.

Shina nijpimi Natán runaca, Davidtaca cashna nirca:

—Mandaj Diospash, cambaj juchataca anchuchishcami. Chaimanda na huañunguichu.

14Ashtahuangarin chai nalita rurashpaca, Mandaj Diostami paita fiñajcunahuan nalicachishpa rimachishcangui. Shina cashcamandaca, chairalla ungushca cambaj churica, huañungapachami— nircami.

15Chai jipaca Natán runaca, paipaj huasiman tigrarcallami. Chaipimi Mandaj Diosca, Urías runapaj huarmihuan David charishca huahuapajman, ung:uita cachamurca. Chaimandami chai huahuaguca, ña huañunallapacha carca.

16Shinamandami Davidca, chai huahuamandaca Taita Diosta ninanda mañajurca. Davidca na micushpami, shuj ucuman yaicushpa tucui tuta, Diosta mañashpa alpapi sirijurca.

17Chaita ricushpami, pai mandana huasipi mandaj rucucunaca, alpamanda jatarichingapaj rinajurca. Ashtahuangarin paica na uyarcachu. Paicunahuanga, micuitapash na micurcachu.

18Ña canchis punllapimi, chai huahuaca huañurca. Davidpaj servijcunaca, chai huahua huañushcata villangapaj manllashpami, paicuna puralla cashna ninajurca: “Huahua causajujpipash, ñucanchi imatalla nishcataca na uyanayachircachu. Cunangarin, huahua huañurcami nijpica, ashtahuanmi llaquiringa” ninajurcami.

19Ashtahuangarin Davidca, paita servijcuna paicuna puralla parlanajujta ricushpami, huahuami huañushcanga yajurca. Chashna yashpami Davidca, paita servijcunataca:

—¿Huahua huañurcachu?— nishpa tapurca.

Shina tapujpimi paicunaca:

—Ari, huañurcami— ninajurca.

20Shina nijpimi Davidca, alpamanda jatarishpa armashpa, mishquillagu ashnajuj jambita javirishpa, shuj churajunata churajurca. Shina churajushpami, Mandaj Diospaj huasiman yaicushpa, Diosta alicachirca. Chai jipaca, paipaj huasiman shamushpami, micunata mañashpa micurca.

21Chaita ricushpami paita servijcunaca, cashna ninajurca:

—¿Imatata rurajungui? Huahua causajujpica, na micushpami huacajurcangui. ¿Cunan, huahua huañujpirachu, jatarishpa micujungui?— ninajurcami.

22Shina nijpimi Davidca, cashna nirca:

—Huahua causajujpica, na micushpami huacajurcani. Taita Dios ñucata llaquijpica, huahua na huañuipajpash yashpami, chashna rurajurcani.

23Ashtahuangarin cunanga, ñami huañushca. ¿Imashpata na micushayari? Ñucaca, na causachi ushashachu. Ashtahuangarin ñucami paipajman risha, paica cutinga na ñucapajman tigramungachu— nircami.

24Chai jipami Davidca, Betsabé shuti paipaj huarmita cushichirca. Paipajman chayashpa paihuan puñujpimi, Betsabé huarmica shuj jari huahuaguta ungurca. Chai huahuagutaca, Salomón shutitami shutichirca. Chai huahuagutami, Mandaj Diosca juyarca.

25Dios ima nishcata villaj Natán runahuanmi, Diosca shuj villanata villachun cacharca. Chaimandami, Mandaj Dios rimashcata cazushpa, Jedidías shutita shutichirca.

Rabá shuti pueblotaca, Davidmi quichushca(1 Crón. 20:1-3)

26Joab runaca, Rabá shuti pueblopi causaj amonitacunahuan macanajushpami, jatun mandaj mandashpa tiajuj pueblota japirca.

27Chaimandami Joab runaca, villajcunata Davidman cashna nichun cacharca: “Rabá shuti pueblota chaupipi churashpa macanajushpami, yacu tandanajuj pueblotaca ña japircani.

28Shina cashcamanda cunanga, chaipi quedashca runacunata tandachishpa, macanajushpa chai pueblota quichuilla. Na cashpaca ñucallata quichujpira, chai puebloca ñuca shutipi quedanman” nichunmi cacharca.

29Davidca, tucuilla runacunata tandachishpa, Rabá shuti puebloman rishpami, chaipi causajcunahuan macanajushpa, chai pueblota quichurca.

30Chai pueblota jatun mandajpaj umamanda, coronatapashmi quichurca. Chai coronaca, quimsa chunga chuscu kilo orotami pezarca. Chaipica, juyailla rumigucunata churashcapashmi carca. Chaitaca, Davidpaj umapimi churachirca. Chai pueblomandaca, ashtaca imalla valishcacunatami quichushpa aparca.

31Chaipi quedashca gentecunatapash llujchishpa apashpami sierracunahuan, trillana jirrucunahuan, jirru jachacunahuan imatapash ruranajuchun churarca. Shinallata ladrillota, jornocunapi cusachumbashmi churarca. Amonitacunapaj llactapi tiaj tucui pueblocunapi causajcunatapashmi, chashnallata ruranajurca. Chai jipami Davidca, tucuilla paipaj runacunandi, Jerusalenman tigrarca.