1Filisteocunaca, israelcunahuanmi macanajunajurca. Israelcunaca, filisteocunapaj ñaupajmandami pacajushpa calpanajurca. Shinamandami israelcunaca, Gilboa shuti urcupi chugrichi tucushpa huañunajurca.
2Filisteocunaca Saultapash, paipaj churicunatapashmi catinajurca. Shina catishpami filisteocunaca, Jonatán, Abinadab, Malquisúa shuti, Saulpaj churicunata huañuchirca.
3Saúl runahuan ninandapacha macanajushpami, flechata cacharijcunaca, flechahuan chayachirca. Shinami Saultaca, flechata cacharijcuna chugrichirca.
4Chaimandami Saulca, pai jarcarina escudota apaj runataca cashna nirca: “Cambaj espadata llujchishpa, huashaman yalijta ñucata tujsishpa huañuchihuai. Circuncisión nishcata na rurashca chai runacuna shamushpa, ñucata asishpa ricunajuchunga na munanichu” nircami.
Ashtahuangarin pai jarcarina escudota apaj runaca, ninanda manllashpami na huañuchingapaj munarca. Chaimandami Saulca, paipaj espadata japishpa, chai espada pundapi shitarirca.
5Saúl chashna huañujta ricushpami, paipaj escudota apaj runapash, paipaj espada pundapi shitarishpa huañurca.
6Chashnami Saulpash, quimsa paipaj churicunapash huañurca. Shinallata tucui paipaj huasi ucu purapashmi, paihuan huañurca.
7Pugru pambapi causanajuj tucui israelcunaca, Israel soldadocuna pacajungapaj calpanajujta, Saultapash, paipaj churicunatapash huañuchishcatami ricunajurca. Shina ricushpami, paicuna causanajuj pueblocunata saquishpa, pacajushpa rinajurca. Shinamandami filisteocunaca, chai pueblocunaman shamushpa, chaipi causanajurca.
8Chai cayandi punllami, cashna tucurca: Filisteocunaca, huañushcacunapaj churajushcacunata surcungapaj shamushpami Saultaca, paipaj churicunandi, Gilboa urcupi huañushca sirinajujta tarirca.
9Saultaca, churajushcata surcuchishca jipami, umatapash fitishpa, paipaj macanajunacunatapash japinajurca. Chai jipaca, filisteocunapaj tucui llactapimi, paicunapaj yanga dioscunamambash, chaipi causajcunamambash villagrichun, villajcunata cachanajurca.
10Shinallata Saulpaj macanajunacunataca, paicunapaj dioscunapaj huasipimi churanajurca. Paipaj umatapash, Dagón shuti diospaj huasipimi huarcunajurca.
11Saulta, filisteocuna chashna rurashcataca, Galaad llactapi tiaj Jabes shuti pueblopi tucui causajcunami uyarca.
12Chaimandami, ninan shinlli tucuilla runacuna jatarishpa shamurca. Paicunami, Saulpaj cuerpotapash, paipaj churicunapaj cuerpocunatapash japishpa, Jabes shuti puebloman apamunajurca. Chaiman apamushpami paicunapaj tullucunataca, chai pueblo ladopi shayajuj encina nishca quiru ucupi pambarca. Chai jipaca, canchis punllacamanmi na micunajurca.
13Mandaj Diosta pai na cazushpa fiñachishcamanda, yachashpata na cazushcamandami, Saulca chashna huañurca. Paica, Mandaj Dios mandashca shimicunata na cazushpami, yachaj huarmitara tapugrirca.
14Paica, Mandaj Diostaca na tapurcachu. Chaimandami, paipaj causaita quichushpa, mandana llactataca, Isaí runapaj churi Davidman curca.
Who We AreWhat We EelieveWhat We Do
2025 by iamachristian.org,Inc All rights reserved.
