1Chai jipallami, jahua pachapica shuj juyaillagupacha ricurirca: Indita churajushca huarmimi, lunata sarushpa shayajurca. Umapipash, chunga ishcai luzerocunahuan coronata churajushcami carca.
2Chai huarmica, vijsayu cashpa unguna pactajpi ña ungugrijushpami, nanaihuan ninanda caparijurca.
3Shinallata shuj ricuchinapashmi, jahua pachapica ricurirca: Dragón nishca yana puca, canchis umata, chunga cachuta charij, jatun animaltami ñapash ricurcani. Chai umacunapica, canchis diadema nishcata churajushcami carca.
4Chai dragonga, quimsata chaupishpa churashca chai quimsamanda shuj chaupi luzerocunatami, paipaj chupahuan aisashpa, jahua pachamanda cai pachaman urmachirca. Chai dragonga, huahuata ungujhuan micungapajmi, ungunalla huarmipaj ñaupajpi shayajurca.
5Chai huarmica, jari huahuatami ungurca. Chai huahuami, cai pachapi tucui causajcunataca, jirru varahuan mandajunga. Chai huahuataca, mandangapaj tiarinapi tiajuj Taita Diospajmanmi aparca.
6Chai huarmica, Taita Dios alichishca charijuj jichushca pambapi pacajungapajmi rirca. Chaipimi, shuj huaranga ishcai patsaj sucta punllacaman micunata carana carca.
7Chai jipallami, jahua pachapica jatun macanajui tiarca. Miguel shuti angelca, paipaj angelcunadimi, dragonhuan macanajurca. Shinallatami dragonbash, paipaj angelcunandi macanajurca.
8Shina macanajushpapash, chai dragonga na unaicaman macanajui usharcachu. Jahua pachapipash, paicuna causanaca na tiarcachu.
9Chai dragonga, jahua pachamandami shitai tucurca. Paica, pundamandapacha causajuj culebrami. Paillatami, diablo shutipash, Satanás shutipash. Paica, tucui cai pachapi causajcunatami umachin. Paica, paipaj angelcunandimi, alpaman shitai tucurca.
10Chai jipami, cashna nishpa jahua pachapi ninanda caparijta uyarcani: “Cunanmari, ñucanchita quishpichina punlla chayamushca. Ñucanchi Taita Diosca, ninan ushaita charishpa, mandajushcatami ricuchimushca. Pai caramushca Quishpichij Cristo mandajujtapash, ñamari ricuchimushca. Ñucanchi Taita Diospaj ñaupajpi tutapash, punllapash ñucanchi huauquicunata juchachijca, jahua pachamandami shitai tucurca.
11Chai huauquicunaca, yahuarta Llama jichashpa huañushcamanda, Diospaj Shimita villashcamandami, diablotaca mishashca. Huañuchina cajpipash, huañunataca na manllarcachu.
12Chaimandami jahua pachapash, chaipi causajcunapash, cushijuna canguichi. Alpapi causajcuna, mama cuchapi causajcunapash, ¡aij imachari tucunguichi! Diabloca, punllacuna tucurijujta yachashpami, ninanda fiñarishpa cangunapajman uriajumurca” ninajujtami uyarcani.
13Chai dragonga, alpaman ña shitai tucushca cashpami, jari huahuata ungushca huarmitaca huañuchingapaj catijurca.
14Shina catijujpimi, jatun angapaj ishcai alasta chai huarmiman curca. Chai alascunata cujpimi, chai culebrapaj ladomandaca, paipaj pushtu jichushca pambaman rirca. Chai pambapimi, quimsa huata chaupicaman micunata Dios carajpi, chai huarmica causajurca.
15Chai culebrami, paipaj shimimandaca, chai huarmita apachun jatun larca yacutashna shitarca.
16Ashtahuangarin chai dragonbaj shimimanda shitashca yacutaca, alpa pascarishpami langarca. Shina langashpami, chai huarmitaca quishpichirca.
17Chaimandami dragonga, chai huarmitaca ninanda fiñarca. Chashna fiñashpami, chai huarmipaj miraipura quedashca gentecunahuan macanajugrirca. Paicunaca, Taita Dios mandashca shimicunata aliguta cazuj, Jesucristo villashcatapash, aligutami catinajun.
Who We AreWhat We EelieveWhat We Do
2025 by iamachristian.org,Inc All rights reserved.