JEREMÍAS 27 - Quichua Imbabura Bible

Jeremiasca, yugocunatami ricuchishca

1Josías shuti runapaj churi jatun mandaj Joacim shuti runa, Judá llactata mandai callari huatami Mandaj Diosca, cai shimicunata cashna nishpa villachun, Jeremiasta mandarca:

2“Mandaj Diosca, cashnami nihuarca: ‘Huatana huascacunatapash, yugocunatapash rurashpa, cambaj cunga tullupi apari.

3Chaicunataca, Edom, Moab, Amón shuti llactacunata jatun mandajcuna, Tiro shuti, Sidón shuti pueblocunata jatun mandajcuna, Judá llactata jatun mandaj Sedequías shuti runahuan parlachun, Jerusalenman cachamushcacunaman villagrichun ricuchingui.

4Chaicunata ricuchishpaca, paicunata jatun mandajcunaman, cashna nichun cachangui: Tucuita Mandaj, israelcunapaj Taita Diosca, cashnami nin: Cashna nishpami, cangunata mandajcunaman villanguichi.

5Ñucami, cai pachatapash, runacunatapash, animalcunatapash, alpapi tucui imalla tiajtapash, ñuca ninan ushaihuan, ñuca rigrata chutashpa rurarcani. Shinamandami, piman carangapaj munashpapash cararcanilla.

6Cunanga, tucui cai llactacunataca, Babilonia llactata jatun mandaj, ñucata servij Nabucodonosor shuti runapaj maquipimi churarcani. Sacha animalcunatapashmi, paita servichun, paipaj maquipi churarcani.

7Tucui llactacunapi causajcunami, paitapash, paipaj churitapash, chai churipaj churitapash servishpa causanajunga. Paicunapaj llactapajpash, jatun llaqui huatacuna chayangacamanmi, chashna causanajunga. Paicunatapash, ashtaca shuj llactacuna tucuicunata mishaj jatun mandajcuna mishashpami, servichishpa charinga.

8Maijan llacta cashpapash, maijan jatun mandaj cashpapash, chai Babilonia llactata jatun mandaj Nabucodonosor shuti runapaj yugota cunga tullupi aparinshna servingapaj na munajpica, ninandami llaquichisha. Espadahuan, yarjaihuan, jatun ung:uihuan llaquichishpami, paipaj maquihuan llaquichishpa tucuchingacaman chashna rurasha. Mandaj Dios ñucami, chashna nini.

9Shinallata cangunapaj villajcunata, yachajcunata, muscuipi ricujcunata, brujocunata, muspachij yumbucunataca, na uyanachu canguichi. Babilonia llactata jatun mandajta servijcunaca na tucunachu canguichi nishpa, paicuna llullashcataca na uyanachu canguichi.

10Paicunaca, cangunapaj llactamanda cangunata llujchishpa cachangapajllami, llullashpa villanajun. Cangunata ñuca llujchishpa cachajpi, canguna huañuchunmi chashna ninajun.

11Ashtahuangarin Babilonia llactata jatun mandajpaj yugota apachinajuchun cunga tulluta ricuchishpa, paita servij runacunataca, paicunapaj llactapillata causachun saquishallami. Paicunapaj alpapillata, tarpushpa causanajungallami’ ninmi Mandaj Diosca nichun cachangui” nijurcami.

12Judá llactata jatun mandaj Sedequías shuti runamambash, tucui chai shimicunata nishcashnallatami, cashna nishpa villarcani: Babilonia llactata jatun mandajpaj yugota apachinajuchun, cunga tulluta ricuchishpa paitapash, paipaj gentecunatapash servishpa causaichilla. Shina rurashpaca, causanguichimi.

13Mandaj Diosca: “Babilonia llactata jatun mandajta servingapaj na munaj gentecunaca espadahuan, yarjaihuan, jatun ung:uihuanmi huañunga” nircami. ¿Imashpata cambash, cambaj runacunapash, chashna nishcashna huañungapaj munanguichi?

14“Babilonia llactata jatun mandajtaca, na servinachu canguichi” nishpa villajcunataca, na uyanachu canguichi. Paicunaca llullashpami villanajun.

15Paicunaca, napash ñuca cachajpitami, llullashpa ñuca shutipi villanajun. Cangunatapash, cangunaman villanajuj villajcunatapash, caimanda ñuca llujchishpa cachajpi, huañushpa tucurichunllami chashna ninajun ninmi Mandaj Diosca nircanimi.

16Shinallata curacunatapash, tucui cai gentecunatapash cashnami nircani: Mandaj Diosca, cashnami nin: “Ricuichi, Mandaj Diospaj huasipi ima charishcacunata apashcataca, Babilonia llactamanda ñami tigrachimunga nishpa, cangunaman villajcunataca, na uyanachu canguichi. Paicunaca llullashpami villanajun.

17Paicunataca, na cazunachu canguichi. Babilonia llactata jatun mandajta servishpa causaichilla. Shina rurashpaca causanguichimi. ¿Imashpata cai puebloca, llaquinayaita shitai tucunga?

18Paicuna profetacuna cashpaca, Mandaj Dios rimashcata villanajushpaca, tucuita Mandaj Diosta cunanllata mañachunlla. Chashna mañajpica, Mandaj Diospaj huasipi, Judá llactata jatun mandajpaj huasipi, Jerusalenbi ima charishcacuna puchushcataca, Babiloniaman na apangachu ninmi” nircanimi.

19Tucuita Mandaj Diosca, cai pueblopi puchushca jatun pilarcunamandapash, yacuta cuchayachina jatun pilonmanda, caishuj uchilla tanquemanda, chai tanqueta churana carretamanda, ima charishcacuna puchushcamandapashmi chashna nin.

20Chaicunataca, Babilonia llactata jatun mandaj Nabucodonosor shuti runaca, Joacim shuti runapaj churi, Judá llactata jatun mandaj Jeconías shuti runatapash, cai Judá llactapi tiaj Jerusalenbi tucui mandajcunatapash, Babiloniaman prezu apai punllapica, na apashpami saquirca.

21Mandaj Diospaj huasipi, Judá llactata jatun mandajpaj huasipi, Jerusalenbi ima charishcacuna puchushcamandaca, tucuita Mandaj, israelcunapaj Taita Diosca, cashnami nin:

22“Babilonia llactamanmi apai tucunajunga. Ñucallata ricungapaj rishpa tigrachimuna punllacamanmi, chaipi causanajunga. Chai jipaca, ñucallata apamushpami, cai pushtupillata cutin churasha” ninmi Mandaj Diosca.