1Ñuca huahualla, ñuca yachachishca shimicunataca chasquilla.
Ñuca mandashcacunatapash, cambaj shungupi alichingui.
2Ali yachaitaca, aliguta uyangui.
Aliguta yarishpa purinatapash, tucui shunguhuan munangui.
3Ali yachaitaca, caparishpa mañangui.
Aliguta yarishpa purinataca, shinlli mañangui.
4Culquita mascanshna mascangui.
Imapash ninan valishcacunata ninanda mascanshna mascangui.
5Shina rurashpami, Mandaj Diosta manllanataca yachajungui.
Taita Diospaj ali yachaitapashmi taringui.
6Mandaj Diosmi, ali yachaitaca caramujun.
Paipaj shimimandami ali yachajushca canapash,
ali yuyaita charinapash shamun.
7Paimi, alita rurajcunamambash,
na pandachij ali yachaita caramujun.
Aligutalla rurashpa causajcunapaca, jarcarina escudoshnami.
8Alita rurashpa purina ñangunataca cuidanmi.
Paipajlla causajcunapaj ñandapash cuidanmi.
9Shina cuidajpimi, imatapash cashcatapacha
ruranata, ali yuyaita charinata, tucuipaj
ali cachun ruranata, tucuipi ali causanatapash yachangui.
10Cai ali yachaicuna cambaj shunguman
chayajpi, cambaj yachaipash, cambaj almapaj aligu cajpica,
11cai ali shimicunaca, canda alichingami.
Cai ali yuyaicunaca, imamandapash cuidangami.
12Nali causanamandapash, jatun nalita
rimaj runacunamandapash cacharichingapajmi, chashna cuidanga.
13Chai runacunaca, amsa ñangunata puringapajmi,
ali ñangunataca saquinajun.
14Paicunaca, nalita rurashpami cushijunajun.
Paicuna yacharishca jatun nalicunatalla
rurashpami, ninanda asinajun.
15Paicuna purina ñangunaca, quingu ñangunami.
Paicunapaj ñangunaca, quingu ñangunami.
16Na rijsishca huarmimandaca, cacharichi tucunguimi.
Juyailla rimashpa, shujpaj huarmi
urmachinamandapash cacharichi tucunguimi.
17Chai huarmica, chairalla viñai cashpa
cazarashca cusata jichushpami, paipaj Taita
Dioshuan ari ninajushcatapash cungan.
18Chaimandami chai huarmipaj huasica,
huañuiman ashtahuan apajun.
Pai purina ñangunaca, huañushcacunapajmanmi chayachijun.
19Chai huarmipi tucui chayajcunaca, na tigrangachu.
Causaiman rina ñandaca, cutinga na catingachu.
20Shinami canga, alitalla rurajcunapaj ñanda purina cangui.
Imatapash cashcatapacha rurajcuna purina ñangunatami, catina cangui.
21Aligutalla rurajcunallami, llactapica causanajunga.
Ima pandatapash na rurajcunallami, llactapica causashpa catinga.
22Ashtahuangarin Diosta na manllajcunaca,
llactamanda anchuchi tucungami.
Yachashpata na cazujcunapash,
sapimanda llujchinshnami shitai tucunga.
Who We AreWhat We EelieveWhat We Do
2025 by iamachristian.org,Inc All rights reserved.
