JEREMÍAS 17 - Quichua Imbabura Bible

Judá llactapaj juchaca, shungupi escribishcashnami tiajushca

1“Judá llactapi causajcunapaj juchaca, cincel nishca jirruhuan, diamante nishca rumi pundahuan escribishcashnami tiajun. Cangunapaj shungupica, tablapi labrashpa escribishcashnami tiajun. Cangunapaj altar cachucunapipash, chashnallatami tiajun.

2Cangunapaj huahuacunapash, fanga junda quiru ladocunapi, jatun lomacunapi canguna churashca altarcunata, Asera shuti huarmi diosman rijchajcunatami yarinajun.

3Chai altarcunaca, urcu jahuacunapi, pambacunapimi shayanajun. Cangunapaj tucui llacta urcu jahuacunapi altarcunata shayachishpa, juchata canguna ruranajushcamandami, cangunapaj tucui imalla ninan valishcacunatapash, shuhuacuna apachun cusha.

4Ñuca carashca cai llactatapash jichushpami, canguna na rijsishca llactaman ringuichi. Chaipimi, cangunata fiñajcunata servichishpa causachun churasha. Cangunaca, ninata japichinshnami ñucataca fiñachihuarcanguichi. Chai ninaca, causaita causaicaman rupajungallami” ninmi.

5Mandaj Diosca, cashnami nin: “Mandaj Dios ñucamanda anchurishpa, huañuna runatara paipaj rigratashna yariaj causaj runaca, llaquichi tucungapachami. Paipaj shungupash, Mandaj Dios ñucamandaca anchurijunmi.

6Paica, jichushca pambapi viñashca retama yurashnami causajunga. Ima ali shamujtapash, paica na ricungachu. Chaquishca alpalla tiaj, gentepash na causaj, jichushca pambacunapillami causajunga.

7Ashtahuangarin Mandaj Dios ñucata yariajlla causashpa, shinallata Mandaj Dios ñucata shuyaj runaca, bendiciai tucungapachami.

8Paica, yacu manñapi tarpushca quirushnami canga. Ninanda rijuj yacupi sapiyashca quirushnami canga. Ninan indi rupajpipash, na anguyashpa, verde verde fanga shayajungallami. Tamia na tiaj huatapipash na chaquishpa, granota fucungallami.

9Runapaj shunguca, tucui imatapash yali umachijlla, jatun nalimi. ¿Chaitaca pipash rijsingachu?

10Mandaj Dios ñucami, aligutapacha rurashpa, tucuicunapaj yuyaitapash, shungutapash callarimanda ricujushpa yachani. Paicuna imashna causashcamandapash, imatalla rurashcamandapash cungapajmi, chashna ricujuni” ninmi.

11Imatapash cashcatapacha na rurashpata ninanda charijyaj runaca, sacha atalpa napash pai huachashca lulunda ugllajunshnami. Paica, chaupi causaipillami saquishpa huañunga. Jipa punllacunapica, juizu illajmi canga.

12Dios mandashpa tiajuj punchapamba tiarinaca, callarimandapacha tucuita yali jahuamanmi tiajun. Chaica, ñucanchi Diospajlla huasimi.

13¡Mandaj Dioslla, canga israelcuna canda yariajlla shuyana Diosmi cangui! Canda saquijcunaca, tucuicunami pingai tucunajunga. Causaita cuj yacu llujshijunshna Mandaj Dios ñucata saquishpa ñucamanda anchurijcunaca, ñutu alpapi escribishcashnami canga.

14Mandaj Dioslla, canmi ñuca alicachina Dios cangui. Canllata alichihuayari. Can alichijpica, ali tucushapachami. Quishpichihuayari. Can quishpichijpica, quishpirishapachami.

15Ricui, paicunaca ñucataca cashnami ninajun: “¿Mandaj Dios rimashca shimicunaca, maipitayari? ¡Cunanda pactachijta ricungapajmi munanchi!” ninajunmi.

16Ashtahuangarin ñucaca, paicunata can llaquichijuchunga, na catiriashpa mañajurcanichu. Paicunapaj jatun llaqui punlla chayamuchumbash, na munarcanichu. Chaitaca, canllata yachanguimi. Cambaj ñaupajpillatami, ñuca shimihuan imatalla rimashcapash llujshiparca.

17Canga, llaqui punllacunapipash, ñucata pacajmari cangui. Shina cashcamandaca, ama manllachihuaichu.

18Ñucata pingaichingapaj randica, ñucata catiriashpa llaquichijcunata pingaichipairi. Ñuca manllarina randica, paicuna manllarichun. Jatun llaqui punllataca, paicunaman cachamupairi. Llaquichishca cashpapash, ashtahuan llaquichipairi.

Samana punllataca yarinami canguichi nishcami

19Mandaj Diosca, cashnami nihuarca: “Chai pueblopi causaj gentecuna yaicuna punguman rishpa shayarigri. Chaitaca, Judá llactata jatun mandajcunami yaicunajun, llujshinajun. Shinallata Jerusalenbi tiaj, tucui pungucunapipash shayarigringui.

20Chaipi shayarishpaca, cashna ningui: Cai pungucunata yaicuj, Judá llactata jatun mandajcuna, Judá llactapi tucui causajcuna, Jerusalenbi tucui causajcunapash, Mandaj Dios rimashcata uyaichi.

21Mandaj Diosca, cashnami nin: ‘Cangunapaj causaitaca, llaquinami canguichi. Samana punllapica, Jerusalén pungucunataca, imatallapash na apashpa yaicumunachu canguichi.

22Samana punllapica, cangunapaj huasimandaca, imatallapash na llujchinachu canguichi. Ima ruranatapash, na ruranachu canguichi. Ashtahuangarin samana punllataca, cangunapaj ñaupa taitacunata ñuca mandashcashna, ñucapajlla cachunmi shicanyachina canguichi.

23Shina mandajpipash, paicunaca na rinrita mañachishpa uyarcachu. Ashtahuangarin ninandapacha shinlliyashpami, napacha uyarca. Jarcashpa rimashcatapash, napacha chasquinajurcachu’ ninmi ningui” nihuarcami.

24Shina cajpipash Mandaj Diosca, cashnami nin: “Canguna ñucata cazushpaca, samana punllapica cai pueblo pungucunataca, imatallapash na apashpa yaicumunachu canguichi. Ashtahuangarin samana punllataca, ñucapajlla cachun shicanyachishpami, ima ruranatallapash na rurana canguichi.

25Shina rurashpaca, Davidpaj tiarinapi tiarij jatun mandajcunapash, caishuj mandajcunapash caballocunapi, carretacunapimi, cai pueblo pungucunataca yaicumunajunga. Shuj mandajcunapash, Judá llactapi causaj runacunapash, Jerusalenbi causanajujcunapashmi, paicunahuan yaicumunajunga. Chashnami cai pueblopica, causaita causanajunga.

26Shinallata Judá llactapi tiaj tucui pueblocunamanda, Jerusalén muyundi ladocunamanda, Benjamín llactamanda, Sefela shuti pambamanda, Neguev urcucunamandapashmi caiman shamunajunga. Ñucaman animalta cushpa tucuillata rupachingapajpash, ñucaman imatalla caranatapash, inciensotapash, ñucata alicachingapaj huañuchishpa carana animaltapash apamushpami, Mandaj Dios ñucapaj huasiman shamunajunga.

27Ashtahuangarin samana punllata shicanyachinajuchun ñuca mandashcata na uyajpica, chai samana punllapi imatallapash apashpa, Jerusalén pungucunata yaicushpa ucuman churamujpica, chai pungucunaman ninata cachamushpami rupachisha. Chai ninaca, Jerusalenbi tiaj mandana huasicunandimi rupachinga. Chai ninaca rupajungallami” ninmi.