1Mandaj Diosca, cashnami nirca: “¿Ñucachu cangunapaj mama Israel llactataca, jichushpa saquina cartata cushpa, jichushpa saquircani? Na cashpaca, ¿pipash ñucaman tigrachina culquimandachu jatushpa saquircani? Ricuichi, canguna nalicunata rurashcamandami, jatui tucushcanguichi. Cangunallata na cazushcamandami, cangunapaj mama llactaca jichui tucushca?
2¿Imashpata ñuca shamushpaca, pitapash na tuparircani? ¿Imashpata ñuca cayajpipash, pipash na tigrachihuarca? Cangunata quishpichingapaca, ¿nachu maquita charini? Cangunata quishpichingapaca, ¿nachu ushaita charini? Ricuichi, ñucaca mama cucha yacutapash rimashpallami chaquichini. Jatun yacucunatapash, jichushca pambatami rurani. Chaipi tiaj pijicunapash, yacu illajpi yacunayachishpami, huañushpa ismun.
3Jahua pachatapash ñucami, yana tutahuan quilpani. Cañamuta churachinshnami quilpani” ninmi.
4Mandaj Jatun Diosmi, shaijushca causajcunaman villai ushachun, alipacha yachajushca shimicunata, ñucaman cuhuarca. Pai yachachishcacunataca alipacha yachajushcacunashna, uyachunmi pacarin pacarin uyana yuyaita carahuanga.
5Mandaj Jatun Diosmi, rinrita pascahuarca. Chaimandami ñucaca, huashamambash na tigrashpa, paita uyashpa cazurcani.
6Astishpa chugrichinajujpipash ricuchijurcanillami. Ñuca barbasmanda chutachumbash ricuchijurcanillami. Ñucata t'ucashpa nalicachishpa rimanajujpipash, ñuca ñavitaca na pacarcanichu.
7Mandaj Jatun Diomi ayudahuanga. Chaimandami, na pingai tucurcani. Chaimandami ñuca ñavitaca, shinlli rumitashna rurashpa, llaquita aparcani. Ñuca na pingai tucunataca yachanipachami.
8Ñuca llaquicunamanda quishpichijca, ñuca ladopimi. ¿Pita ñucahuan fiñanajushpa rimaringapaj munan? Tandanajushunchilla. ¿Pita ñucata na ricunayachishpa, juchachishpa rimangapaj munan? Ñucapajman quimirimuichilla.
9Ricuichi, ñucataca Mandaj Jatun Diosmi ayudahuanga. ¿Pita ñucata juchachishpa, llaquipi churangapaj munajcunaca tianga? Uyaichi, paicunaca churajunashnami maucayashpa tucuilla tucuringa. Polilla jurumi, micushpa tucuchinga.
10Canguna puramandaca, ¿maijanda Mandaj Diosta manllashpa, paita servij villashcatapash, uyajcuna tianguichi? Shina cashpaca, yana yana tutapi purij cashpapash, punchallagupi puringapaj munashpaca, Mandaj Diospaj shutita yariajlla causaichi. Taita Diospi marcarichi.
11Ricuichi, cangunaca tucuicunami ninata japichijcuna canguichi. Chai nina japichishca muyundipimi, tianajujta yachanguichi. Cangunaca, chai ninata japichishca punchayachijujpillata purinajuichilla. Ñuca maquimandami, chaicunaca shamunga. Cangunaca, llaquinayaita huañushpami, pambai tucunguichi.
Who We AreWhat We EelieveWhat We Do
2025 by iamachristian.org,Inc All rights reserved.
