2 CRÓNICAS 7 - Quichua Imbabura Bible

1Diosta mañashpa Salomón tucuchijhuanmi, jahua pachamanda nina urai shamurca. Chai ninami, Diosman cushpa tucuilla rupachinatapash, animalcunapaj aichatapash, tucuillata rupachirca. Diospaj huasipica, Mandaj Diospaj punchapambagumi jundarca.

2Mandaj Diospaj punchapamba, Mandaj Diospaj huasipi jundashcamandami curacunaca, Mandaj Diospaj huasiman yaicuitaca na ushanajurca.

3Ninapash, Mandaj Diospaj punchapambagupash, chai huasi jahuaman urai shamujta tucui isarelcuna ricushpami, rumicunahuan llambullaguta rurashca jahuapi cungurishpa, alpaman chayajta cumurinajurca. Shina cumurishpami, Mandaj Diosta alicachishpa cashna ninajurca: “Paica alimari, pai llaquinaca causaita causaipajmari” ninajurcami.

4Chai jipami, jatun mandajpash, chaipi tucui tandanajushca gentecunapash, Mandaj Diospaj ñaupajpi animalcunata cushpa huañuchinajurca.

5Jatun mandaj Salomonga, ishcai chunga ishcai huaranga huagracunata, patsaj ishcai chunga huaranga llamacunatami, Diosman cushpa huañuchijurca. Chashnami jatun mandajpash, tucui israelcunapash Taita Diospaj huasitaca, Diosmanllata minganajurca.

6Curacunaca, Diospajta ruranatallatami ruranajurca. Levitacunapash, Mandaj Diosman tocanacunatami tocanajurca. Chaicunataca, jatun mandaj Davidmi, Diospaj llaquinaca causaita causaicaman cajpi, Mandaj Diosta alicachingapaj rurachishca carca. Chai tocanacunahuanmi Davidca, Diosta alicachijun carca. Shinallata curacunapash, paicunapaj ñaupajpimi trompetacunata tocanajurca. Tucui israelcunapashmi, chaipi shayanajurca.

7Salomonga, Mandaj Diospaj huasi ñaupajpi tiajuj chaupi patiotapashmi, Diospajlla cachun mingarca. Diosman cushpa tucuillata rupachina animalcunatapash, Dioshuan ali cangapaj carashca animalcunapaj viratapash, chaipi rupachishcamandami chashna mingarca. Salomón rurachishca bronce altarpica, tucuillata rupachina animalcunata, ashtahuan imatalla carashcacunata, viracunata rupachingapaca na pactajpimi, chaipi rupachijushca carca.

8Chaimandami Salomonga, canchis punllacaman fiestata rurarca. Paihuanga, Hamat shuti puebloman yaicuna ladomandaca, Egipto llacta jatun larca yacu ladocaman causanajuj tucuilla israelcunami, ashtacapacha tandanajurca.

9Pusaj punllapica, jatun tandanajuitami rurarca. Diospaj huasipi tiaj altarta Diosman mingashpa, canchis punllata tandanajushcamanda, shinallata canchis punllatallata jatun fiestata rurashcamandami tandanajurca.

10Huatapaj canchis quilla ishcai chunga quimsa punllapimi jatun mandajca, gentecunataca paicunapaj huasicunaman cacharca. Mandaj Diosca Davidmambash, Salomonmambash, Diosllata agllashca israelcunamambash, alicunata rurashcamandami tucui shungu cushijushpa rinajurca.

Taita Diosca, Salomonhuanmi ari nijushca(1 Rey. 9:1-9)

11Salomonga, Mandaj Diospaj huasitapash, pai jatun mandajpaj huasitapashmi rurashpa tucuchirca. Mandaj Diospaj huasipi, paipaj quiquin huasipi tucui imata rurangapaj munashcapash, Salomón runapaca, tucuimi ali llujshirca.

12Chai jipami Mandaj Diosca, Salomonman tuta ricurishpa cashna nijurca:

“Can mañashcataca uyarcanimi. Cai pushtutapash, animalcunata ñucaman cushpa huañuchina huasi cachunmi agllarcani.

13Ñucaca ama tamiachunmi, jahua pachata vichasha. Chagracunata tucuchinajuchunmi, langosta jurucunata cachamusha. Na cashpaca ñuca agllashcacunapajmanmi, ung:uicunata cachamusha.

14Shina cachamujpimi, ñuca agllashcacunaca ninanda llaquiringa. Paicunamandami, ñuca shutipi mañanajushca. Ñucata mañashpa, ñucata mascashpa, nalita paicuna ruranajushcata saquishpa ñucapajman tigrarimujpica, ñucapash jahua pachamanda uyashami. Paicunapaj juchacunatapash cungashami. Paicunapaj alpapi ali fucuchumbash alichishami.

15Cunanga ricuriashpami, cai huasipi mañashcataca aliguta uyajusha.

16Cunanga cai huasitaca, causaita causaicaman ñuca shuti chaipi causachunmi, ñucapajlla cachun agllarcani. Cai huasitaca, causaita causaicaman ricuriajushalla, yariajushallami.

17Cambaj taita Davidshnallata ñuca ñaupajpi tucuita aliguta rurachun, ñuca mandashcacunata, pactachinajuchun ñuca cushca shimicunata, imata rurachun mandashcunata cazushpa causangui.

18Shina causajpica, ñucami cambaj taita Davidhuan ari nishcashnallata can mandangapaj tiarinataca, shinllitapacha churasha. Paimanmi cashna nircani: ‘Cambaj mirai puramandaca, Israel llactata mandaj runaca na illangachu’ nircanimi.

19Ashtahuangarin cangunapaj ñaupajpi churashca, pactachinajuchun cushca shimicunata, ñuca mandashcacunata saquishpa, huashaman tigrashpa, shuj dioscunatara servishpa, chaicunata ninanda alicachishpami causanguichi.

20Shina causajpica, cangunaman carashca llactamandaca llujchishpami cachasha. Shinallata ñuca shutipi mañana ñucapajlla cachun shicanyachishca cai huasitapashmi, ñuca ñaupajmanda anchuchisha. Shina rurashpami, tucuilla llactacunapi causajcuna ninanda asishpa nalicachinajuchun saquisha.

21Cai juyailla huasica, cai ladota tucui yalijcunapaj ninanda manllarinami canga. Paicunaca cashnami ninajunga: ‘¿Mandaj Diosca imashpata cai llactatapash, cai huasitapash chashna llaquichishcayari?’ ninajungami.

22Shina nijpimi, cashna nishpa tigrachinajunga: ‘Paicunallatamari, paicunapaj ñaupa taitacunata Mandaj Taita Diosmanda anchurinajurca. Egipto llactamanda llujchimuj Diosmanda anchurishpami, shuj dioscunatara juyanajurca. Chaicunatami ninanda alicachishpa, servishpa causanajurca. Chaimandami, cai tucui llaquita paicunapaj jahuapi cachamushca’ ninajungami” nijurcami.