Psalms 90 - Quichua Imbabura Bible

LIBRO IVTaita Diosca causaitami causajun, runaca ashacamanllami causanDiosta servij Moisés mañashca shimicunami

1Jatun Dioslla, canmi mirai

miraicunacaman ñucanchi pacajuna cangui.

2Urcucunatapash nara rurashpallata,

cai pacha llactacunatapash nara

churashpallatami, canga ña tiashcangui.

Na tucurina causaita causaicamambash,

canmi Taita Dios cangui.

3Runacunataca, rucuyangacaman charishpami:

“Huañuna aichayu runacunaca, alpallata

tigraichi” nishpa, alpamanllata tigrachingui.

4Cambaj ricuipica, huaranga huatacunaca

caina punlla yalishcashnami,

asha horas tutashnallami.

5Runacunataca, ninanda jatarijuj

yacuhuan apanshnami tucuchingui.

Paicunaca muscuipishna, tutamandata

viñaj jihuashnami tucurinajun.

6Jihuaca, tutamanda viñashpa sisashpaca,

chishipaca fitijpi chaquinllami.

7Can ninandapacha fiñarishpami,

ñucanchitaca tucuchingui.

Can ninanda fiñarijpimi, ñucanchica musparinchi.

8Ñucanchi nalita rurashcataca,

cambaj ñaupajpimi churashcangui.

Ñucanchi pandashcatapash, cambaj

ñavi ricunallapimi churashcangui.

9Can ninanda fiñarishcamandami, ñucanchi

causaica tucurishpa catijun.

Ñucanchi huatacunaca, imatapash

yarishcashnami tucurin.

10Ñucanchi causana punllacunaca,

canchis chunga huatacamanllami.

Ashtahuangarin ninan shinllicunallami,

pusaj chunga huatata causanga.

Ashtahuangarin ninan shinlli cashpapash,

llaquita apashpa, llaquinayaita causangapajllami.

Huatacunaca ñapash yalijpimi, calpanshna rinchi.

11Cambaj ushaihuan ninanda fiñarishcataca,

¿pita rijsin?

Manllana cashcashnallata can ninanda

fiñarishcataca, ¿pita rijsin?

12Shina cashcamanda ñucanchi shungupi alipacha

yachajushca cangapaca, ñucanchi causana punllacunata

cuentanata yachachihuayari.

13Mandaj Dioslla, tigramupairi.

¿Ima horata tigramugripangui?

Canda servijcunahuanga, ali tucupairi.

14Tutamandata, can llaquishcahuan ayudahuayari.

Tucui ñucanchi causaipimi,

ñucanchipash cushijushpa candapashun.

15Ñucanchitaca, mashna punllacunata

llaquichishcashnallata cushichihuayari.

Chai tucui huatacunatamari,

nalita ricushpa causarcanchi.

16Canda servijcunaca, can rurashcacunata ricuchun.

Paicunapaj huahuacunaca, can

punchapamba cajta ricuchun.

17Ñucanchita Mandaj Taita Dioslla, cambaj

michaguca ñucanchita punchayachijuchun.

Ñucanchi maquihuan imatalla ruranataca,

ñucanchipica shinllitapacha churapailla.

Ari, ñucanchi maquihuan imatalla ruranataca,

shinllitapacha churapailla.