2 REYES 16 - Quichua Imbabura Bible

Acaz shuti runami mandajushca(2 Crón. 28:1-27)

1Remalías shuti runapaj churi Peka shuti runaca, chunga canchis huatata, Israel llactata ña mandajujpimi, Jotam runapaj churi Acaz shuti runaca, Judá llactata mandai callarirca.

2Acaz runaca, ishcai chunga huatata charishpami, mandai callarirca. Paica, chunga sucta huatatami, Jerusalenbi mandajurca. Paica, paita Mandaj Taita Diospaj ñaupajpica, na paipaj ñaupa taita Davidshna alita rurashpa causarcachu.

3Ashtahuangarin Israel llactata jatun mandajcunashnallatami, nalitalla rurashpa causajurca. Shuj llactapi causajcunata, israelcunapaj ñaupajmanda Mandaj Dios llujchishpa cachashca gentecuna millanayaicunata rurashpa causashcashnallatami, Acaz runapash, paipaj churita ninapi rupachirca.

4Shinallata lomacunapi tiaj altarcunapi, uchilla lomacunapi fanga junda tucui quiru ucucunapimi, animalcunata huañuchishpa, inciensotapash cushnichijurca.

5Shinamandami, Siria llactata jatun mandaj Rezín shuti runapash, Remalías shuti runapaj churi, Israel llactata jatun mandaj Peka shuti runapash, Jerusalenbi causajcunahuan macanajushpa, Acaz runata chaupipi churashpa japingapaj vichai shamunajurca. Shina shamushpapash, na japi usharcachu.

6Chai huatallatami, Edom llactata jatun mandajca, Elat shuti pueblota Edom llactapajllata cachun cutin quichurca. Chaimandami Judá llactamanda runacunataca, Elat pueblomanda llujchishpa cacharca. Shina cachashpami, Edom llacta runacunaca, Elat pueblopi causaj shamurca. Cunangamanmi chaipillata causanajun.

7Chaimandami Acaz runaca, Asiria llactata jatun mandaj Tiglat-pileser shuti runaman cashna nichun, paipaj randi parlajcunata cacharca: “Canda servij ñucaca, cambaj churishnallatami cani. Shina cashcamanda Siria llactata jatun mandajpaj maquimandapash, Israel llactata jatun mandajpaj maquimandapash mitsangapaj vichai shamupai. Paicunami, ñucata fiñashpa jatarishca” nichunmi cacharca.

8Mandaj Diospaj huasipipash, jatun mandaj mandashpa tiajuna huasipipash alichishca culquita, orota japishpami Acaz runaca, Asiria llactata jatun mandajman carachun cacharca.

9Chai carashcata japishpami, Asiria llactata jatun mandajca, Damasco pueblopi causajcunahuan macanajungapaj vichai rishpa, chai pueblotaca japirca. Chai pueblopi causajcunatapash, Asiria llactata jatun mandajca, Kir shuti pueblomanmi prezu aparca. Shinallata Rezín shuti runatapashmi huañuchirca.

10Chai jipami, jatun mandaj Acaz runaca, Asiria llactata jatun mandaj Tiglat-pileser shuti runata, Damasco pueblopi tuparingapaj rirca. Chaiman chayashpami, jatun mandaj Acaz runaca, Damascopi tiaj altarta ricurca. Chashna ricushpami, chai altar mashna medijta, chai altar imashna cajta, tucui imashna rurashcata dibujashpa, Urías shuti curaman cuchun cacharca.

11Urías curami, altartaca rurarca. Jatun mandaj Acaz runa tucuita rurashpa, Damasco pueblomanda cachamushcashnallatami, Urías curapash rurarca. Chaita rurangacamanmi, jatun mandaj Acaz runaca, Damasco pueblomanda tigramujurca.

12Damasco pueblomanda tigramushca jipami, jatun mandajca chai altarta ricurca. Chai altar ladoman quimirishpami, jatun mandajca chai altar jahuapi animalcunata cushpa huañuchirca.

13Shinallata animaltapash tucuillata rupachishpa, ashtahuan imatapash carashpami, vinotapash chai jahuapi talirca. Dioshuan ali cangapaj carashpa huañuchishca animalcunapaj yahuartapashmi, altar ladopi tsirapachirca.

14Chai jipami, Mandaj Diospaj ñaupajpi tiajuj bronce altartapash, Diospaj huasi ñaupajmanda anchuchirca. Chai altarca, Mandaj Diospaj huasipash, Acaz runa rurachishca altarpash shayanajuj chaupipimi tiajurca. Chai mushuj altar janaj ladomanmi, bronce altartaca churarca.

15Chai jipami, jatun mandaj Acaz runaca, Urías curataca cashna nishpa mandarca: “Cai altarpica, tutamanda tucuillata rupachingapaj Diosman cushca animaltapash, chishi rupachingapaj ashtahuan imatalla cushcatapash rupachingui. Tucuillata rupachingapaj ñuca cushca animaltapash, ashtahuan imatalla cushcatapash tucuillata rupachingui. Shinallata tucui cai llactapi causaj gentecuna Diosman cushca tucuillata rupachina animalcunatapash, ashtahuan imatalla cushcatapash rupachingui, vinotapash talishpa cushnichingui. Shinallata tucuillata rupachina animalpaj yahuartapash, huañuchishca animalcunapaj yahuartapash, cai altarpica tucuillata tsirapachingui. Cai bronce altartaca, Diosta ñuca tapungapajllami charisha” nircami.

16Cura Urías runaca, jatun mandaj Acaz runa imashna mandashcashnallatami, tucuita rurarca.

17Jatun mandaj Acaz runaca, yacu tanqueta vichai charijuj tablacunata cuchushpami, chai yacu tanquecunatapash anchuchirca. Bronceta rurashca huagracunapaj jahuapi churashca mama cucha nishcatapash anchuchishpami, rumicunata churashca jahuapi churarca.

18Shinallata samana punllacunapi tandanajungapaj Diospaj huasipi rurashca corredortapash, jatun mandaj yaicuna ñandapashmi, Mandaj Diospaj huasimandaca anchuchirca. Asiria llactata jatun mandajta manllaimandami, chashna rurarca.

19Acaz shuti runa imatalla ashtahuan rurashcacunapash, ¿nachu Judá llactata jatun mandajcuna imatalla rurashcacunata escribishca libropi tiajun?

20Jatun mandaj Acaz runa huañushpa, paipaj ñaupa taitacunahuan tandanajujpica, chai taitacunata pambashca ladopillatami, Davidpaj pueblopi pambarca. Paipaj randica, paipaj churi Ezequiasmi mandajurca.