2 SAMUEL 19 - Quichua Imbabura Bible

Jerusalenmanmi Davidca tigrashca

1“Ricui jatun mandajca, Absalón huañushcamandami ninandapacha llaquirishpa huacajun” nishpami, Joab runaman villanajurca.

2Shinamandami chai punllapica, macanajuita mishashcamanda cushijunaca, jatun llaquiman tigrarca. “Jatun mandajca, paipaj churi huañushcamandami, ninanda llaquirishca” nijtami, soldadocunaca uyashca carca.

3Chaimandami soldadocunaca chai punllapica, Jerusalén puebloman pacalla yaicunajurca. Macanajuipi mishai tucushpa, pinganayaita pacajushpa shamushcashnami, soldadocunaca yaicunajurca.

4Ashtahuangarin jatun mandajca, paipaj ñavita quilparishpami, ninanda caparishpa: “¡Absalón, ñuca huahualla, Absalón, ñuca huahualla, ñuca huahualla!” nishpa huacajurca.

5Chaimandami Joab runaca, jatun mandajpaj huasiman shamushpa, cashna nijurca:

—Cunanga, canda servijcunataca, tucuicunatami ninanda pingaichishcangui. Cambaj causaitapash, cambaj churicunapaj, ushicunapaj causaitapash, cambaj huarmicunapaj causaitapash, cambaj caishuj huarmicunapaj causaitapash cunan quishpichijpitami, cashna rurashcangui.

6Canda ninanda fiñajcunatara juyashpa, canda ninanda juyajcunataca fiñashpami, can churashca mandajcunatapash, canda servijcunatapash cunanga, yangapi churashcata ricuchijungui. Absalón causajpi ñucanchica tucuilla huañushca cajpirapashmi, cushijushca canguiman carca. Chaitaca, cunanmi alipacha ricuni.

7Cunanga, jatarishpa canllaman llujshishpa, canda servijcunataca imallatapash nishpa cushichipai. Mandaj Diospaj shutipi juramentushpami, cashna nini: Imatallapash ningapaj na llujshijpica, cunan tutallatami shuj runallapash, canhuanga na quedanga. Chashna tucujpica, huambramandapacha cunangaman apajushca llaquicunatapash ashtahuan yali llaquicunatami apangui— nijurcami.

8Shina nijpimi jatun mandajca, jatarishpa rishpaca puebloman yaicuna pungupi tiarigrirca. Chaitami, tucui gentecunaman cashna nishpa villarca: “Ricuichi jatun mandajca, puebloman yaicuna pungupimi tiajun” nijpimi, tucui gentecunaca jatun mandajpaj ñaupajman shamunajurca. Ashtahuangarin israelcunaca, paicunapaj carpacunamanmi pacajushpa rishca carca.

9Shinallata tucui gentecunami, Israel aillu puracunapica, cashna ninajurca: “Jatun mandaj Davidca, ñucanchita fiñajcunapaj maquimandapash, filisteocunapaj maquimandapashmi quishpichirca. Shina cashpapash cunanga, Absalonda manllashpami, cai llactamanda llujshishpa rishca.

10Absalondaca, ñucanchita jatun mandaj cachunmi, aceiteta talishpa javircanchi. Paica, jatun macanajuipimi huañushca. ¿Cunanga, imashpata jatun mandaj Davidtaca, na tigrachimushpa upalla shuyanajunchilla?” ninajurcami.

11Chaimandami jatun mandaj Davidca, Sadoc shuti, Abiatar shuti curacunata cashna nishpa cacharca: “Judá llactata mandaj rucucunata, cashna nigrichi: ‘Jatun mandajta, pai mandashpa tiarina huasiman tigrachimunataca, ¿imashpata cangunara na ucha yaringuichi? Ashtahuangarin tucui israelcunarami, paipaj huasiman tigrachishun ningapaj, jatun mandajpajman shamushca.

12Cangunacarin ñuca huauquicuna, ñuca tullucuna, ñuca aichacunami canguichi. Shina cashpapash, jatun mandajta huasiman tigrachimunataca, ¿imashpata cangunara na ucha yaringuichi?’ nigrichi.

13Shinallata Amasa shuti runatapash, cashna ninguichi: ‘¿Nachu cambash, ñuca tullullata, ñuca aichallata cangui? Shina cashcamanda soldadocunata mandashpa, ñuca ñaupajpi causajuchun Joab runapaj randi canda na churajpica, Taita Diosllata ñucataca ninandapacha llaquichihuachun ninmi’ ninguichi” nishpami cacharca.

14Shina cachajpimi, Judá llactapi causanajuj tucui runacunaca, shujllashnalla yarishpa, paicunapaj shungupi ashtahuan juyanajurca. Shina juyashpami: “Cambash, canda tucuilla servijcunapash tigramuilla” nishpa villachun, jatun mandajpajman cachanajurca.

15Shina nijpi jatun mandaj tigramushpami, Jordán yacu manñaman chayamurca. Shinallata Judá llactamanda runacunapashmi, Jordán yacuta chimbachingapaj, Gilgal shuti pueblopi tuparij shamunajurca.

16Bahurim shuti pueblopi causaj Benjamín aillu puramanda, Gera shuti runapaj churi Simei shuti runapashmi, Judá llactamanda runacunandi, jatun mandaj Davidta chasquingapaj, ucha urai shamujurca.

17Paihuanga, Benjamín aillumanda, huaranga runacunapashmi shamunajurca. Shinallata Saulpaj huasi ucu purata servij Siba shuti runapash, paipaj chunga picha churicunandi, paita servij ishcai chunga runacunandimi shamunajurca. Paicunaca, jatun mandajta ñaupashpami, Jordán yacuta chimbanajurca.

18Paicunaca, yacuta chimbai ushanallata ña chimbashpami, jatun mandajpaj familiacunatapash, chimbachishpa ayudarca. Pai munashcata pactachingapajmi chashna rurajurca. Jordán yacuta ña chimbashca jipami, Gera shuti runapaj churi Simei shuti runaca, jatun mandajpaj ñaupajpi cungurishpa,

19jatun mandajtaca cashna nirca:

—Ñucata mandajlla, jatun nalita ñuca rurashcamandaca, ama llaquichihuanguichu. Ñuca amo, jatun mandajlla. Jerusalenmanda rijui punllapi ñuca, nalicunata rurashcataca, yaritapash ama yaripanguichu. Can jatun mandajpaj shungupica, ama alichishpa charipanguichu.

20Canda servij ñuca chashna juchata rurashcamandaca llaquiripanimi. Chaimandami cunanga, Josepaj mirai puracunamandaca, ñuca amo can jatun mandajta chasquingapaca, ñucara punda shamuparcani— nircami.

21Shina nijpimi, Sarvia shuti huarmipaj churi Abisai shuti runaca, cashna nirca:

—Mandaj Dios agllashpa churashca jatun mandajta ninanda nalicachishpa rimashcamandaca, cai Simei shuti runaca, ¿nachu huañunata charin?— nircami.

22Shina nijpimi Davidca, cashna nirca:

—Sarvia shuti huarmipaj churicunalla, canguna cunan ñucata fiñajcuna tucuchunga, ¿imatata rurarcaniyari? Israel puramandaca, shujllapash cunanga na huañungachu. Cunanga, ñucaca israelcunata jatun mandajmi cani. ¿Chaitaca, nachu ñucallata yachani?— nircami.

23Shina nishca jipami jatun mandajca, Simei shuti runataca:

—Napacha huañunguichu— nishpa juramenturca.

24Shinallata Saulpaj nieto Mefi-boset shuti runapashmi, jatun mandajta tuparingapaj urai shamurca. Paica, Jerusalenmanda jatun mandaj llujshishpa rishca punllamandapacha, imapash na tucushpa aliguta cutin tigramuna punllacamanmi, paipaj chaquitapash na maillashca, barbastapash na anchuchishca, paipaj churajunatallapash na tajshashca shuyajushca carca.

25Jatun mandajta Jerusalenbi tuparingapaj pai shamujpimi, jatun mandajca:

—Mefi-boset, ¿imashpata na ñucahuan rircangui?— nishpa tapurca.

26Shina tapujpimi Mefi-boset runaca, cashna nirca:

—Jatun mandaj ñuca amolla, ñucata servij runami umahuarca. ‘Canda servij ñucaca, janga cashpami burropi tiarishpa, jatun mandajhuan tuparingapaj risha yashpa, tiarinata burropi churapai’ nircani.

27Ashtahuangarin paimi, canda servij ñucataca, can jatun mandaj ñuca amopaj ñaupajpi llullashpa villashca. Ashtahuangarin can jatun mandaj ñuca amoca, Taita Diospaj angelgushnami cangui. Shina cashcamanda, cambaj ima ali cana cajpipash, rurapailla.

28Ñuca taitapaj huasi ucu puracunaca, tucuicunami can jatun mandajpaj ñaupajpi huañuchi tucunapacha carcanchi. Shina cajpipash canda servij ñucataca, can cayashcacunahuan micuchunmi, cambaj mezapi churahuarcangui. Cunanga, can jatun mandajtaca, imata ashtahuan mañaitapash na ushapanichu— nircami.

29Shina nijpimi jatun mandajca, cashna nirca:

—Imatapash ashtahuanga ama nihuaichu. Canhuan, Siba shuti runahuanga, alpacunata chaupirichunmi ña mandarcani— nircami.

30Shina nijpimi Mefi-boset shuti runaca, jatun mandajtaca cashna nirca:

—Alpacunataca, tucuillata pai japichun saquipailla. Ñuca amo can jatun mandajca, imapash na tucushpami aliguta huasiman tigramupashcangui— nircami.

31Shinallata Galaad llactapi tiajuj Rogelim shuti pueblomanda Barzilai shuti runapash urai shamushpami, jatun mandajhuan Jordán yacuta chimbamurca. Paica, Jordán chimba ladopi cayaman ningapajmi chimbamurca.

32Barzilai shuti runaca, pusaj chunga huatata charishpami, ña rucu rucugu carca. Paica, ninan charij charij cashcamandami, Mahanaim shuti pueblopi cashpa, jatun mandajpaj ima illajpipash carashpa ayudan carca.

33Chaimandami jatun mandajca, Barzilai shuti runataca cashna nirca:

—Ñucahuan Jerusalenman jaculla. Candaca, ñucami ayudashpa charisha— nircami.

34Ashtahuangarin Barzilai shuti runaca, jatun mandajtaca cashnami nijurca:

—Jatun mandajhuan Jerusalenman vichai ringapaca, ¿mashna huatatashi ashtahuan causapashara?

35Cai punllacunami, pusaj chunga huatata charini. ¿Ima ali cajtapash, ima nali cajtapash yachai ushashachu imashi? Canda servij ñucaca, ¿ima micunata cashpapash, ufianata cashpapash, mishquillagu cajta yachashachu? ¿Candaj jaricuna candashcatapash, candaj huarmicuna candashcatapash uyai ushashachu imashi? Canda servij ñucaca, imapajta can jatun mandajta ashtahuan llaquichishpa causangapaca ripashayari.

36Canda servij ñucaca, Jordán yacuta chimbashpaca, ashagutallami can jatun mandajhuanga ripasha. ¿Imashpata can jatun mandajca, imapash jatun alicunata randi carasha nihuanguiyari?

37Canda servij ñucataca, ñuca causajushca pueblopillata huañushpa, ñuca taitata, ñuca mamata pambashca utuju ladopillata pambachun, tigrachun saquihuailla nipanimi. Ashtahuangarin canda servij Quimam shuti runagumi, caipi capan. Paica, can jatun mandajhuan ripangallami. Can jatun mandajpaj ima ali cana cajpipash, paiman rurapanguilla— nijurcami.

38Shina nijpimi jatun mandajca, cashna nirca:

—Shina cashpaca Quimam shuti runaca, ñucahuan shamuchunlla. Paihuanga, cambaj ima ali cana cajpipash, rurashallami. Shinallata can imata rurapai nijpipash, ñucaca tucuita rurashallami— nirca.

39Shina nishca jipami, tucuilla soldadocuna Jordán yacuta chimbanajurca. Shinallata jatun mandajpash, Jordán yacuta ña chimbashca jipaca, Barzilai shuti runaguta muchashpa cayacaman nishpa bendiciajpimi, paipaj huasiman tigrarca.

40Shinami jatun mandajca, Gilgal puebloman rirca. Jatun mandajtaca, Quimam shuti runapash, Judá llactamanda tucui gentecunapash, Israel puramandaca shuj chaupimi, cumbashpa rinajurca.

41Jatun mandajpajman, tucui israelcuna shamushpami, cashna ninajurca:

—¿Imashpata Judá llactamanda ñucanchi huauquicunaca, can jatun mandaj Davidtapash, cambaj familiacunatapash, tucuilla canda servijcunatapash Jordán yacuta chimbachishpa pusharca?— ninajurcami.

42Shina nijpimi, Judá llactamanda tucuilla runacunaca, tucui israelcunata cashna ninajurca:

—Jatun mandajca ñucanchi aillullatamari. Ashtahuangarin, ¿imashpata cangunaca chaimandalla fiñaringuichi? Ñucanchica jatun mandajpajmandaca, ¿imatata micurcanchi? ¿Pai imatalla carashcatachu, ñucanchica japircanchi?— ninajurcami.

43Shina nijpimi israelcunaca, Judá llactamanda runacunataca cashna ninajurca:

—Ñucanchimi, jatun mandajtaca, chunga aillu cashpa japinata charinchi. Davidpaj puramandallatapash, cangunataca ashtahuan yali ashtacacunami canchi. ¿Imashpata ñucanchitaca, yangapi churanguichi? ¿Nachu jatun mandajta caiman tigrachimungapaca, ñucanchira punda parlanajurcanchi?— ninajurcami.

Judá llactamanda runacunami, israelcunataca ashtahuan yalishpa shinllita rimanajurca.