1 SAMUEL 11 - Quichua Imbabura Bible

1Chai jipami, amonitacunata mandaj Nahas shuti runaca, Galaad llactapi tiaj Jabes shuti pueblopi causajcunahuan macanajungapaj vichai rishpa, carpacunata shayachishpa tianajurca. Chaimandami Jabes shuti pueblopi causajcunaca, Nahas shuti runataca cashna ninajurca: —Ñucanchihuan ama macanajungapaj, ari nipairi. Chaita ari nijpica, canda servishpami causashun— ninajurcami.

2Shina nijpimi, amonitacunata mandaj Nahas shuti runaca, cashna nirca: —Ari, canguna mañashcata rurashallami. Shina cashpapash, tucui cangunatami ali lado ñavita llujchishpa, tucui israelcunataca jatun pingaipi churana yuyaihuan ari nisha— nircami.

3Shina nijpimi, Jabes shuti pueblopi causajcunata mandaj rucucunaca, cashna ninajurca: —Cunanmanda canchis punllacaman shuyapairi. Tucui Israel llactapi villachun shuj villajcunata cachagrinchirami. Maijambash na ñucanchita ayudaj shamujpica, ñucanchillata cambajman shamushunllami— ninajurcami.

4Villachun cachashca runacunaca, Saúl causajuj Gabaa shuti puebloman chayashpami, chai shimicunataca tucui gentecuna uyajta villanajurca. Chaita uyashpami, tucui gentecuna caparishpa huacanajurca.

5Saulca, huagracunahuan pambamanda tigramujushpami: —¿Imashpata gentecunaca chashna huacanajun?— nishpa tapurca. Shina tapujpimi, Jabes shuti pueblomanda shamuj runacuna, imatalla nishcata tucuita villanajurca.

6Shina nishcata Saúl uyajhuanmi, Taita Diospaj Espirituca, ninan ushaihuan Saulpajman shamurca. Chaimandami paica, nina japirinshna ninanda fiñarirca.

7Shina fiñarishpami, ishcai huagracunata japishpaca, asha asha fitishpa tucui Israel llactapi causajcunaman, chai aichata ricuchishpa cashna villachun cacharca: “Maijambash Saulhuan, Samuelhuan tandanajungapaj na munaj runacunapaj huagracunatapash, chashnallatami ruranga” nichunmi cacharca. Shina villajpimi, Mandaj Dios cachamushca manllaica, chai gentecunapaj jahuapi urmarca. Chaimandami paicunaca, shujllashnalla tandanajushpa llujshinajurca.

8Bezec shuti pueblopi Saúl cuentajpica, quimsa patsaj huaranga israelcunami carca. Shinallata Judá aillumandaca, quimsa chunga huaranga runacunami carca.

9Chai jipami, villangapaj shamushca chai runacunataca, cashna nishpa tigrachinajurca: —Galaad llactapi tiaj Jabes shuti pueblopi causajcunataca, cashna nigrichi: ‘Caya chaupi punllacamanmi, cangunataca quishpichishun’ ninmi nigrichi— ninajurcami. Villangapaj rij chai runacuna, Jabes shuti puebloman tigramushpaca, imatalla nishcatami villanajurca. Shina villajpimi chaipi causajcunaca, ninanda cushijunajurca.

10Chaimandami Jabes shuti pueblopi causajcunaca, paicunata fiñajcunataca cashna ninajurca: —Cayapajmi ñucanchica, cangunapajman llujshimushun. Chaipica, cangunapaj tucui imashna ali cana cajpipash, ruranguichilla— ninajurcami.

11Ña cayandi punllami, cashna tucurca: Saulca, paipaj soldadocunata quimsapi shicanyachishpami, amonitacuna tianajuj carpa chaupicunaman, narapash ali punllayajpillata yaicunajurca. Chashna yaicushpaca, chaupi punllacaman ninandapacha macanajushpami, chugrichishpa huañuchinajurca. Chaimandami huaquin puchushcacunapash, caita chaita calpachi tucunajurca. Paicunaca, maijanllapash na ishcaipura quedarcachu.

12Chai jipami israelcunaca, Samuelta cashna ninajurca: —‘¿Saulchu ñucanchita mandanga?’ nishpa rimaj runacunaca, ¿maijangunata carca? Chai runacunata huañuchingapaj, ñucanchiman cuhuaichi— ninajurcami.

13Shina ninajujpimi Saulca, cashna nirca: —Mandaj Dios, israelcunata cunan quishpichishcamandaca cunanga, pipash na huañungachu— nishpami saquichirca.

14Ashtahuangarin Samuelca, israelcunatami cashna nirca: —Cai llactata mandanataca alipacha callarichingapaj, Gilgal puebloman jacuchi— nircami.

15Shina nijpimi tucui israelcuna, Gilgal puebloman rinajurca. Chaipimi, Mandaj Diospaj ñaupajpi Saultaca, jatun mandaj cachun churanajurca. Chai jipami, Mandaj Dioshuan ali cangapaj animalcunata carashpa huañuchinajurca. Chashna rurashpami Saulpash, tucuilla israelcunapash, ninandapacha cushijunajurca. Samuelca, Saúl mandanatami israelcunaman villashca