1 SAMUEL 30 - Quichua Imbabura Bible

1Davidca, quimsa punlla jipami paipaj runacunandi, Siclag shuti puebloman chayamurca. Chaipimi amalecitacunaca, Neguev shuti jichushca pambata rishpa, Siclag shuti pueblota llaquinayaita tucuchishpa, ninata japichishpa saquishca carca.

2Paicunaca huarmicunata, tucui chaipi causajcunataca, uchillacunamanda callarishpa, rucucunacamanmi prezu apashpa rishca carca. Ashtahuangarin maijandallapash na huañuchishpami, paicuna ñanda rinajushpaca, catichishpa rinajushca carca.

3Davidpash, paipaj runacunapash chai puebloman chayamushpaca, tucuillata rupachishpa paicunapaj huarmicunatapash, paicunapaj churicunatapash, ushicunatapash, prezu apashcatami ricunajurca.

4Chaita ricushpami Davidpash, paihuan purij runacunapash, huacaita na ushangacaman, ninandapacha caparishpa huacanajurca.

5Jezreel pueblomanda Ahinoam shuti huarmitapash, Carmel shuti pueblomanda Nabal shuti runapaj huarmi cashca Abigailtapashmi, Davidpaj chai ishcandi huarmicunata prezu apashca carca.

6Davidtaca, tucui runacunami rumicunahuan huañuchishun nishpa parlanajurca. Chaimandami, paica ninanda llaquirirca. Chai runacunapaj huarmicunata, churicunata, ushicunata apashcamandami, paicunapaj shungupi ninanda fiñarishpa, Davidtaca chashna rurashun ninajurca. Ashtahuangarin Davidca, paita Mandaj Taita Diospimi shinlli tucurca.

7Chai jipami Davidca, Ahimelec curapaj churi Abiatar curataca: —Efod nishcata ñuca ñaupajman apamupai— nijpi Abiatarca, Davidpajman efodta quimichirca.

8Chaipimi Davidca, Mandaj Diosta cashna nishpa tapurca: —¿Chai shuhua runacunataca catipashachu? ¿Catishpaca, japigri ushapashachu imashi?— nircami. Shina nijpimi paica: —Catilla, japigringuipachami. Prezu apai tucushcacunatapash cacharichinguimi— nirca.

9Shina nijpimi Davidca, paihuan purij sucta patsaj runacunandi rishpaca, ninanda jatarij Besor shuti huaicu yacu manñaman chayagrirca. Chaipimi huaquingunaca shuyanajurca.

10Davidca, chuscu patsaj runacunandi catishpa, ashtahuan rijurcallami. Ashtahuangarin ishcai patsaj runacunaca, ninanda shaijushca cashpami, ninanda jatarij Besor shuti huaicu yacuta na yali ushashpa, huashaman quedarca.

11Shuj pambata ña rinajushpami, Egipto llactamanda shuj runata tuparishpa, Davidpajman pushamunajurca. Chai runamanmi, tandata caranajurca. Shina carajpi ña micushca jipaca, yacutapashmi ufiachun caranajurca.

12Shinallata jigos chaquishcata rurashca shuj asha tandatapash, ishcai racimo uvas chaquishcatapashmi caranajurca. Ña chaita micushca jipami, paipaj espiritupash shinlli tucurca. Paica, quimsa punlla quimsa tutatami na micushpa, yacutapash na ufiashca carca.

13Chai jipami Davidca, cashna nishpa tapurca: —¿Pipaj servijta cangui, maimandata cangui?— nijpimi, Egiptomanda chairalla viñai chai runaca, cashna nirca: —Ñucaca, amalecitapura shuj runata servijmi cani. Ñuca amomi, ñuca huañujujpi jichushpa saquihuarca. Cunan punllahuanga, ñami quimsa punlla tucun.

14Ñucanchica, Neguev shuti pambapi causanajuj cereteo nishca runacunatapash, Judá llactapi causajcunatapash, Neguev pambapillata causanajuj, Caleb shuti runapaj miraicunatapashmi llaquichircanchi. Shinallata Siclag shuti pueblopica, ninatami japichircanchi— nircami.

15Shina nijpimi, Davidca: —¿Chai soldadocunapajman ñucanchita pushangapaj munanguichu?— nishpa tapurca. Shina tapujpimi chai runaca, cashna nirca: —Candaca na huañuchishachu. Cambaj amopaj maquipipash na cushachu nishpa, Taita Diospaj shutipi juramentupairi. Shina rurajpica, chai gentecunapajman pushashallami— nircami.

16Shina nishca jipaca, chai runaca pushashpa rircallami. Chaipimi chai gentecunaca, tucui chai pambapica caipi chaipi micushpa, ufiashpa, fiestata rurashpa tianajushca carca. Filistea llactamanda, Judá llactamanda shuhuashpa imatalla apashcacunahuan ninanda cushijushpami tianajushca carca.

17Chaipimi Davidca, chai tutamandata callarishpaca, cayandi punlla chishangacaman chugrichishpa huañuchijurca. Chai runacunamandaca, shujllapash na quishpirircachu. Ashtahuangarin chuscu patsaj huambralla runacunallami camellocunapi tiarishpa pacajushpa calpanajurca.

18Shinami Davidca, amalecitacuna tucui imatalla apashcacunataca quichurca. Shinallata paipaj ishcandi huarmitapashmi cacharichirca.

19Imacunalla tiashcapash, uchillalla, jatunlla cashpapash, churicuna cashpapash, ushicuna cashpapash, shuhuashpa apashcacunamandaca, nimallapash na illarcachu. Tucui imatalla shuhuashpa apashcacunatami, Davidca cutin japirca.

20Shinallata tucui llamacunatapash, racu jatun huagracunatapashmi, Davidca quichurca. Chaimandami, tucuillata ñaupachishpa shamunajujcunaca: “Caicunatami, Davidca quichumushca” ninajurca.

21Davidca, ishcai patsaj runacuna, ninanda shaijushpa paita na cati ushashpa, quedashca runacunapajmanmi shamurca. Paicunataca, ninanda jatarij Besor shuti huaicu yacu manñapimi saquishca carca. Chai runacunaca Davidtapash, paihuan shamunajuj runacunatapashmi tuparingapaj llujshimurca. Gentecunapajman David chayashpaca, cushijushpami: “¿Alillachu canguichi?” nirca.

22Ashtahuangarin Davidhuan chai macanajuiman rishca puracunamanda, jatun nalita ruraj, tucui nali runacunaca cashnami ninajurca: —Paicuna ñucanchihuan chai macanajuiman na rishcamandaca, imatalla ñucanchi quichumushcacunataca, na cushunllu. Ashtahuangarin paicunapaj huarmicunata, huahuacunatalla japishpa richunlla— ninajurcami.

23Shina ninajujpimi Davidca, cashna nirca: —Ñuca huauquicunalla, na chashna ruranachu canguichi. Caicunataca, Mandaj Diosmi ñucanchiman cararca. Paillatami, ñucanchitapash huacaichishpa, ñucanchita llaquichingapaj shamushca, chai nali shuhua runacunatapash, ñucanchi maquipi churarca.

24Shina cashcamanda, chashna rurashun ninajujtaca, ¿pita alicachishpa uyanga? Macanajuiman urai rishcacuna japina cashcashnallatami, imatalla charishcacunata cuidangapaj quedashcacunapash japinga. Tucuicunapajmi, chashnallata chaupirishpa japina urmanga— nircami.

25Chaica, chai punllamandapacha callarishpa cunangamanmi Israel llactapica, mandashca shimi tucushca.

26Siclag shuti puebloman David ña chayashpaca, macanajushpa imatalla quichumushcamandaca, Judá llactapi causanajuj paipaj cumba mandaj rucucunaman carachunmi, cashna nishpa cacharca: “Ricui, caicunatami cangunaman carani. Caicunaca, Mandaj Diosta fiñajcunata quichumushcacunami” nishpami cacharca.

27Chai quichumushcataca, Bet-el shuti pueblopi, Neguev shuti jichushca pambapi tiaj Ramot shuti pueblopi causajcunamambashmi cacharca. Jatir,

28Aroer, Sifmot, Estemoa,

29Racal shuti pueblocunapi causajcunamambash, Jerameel shuti runapaj miraicuna causanajuj pueblocunamambash, ceneocuna causanajuj pueblocunamambashmi cacharca.

30Shinallata Horma, Corasán, Atac,

31Hebrón shuti pueblocunapi causajcunamambashmi, carachun cacharca. Maipilla paipaj runacunahuan, David purishca pueblocunapipashmi carachun cacharca. Saulpash, paipaj churicunapashmi huañushca (1 Crón. 10:1-12)