1Taita Diospajta ruraj Moisesca, pai nara huañushpallatami, taita Israelpaj miraicunataca bendiciajurca. Pai bendiciashca shimicunaca, caicunami.
2Paica cashnami nijurca:
“Mandaj Diosca, Sinaí shuti urcumandami shamurca.
Seir shuti urcumandami punchayachijurca.
Parán shuti urcumandapachami, punchapamba ricurirca.
Paipajlla causaj, chunga huaranga
huarangacunapaj chaupipimi shamurca.
Paipaj ali lado maquipica, mandashcatami
ninatashna apashpa shamurca.
3Pai agllashca gentecunataca juyarcarami.
Tucui paipajlla shicanyashcacunami,
paipaj maquipi causanajurca.
Chaimandami, maita rinata can ricuchishcata
chasquishpa, can yachachishcata catinajurca.
4Mandashcata Moisés cujushpaca, Jacobopaj
mirai tandanajushca gentecunapaj cachunmi curca.
5Gentecunata mandajcuna Israel aillucunahuan
tandanajujpica, Jesurún shuti pushtupimi
jatun mandaj tucurca.
6Rubén ailluca, ama huañushpa causajuchunlla.
Chai aillu runacunaca, ama huaquingunalla cachun” nishpami bendiciajurca.
7Judá aillutaca, cashna nishpami bendiciarca:
“Mandaj Dioslla, Judá aillu mañajujtaca uyapairi.
Paipaj gentecunatapash pushapairi.
Paicunata fiñajcunataca, paipaj maquihuan mishachun, cambash ayudapairi” nircami.
8Leví aillutaca, cashnami nijurca:
“Can charishca Tumim nishcapash, Urim nishcapash, Diosta yariashpa causaj runapajmi canga.
Paitami, Masah nishca Meriba shuti yacupi cashpa, paihuan fiñanajushpa pai imashna cajta ricurcangui.
9Paimi, paipaj taita mamataca:
‘Ima horapash na ricushcanichu’ nirca.
Paipaj huauquicunatapash: ‘Na rijsinichu’ nircami.
Paipaj huahuacunatapash: ‘Na ricushcanichu’ nircami.
Paicunami, cambaj Shimicunata cazunajurca.
Canman ari nishcatapashmi pactachinajurca.
10Paicunami, Jacobopaj miraicunamambash, aliguta ricushpa mandanata yachachinajunga.
Can mandashcatami, israelcunaman yachachinajunga.
Shinallata inciensotapash, cambaj
ñaupajpimi cushnichinajunga.
Tucuillata rupachina animaltapash,
cambaj altarpimi churanajunga.
11Mandaj Dioslla, paicuna imaguta
rurashcatapash bendiciapairi.
Paicunapaj maquihuan imaguta rurashcatapash
cushijuihuan chasquipairi.
Paicunata fiñajcunatapash, paicunata millanayachij
runacunatapash, ima horapash ama jatarichun
huasha tulluta faquipairi” nijurcami.
12Benjamín aillutaca, cashnami nirca:
“Paicunaca, Mandaj Dios juyashcacunami.
Imatapash na manllashpami, paipaj
ladopi aliguta causanga.
Paicunataca pacashpa charijungallami.
Diospaj rigra ucupimi causanajunga” nircami.
13Josepaj aillutaca, cashnami nijurca:
“Cangunapaj alpacunataca, Mandaj Dios bendiciapachun.
Jahua pachamanda juyailla jamzi paramuhuan, manllanayai ucu ucupi tiaj yacuhuambash bendiciapachun.
14Rupai punllacunapica, ashtahuan ali granocunata fucuchishpa, luna punllacunapica, micunayai granocunata fucuchishpa bendiciapachun.
15Punda huatacunamandapacha tiaj urcucunapica, ashtahuan ali granocunatami fucuchinga.
Causaita causaicaman tiaj lomacunapica, ashtaca granocunata fucuchishpa bendiciapachun.
16Shinallata ali alpacunapi tucui imalla ashtahuan ali tiashcacunahuan bendiciapachun.
Zarza casha yurapi causajushca Diospaj juyaica, Josepaj umaman shamupachun.
Paipaj huauqui puracunapi mandaj runapaj umamambash shamupachun.
17Pai juyailla canaca, punda huachashca jari huagrashnami.
Paipaj ushaica, búfalo nishca huagrapaj cachushnami.
Chaicunahuan tupanshnami shuj gentecunataca,
cai pacha tucuri manñacunaman tucuillata cachanga.
Efrainbaj mirai paicunaca, chunga
huaranga huarangacunami.
Manasespaj mirai paicunaca,
huaranga huarangacunami” nircami.
18Zabulón aillutaca: “Zabulón, canga maiman
llujshishpapash cushijungui” nircami.
Isacar aillutapash: “Canga, cambaj
carpacunapi cushijushpa causanguilla” nircami.
19“Paicunaca, gentecunataca paicunapaj
urcumanmi cayanga.
Chaipimi, imatapash cashcatapacha rurashpa,
animalcunata Diosman cushpa huañuchinajunga.
Chaimandami, mama cucha yacupi ashtacapacha
tiajcunata micunajunga.
T'iyu alpapi pacashca juyaillagucuna
tiajtapashmi japinajunga” nircami.
20Gad aillutaca, cashnami nirca:
“Gad ailluman ashtaca alpacunata caraj Diosca, aligumi cangui ni tucushca cachun.
Gad ailluca, leonshna samashpami rigratapash, umatapash micungapaj aisashpa surcun.
21Paica, ashtahuan ali alpatami, paipaj cachun agllan.
Chaipimi, mandajman cungapaj ali alpata alichishca charirca.
Paimi, gentecunata ñaupashpa shamurca.
Mandashca shimicunata, imatapash cashcatapacha rurashpa, imata rurachun Mandaj Dios mandashcacunataca, israelcunahuanmi pactachirca” nircami.
22Dan aillutaca, cashnami nirca:
“Dan ailluca, huahua leonshnami Basán urcumandapacha fahuamujun” nircami.
23Neftalí aillutaca, cashnami nirca:
“Neftalí aillumanga, imata cashpapash na ushangacamanmi carashca.
Mandaj Dios bendiciashcataca, ashtacatapachami charin.
Paipaj alpaca, indi huashajuj ladomanda urai ladocamanmi” nircami.
24Aser shuti aillutaca, cashnami nirca:
“Aser ailluca, Jacobopaj mirai puracunapi bendiciai tucushca cachun.
Paipaj huauquicunapipash, juyai tucushca cachun.
Paipaj chaquitapash, aceitepi mutiyachijuchun.
25Cambaj pungucunata jarcanacunaca, jirruta, bronceta rurashcami canga.
Cambaj ushaipash, can causana punllacunashnami canga.
26Jesurún nishcapaj Taita Dioshuan chimbapurangapaca, pipash na tianllu.
Paica canda ayudangapajmi, jahua pachapi tiarin.
Paipaj ninan ushaihuanmi, fuyu jahuapi tiarin.
27Can pacajunaca, causaita causajuj Taita Diosmi.
Causaita causajuj Diospaj rigrapash, cai pachacamanmi.
Canda fiñajcunataca, cambaj ñaupajmanda llujchishpa cachashpami: ‘Paicunata tucuchi’ nishpa mandarca.
28Israelcunaca, imatapash na manllashpami causanajunga.
Taita Jacobopaj miraicunapaj pugyuca, trigopash, uvaspash tiaj llactapimi, paicunapajlla tiajunga.
Jahua pachamandapashmi, jamzi paramuta shutuchimunga.
29Israelcunalla, cushijuichiyari.
¿Pita cangunashna, Mandaj Dios quishpichishca gentecuna tianyari?
¿Pita escudoshna canda pacaj, canda mishachij espadashna Diosca tianyari?
Chashnamandami, canda fiñajcunaca pingai tucushpa urai cumurinajunga.
Cangunami, paicunapaj urcu jahuacunapi sarunguichi” nijurcami.
DEUTERONOMIO
Who We AreWhat We EelieveWhat We Do
2025 by iamachristian.org,Inc All rights reserved.
