1Shinamandami Moisespash, israelcunapash cai candanata cashna nishpa, Mandaj Diosman candanajurca:
“Jatun manllarinacunata rurashpa ricuchishcamandami ñucaca, Mandaj Diosman candasha.
Paica caballocunandi, soldadocunandimi, mama cuchapi huashajuchishca.
2Mandaj Diosca ñucata shinllichij, ñuca candana Diosmi.
Paimi ñucata quishpichihuashca.
Paimi ñucapaj Taita Dios, paitami alicachisha.
Ñuca taitapaj Taita Diosmi, paitami jatunyachisha.
3Mandaj Diosca, macanajunata ali yachaj runashnami.
Paica, Mandaj Dios shutimi.
4Faraonbaj carretacunataca, paipaj soldadocunandimi, mama cuchapi huashajuchirca.
Paipaj soldadocunata mandachun agllashca soldadocunapash, Puca Cuchapimi pambai tucurca.
5Manllanayai ucu ucu yacucunami quilparca.
Rumishnami ucu ucucaman, urai huashajunajurca.
6Mandaj Dioslla, cambaj ali lado maquimi, jatun manllarinacunata, ninan ushaihuan rurashca.
Mandaj Dioslla, cambaj ali lado maquimi fiñajcunataca faquinshna llaquichishca.
7Canda fiñashpa jatarijcunataca, cambaj jatun ushaihuanmi urmachishcangui.
Canga ninanda fiñarishpami, paicunataca chaquishca fangacunatashna tucuchishcangui.
8Cambaj samaita fucujpimi, yacuca mundunashcashna tucurca.
Ninanda rinajuj yacucunapash, shujlla mundunshnami tucurca.
Manllanayai ucu ucupi tiaj yacucunapash, chaupi cuchapi shinlliyashpami, casilla tucushpa jarcarirca.
9Fiñaj runaca, cashnami nijurca:
‘Paicunata catishpami, prezu japisha.
Paicuna imata charishcacunata quichushpami chaupisha.
Chaicunahuanmi ñuca almaca, ninanda cushijunga.
Ñuca espadata llujchishpami, ñuca maquihuan tucuchisha’ nijurcami.
10Cambaj huairahuan fucujpimi, mama cuchaca paicunata pambarca.
Llasha llasha plomoshnami, ashtaca ashtaca yacucunapi huashajunajurca.
11Mandaj Dioslla, dios puracunamandaca canshna shuj Diosca, ¿pita tiangayari?
Canshna, jucha illajpachaca, ¿pita tiangayari?
Canga, jatun manllanayai juyailla ruranacunata, jatun manllarinacunata rurashcamanda, manllana Diosmi cangui.
12Cambaj ali lado maquita chutajpimi, alpaca paicunata langarca.
13Can quishpichishca cai gentecunataca, can llaquishpami pushamurcangui.
Cambaj ushaihuanmi, jucha illaj cambaj llactaman pusharcangui.
14Gentecunaca, caita uyashpami chujchunajunga.
Filistea llactapi causajcunataca, nanaimi japinga.
15Shinamandami, Edom llactata mandajcunaca musparinajunga.
Moab llactapaj ninan shinlli runacunatapash, manllaimanda chujchuimi japinga.
Canaán llactapi tucui causajcunaca, manllarishpami imatapash na rurai ushanajunga.
16Paicunapaj jahuapica chujchuipash, manllaipash shamuchun.
Jatun ushaita charij cambaj maquita ricushpaca, rumishna upa tucuchun.
Mandaj Dioslla, cambaj cai quishpichishca gentecuna yalingacaman, chashna cachun.
17Paicunataca can pushashpami, can carashca urcupi tarpunshna churapangui.
Mandaj Dioslla, can alichishca can causajuj pushtupi chashna churapangui.
Mandaj Dioslla, cambajlla cachun cambaj maquihuan shinllita shayachishca huasipi chashna churapangui.
18Mandaj Diosmi, causaita causaicaman tucui causaipi mandajungalla” nishpami candanajurca.
19Faraonga, caballopi tiarishcami, paipaj carretacunandi, caballocunapi tiarishca paipaj gentecunandi, mama cuchaman yaicurca. Mandaj Diosca, mama cucha yacutaca, paicunapaj jahuapimi tigrachirca. Ashtahuangarin israelcunaca, cucha chaquishca chaupitami yalinajurca.
20Shinallata Aaronbaj pani, profeta Mariaca, shuj panderota japishpami, huactai callarirca. Tucuilla huarmicunapashmi, panderota huactashpa danzashpa, Mariata catishpa llujshinajurca.
21Shinallata Mariaca, cashna nishpami candajurca:
“Mandaj Diostaca, ninambacha jatun cashcamanda candaichi.
Paimi, caballocunatapash, caballopi tiarishca soldadocunatapash, mama cuchapi pambarca” nijurcami.
Mara nishca pambapimi, jayaj yacu tiashca22Israelcunata Puca Cuchamanda llujshichun Moisés mandajpimi, Shur nishca jichushca pambaman llujshirca. Quimsa punllatami, yacuta na tari ushashpa, jichushca pambapi purinajurca.
23Chai jipaca, Mara nishca pambamanmi chayarca. Chaiman chayashpaca, chai Mara nishca pambapi tiaj yacuca jayaj cajpimi chai yacutaca, na ufiai ushanajurca. Chaimandami, Mara nishpa shutichinajurca.
24Shina cashcamandami, israelcunaca: “¿Imatata ufiana canchi?” nishpa, Moisestaca fiñashpa nalicachinajurca.
25Chaimandami Moisesca, Mandaj Diosta caparishpa mañajpi, Mandaj Diosca shuj yurata ricuchirca. Chai yurata yacupi shitajpimi, yacuca mishquiyarca. Chaipimi, pactachinajuchun cushca shimicunatapash, mandashca shimicunatapash paicunaman curca. Chaipillatami paicunataca cazujta, na cazujtapash ricujurca.
26Chaipica, cashnami nijurca: “Canda Mandaj Taita Dios rimashcataca, aligutapacha uyashpa, paipaj ñaupajpipash aligutalla rurashpa causangui. Pai mandashcacunatapash ali uyashpa, pactachinajuchun pai cushcacunatapash tucuita cazungui. Shina causajujpica, Egipto llactapi causajcunaman cachamushca ung:uicunataca, imatallapash na cachamushachu. Ñucami, cambaj ung:uita alichij Mandaj Dios cani” nijurcami.
27Chai jipaca, chunga ishcai pugyu yacucuna, canchis chunga palmera quirucuna tiaj Elim shuti pushtumanmi chayarca. Chaipimi yacu ladocunapi, carpacunata shayachishpa tianajurca.
Who We AreWhat We EelieveWhat We Do
2025 by iamachristian.org,Inc All rights reserved.
