1Ñuca samaica, ñami tucurijun. Ñuca causana punllacunapash, ñami tucurijun. Ñucata pambana utujutapash, ña allashcallami.
2Na cazushpa asijcunallami, ñucahuanga tianajun. Ñuca ñavica, paicuna llaquichijtallami ricujun.
3Taita Dioslla, can ñucata pacana cajta yachangapaca, imatallapash ricuchihuayari. Ñucamanda shayaringapaca, ¿pita munangayari?
4Canmi, paicunapaj shungumandaca, ali yuyaicunata anchuchishcangui. Shinamandami, paicunataca na jatumbi churangui.
5Imapash animalta japinshna japinajuchun, paipaj cumbatallata llullashpa villaj runapaj huahuacunami, llaquilla ñavihuan ricunajunga.
6Yarichij shimicunahuan gentecuna ñucata rimanajuchunmi, Diosca saquihuashca. Paicunapaj ñaupajpica, ñucaca uchilla tamborshnami cashcani.
7Nanaihuanga, ñuca ñavipashmi amsayarca. Ñuca yuyaicunapash, tucuillami llandushna tucurca.
8Chaita ricushpami, aligutalla rurajcunaca manllarinajunga. Ima nalitapash na ruraj runaca, Diosta na manllaj runata llaquichingapajmi jataringa.
9Ashtahuangarin imatapash cashcatapacha ruraj runaca, imatapash cashcatapacha rurashpa catijungallami. Paipaj maquihuan ima nalitapash na ruraj runaca, ashtahuanmi shinlli tucunga.
10Ashtahuangarin cunanga, cangunaca tucuicuna tigrashpa shamuichilla. Canguna purapica, alipacha yachajushca runataca na tarishachu.
11Ñuca causana punllacunaca, ñami yalishca. Ñuca imatalla yarijujtapash anchuchihuashcami. Ñuca shungupi imata yarijushcapash, ñami tucurishca.
12Tutataca, punllamanmi tigrachinajurca. Yana yana tutapica, michapash na punchayachinllu.
13Ashata ñuca shuyajpica, Seolmi ñuca huasi canga. Yana yana tutapimi, ñuca camata rurasha.
14Ñucaca, ismushpa tucurinatami: ‘Canga, ñuca taitami cangui’ nircani. Jurucunataca: ‘Ñuca mama, ñuca panicunami canguichi’ nircanimi.
15Cunanga, ñuca shuyanaca, ¿maipitayari? Ñuca shuyajushcataca, ¿pita ricungayari?
16Seol ucucamanmi, ñucahuan urai rijunga. Ñutu alpapimi, parejo samashun” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
