Psalms 74 - Quichua Imbabura Bible

Fiñajcuna llaquichijujtami, Taita Diosman villashcaYachachingapaj Asaf shuti runa rurashca Salmomi.

1Taita Dioslla, ¿imamandata ñucanchitaca,

causaita causaicaman na yaringapaj shitangui?

¿Imamandata cambaj jihua pambapi

purinajuj cambaj llamacunataca,

nina japirinshna ñapash fiñarcangui?

2Punda huatacunamanda can agllashca

tandanajushca gentecunataca yaripairi.

Cambaj aillu cachunmi, llaquimanda quichpichircangui.

Can causashca cai Sion shuti urcutapash yaripairi.

3Napacha cutinga alichi ushanalla, llaquinayaita

tucuchi tucushcata ricuj shamupairi.

Chai fiñajcuna cambaj huasipi tucui

nalita rurashcata ricuj shamupairi.

4Canda fiñajcunaca, canhuan

tandanajushca chaupicunapimi caparinajun.

Paicunapaj cajta ricuchingapaca,

banderacunatami churarca.

5Paicunaca, quiru junda bosque chaupipi

jachahuan quiruta cuchunajunshnami.

6Cunangarin, labrashca cambaj caspicunataca,

jachacunahuan, martillocunahuanmi tucuillata faquirca.

7Cambajlla huasitaca, ninahuanmi rupachirca.

Cambaj shuti causajun cambaj jatun carpatapash,

alpaman shitashpami, yangapi churanajurca.

8Paicunapaj shungupica: “Tucuillata

tucuchishun” yashpami purinajurca.

Taita Diosta yaringapaj tandanajuna huasicunataca,

tucuillatamari llactapica rupachirca.

9Can ñucanchihuan cajta ricuchijcunataca,

na ricushpami causanchi.

Can ima nishcata villajcunapash illanmari.

Ima punllacunacaman cashna canata yachajpash,

ñucanchi purapica na tiapanllu.

10Taita Dioslla, ¿ima punllacunacamanda

ñucanchita llaquichijca, rimashpa pingaichigrin?

Canda fiñajcunaca, ¿paicunapaj tucui causaicamanllu

cambaj shutitaca nali shimicunahuan rimanga?

11¿Imamandata cambaj maquita pacangui?

¿Imamandata cambaj ali lado maquitaca,

quinllulipi pacangui?

12Ashtahuangarin Taita Diosca, punda

huatacunamandapachami ñucata jatun mandaj cangui.

Canmi cai pachapica, jatun macanajuicunata

mishashpa quishpichij cangui.

13Cambaj ushaihuanmi, mama cuchatapash chaupircangui.

Yacucunapi tiaj manllanayai animalcunapaj

umacunatacapashmi faquircangui.

14Leviatán nishca manllanayai animalpaj

umacunatapash llapishpami, jichushca

pambacunapi causajcunaman micuchun cararcangui.

15Canmi pugyucunatapash,

jatun yacucunatapash llujchircangui.

Ninandapacha rijuj jatun

yacucunatapash chaquichircanguillami.

16Punllapash cambajmi, tutapash cambajllatami.

Canmi inditapash, lunatapash churarcangui.

17Canmi, tucui cai pacha

maicamanlla canataca churarcangui.

Rupai punllacunatapash, tamia

punllacunatapash canmi churarcangui.

18Caita yaripairi: Canda fiñajcunaca,

Mandaj Dios candami rimanajurca.

Juizu illaj gentecunaca, cambaj shutitami

nali shimicunahuan rimanajurca.

19Cambaj urpigupaj causaitaca,

ama millai animalcunaman cupaichu.

Llaquita apaj cambajlla tandanajushcacunataca,

ama causaita causaicaman cungapaichu.

20Ñucanchihuan ari ninajushcata yaripairi.

Llactapi yana yana pushtucunapica,

ninandapacha llaquichinacunahaun jundami causanajun.

21Ñavita urai cumuchi tucushpa causajtaca,

ama cutin pingaichipaichu.

Ninan llaquita apaj, imagupash illajcunami,

cambaj shutitaca alicachinajunga.

22Taita Dioslla, jatarishpa canllata jarcaripairi.

Punllandi imashna canda nalicachishpa,

juizu illaj runa rimajtaca yaripairi.

23Canda fiñajcuna ninanda caparinajujtaca,

ama cungapaichu.

Canda fiñashpa jatarijcunami,

ashtahuan ashtahuan caparinajun.